ဂကောံဒပ်ပၞာန်ဗၟာ မကေတ်လဝ်တာလျိုင် ဒၞာဲသမ္မတတံ စကာနဲကဲပန်ဗ္တိုက်ကဵုက္ၜင်ကျာ (၂) ဝါဆက် ဂၠိုင်ကၠုင်တုဲ ကောန်ကွာန်ဗွဲမဂၠိုင် ဒးဒုင်ဘဲဇီုကပိုက်ချိုတ်ဂျိုင်ဂၠိုင်ဒၟံင်ရောင် ပ္ဍဲလိက်ဒုင်စဳရေင်လၟေင်သၞာံ ယာန်စက်စၟဳစၟတ်ဂၠိုက်ဂၠာဲဗၠးၜး ဆေင်စပ်ကဵုကၟိန်ဍုင်ဗၟာ (IIMM) ဟီုဂးလဝ်ရ။
အတိုင်လိက်ဒုင်စဳရေင် ဂိတုအဝ်ဂေတ် စၟတ်တ္ၚဲ (၉) တုဲကၠုင်ဏံမ္ဂး ဒပ်ပၞာန်ဗၟာဝွံ အပ္ဍဲအခိင်ကၠာပေဲါရုဲမာဲကဵု ကာလဂွံဒၞာဲအလဵုအသဳတုဲဂှ် ပွပန်ဗ္တိုက်ကဵုက္ၜင်ကျာ လ္တူညးဍုင်ကွာန် ကေုာံ အမှုရာဇဝတ်တၞဟ်တၞဟ်ဂမၠိုင်ဂှ် လုတ်လောန်ဂၠိုင်ကၠုင်တုဲ ပွပန်ဗ္တိုက်ဂမၠိုင်ဂှ် စဵုကဵုတ္ၚဲဏံ အောန်စှေ်အာဟွံမွဲရောင် ဂွံတီကေတ်ရ။
ပ္ဍဲပန်ဗ္တိုက်ကဵုက္ၜင်ကျာဂှ်လေဝ် ဗ္တိုက်ဏာအလန်ပထမတုဲဂှ် စွံပွန်ကဵု ညးဂိုတ်ဂ္စာန်ဟံင်ပြာ် ကုညးဒးဘဲဝပ်တံတုဲ က္လေင်ဆက်ဗ္တိုက်မံင်ရောင် ညးဇမၞော် (IIMM) နဳကိုဝ်ဠာတ်ဃောန်ကျာန် ဟီုရ။
“ကၠုင်ဗ္တိုက်အလန်ဒုတိယဂှ်တှ်ေ ရန်ကဵုညးဗ္တိုက်ပၞာန်တံ ဟွံသေင်ပုဟ်။ ဗ္တိုက် ညးကၠုင်ဟံင်ပြာ် ညးဒးဘဲဝပ်ကဵု ညးဍုင်ကွာန်တံရ။ ဟိုတ်ဂှ်ရ အမှုဏံဂှ် သာတုဲဇၞော်ရ” သာ်ဝွံ ညးဟီုရ။
ဒပ်ပၞာန်တံဝွံ ပန်ဗ္တိုက်ကဵုက္ၜင်ကျာပၞာန်ဓမ္မတာဟွံသေင်မွဲသာ် ဟိုတ်နူစကာကၠုင် ပါရာမဝ်တာကဵု စက်ဗရုသာဲဂၠိုင်ကၠုင်ဂှ်ရ ဂွံစွံသတိကဵု ပရေင်ပန်ဗ္တိုက်ဂမၠိုင်ဂှ် ဝါတ်ဂါတ်ကၠုင်တုဲ သွက်ဂွံဂြိပ်တိတ် ဟွံသေင်မ္ဂး အခေါင်အရာ သွက်ဂွံအောပ်ဗ္ဒဂှ် အောန်စှေ်ကၠုင်ရ။
ဟိုတ်ဂှ်ရ သွက်အမှုရာဇဝတ်ဂမၠိုင်ဂှ်ဝွံ ညးတာလျိုင်တံ ညံင်ဂွံဒုင်လျိုင်ဂှ် နွံပၟိက်ဒၟံင်ဇၞော်ကဵုဇြဟတ်ရဂှ်လေဝ် လိက်ဒုင်စဳရေင်ဂှ် ဂးလဝ်ရ။
ပ္ဍဲသ္ကုတ်အဂၞဲကၟိန်ဍုင်ဗၟာဝွံ အပ္ဍဲပွိုင် (၆) ဂိတု၊ သၞာံ (၂၀၂၆) ဏံဂှ် ဒပ်ပၞာန်တံသၠုင်ပ္တိုန်အသိင်ဗ္တိုက်တုဲ ဘာဗ္တောန်လိက် (၈) မ၊ ဘာလကျာ် (၁၀) ဘာ၊ ဘာကျာ်ခရေတ် (၅) ဘာ ကေုာံ သ္ၚိဒၟံင်ဗွဲမဂၠိုင် လီုလာ်အာနွံရောင် ဂွံတီကေတ် နူတင်နင်စၟတ်သမ္တီ ဂကောံအခေါင်အရာမၞိဟ် သ္ကုတ်သၠုင်ကျာကၟိန်ဍုင်ဗၟာရ။
ဂကောံဒပ်ပၞာန်တံ လုတ်လောန်ဒုဟ်အမှုရာဇဝတ်ဂမၠိုင်ဂှ် နူကၟိန်ဍုင်နာနာတံ အကာဲအရာကဵုရီုဗင်မာန် ဟွံမွဲဒၟံင်ရဂှ်လေဝ် ဒါရိုက်တာ ဌာန်ဒတန်အခေါင်အရာမၞိဟ်ဍုင်မန် နာဲအဲမန် ဟီုသွဟ်လဝ်ကဵု ဌာန်ပရိုင်ဗၠးၜးမန် IMNA နွံရ။
“ကမၠောန်အလဵုအသဳပၞာန်တံဂှ် ကၟိန်ဍုင်နာနာတံ၊ အာဇြဳယာန်တံ ဟွံတီ ဟွံသေင်ပုဟ်။ တီမံင်ရ။ ဥပဒေတံဂှ် ပလီုမ္ၚးပေဲါသဳကၠဳ ဟွံဂွံပုဟ်။ ဒးကၠောန်ပ္ဍဲဥပဒေဟေင်ဏောင်။ NUG လေဝ် ဆေင်မုက်ကဵုဍေံတံ ဟွံမာန်ပုဟ်။ ကောန်ဍုင်အရင်ရပ်လွဟ်တံလေဝ် ဆေင်မုက်ကဵုဍေံတံ ဟွံမာန်ပုဟ်။ အကြာဂှ် ဒးဒုင်ကဵုဇြဟတ်ဓရိုဟ်ကဵုကြုက်နွံရ။ မိက်ဂွံဟီုဂှ်တှ်ေ ကၟိန်ဍုင်နာနာတံ ကဵုရီုဗင်ဟွံမာန်ပုဟ်။ ဇကုမိက်ဂွံဂွံတှ်ေ နဘာသာဇကု ဒးဂ္စာန်ဏောင်” သာ်ဝွံ ညးဟီုရ။
နကဵု IIMM ဝွံ အမှုရာဇဝတ်နူဒပ်ပၞာန်ဗၟာတံ လုတ်လောန်လဝ်ဒုဟ်ဂှ် ဆက်ဂၠိုက်ဂၠာဲစၟဳစၟတ်ဒၟံင်ဖိုဟ်တုဲ သက်သဳဂမၠိုင်ဂှ် ပလံင်ဗ္စိုပ်လဝ် ရုင်ဂဗုတ်ပၞာန် ကေုာံ ရုင်အာဂျေန်တဳဏာတေံတုဲ လိက်ဒုင်စဳရေင်ထပ်စၟဳစၟတ်သ္ၚဳဂၠိပ်ဂမၠိုင်ဂှ် ညးတာလျိုင်သၞောဝ်ဓဝ်တံ ကၠောန်ဒတုဲမံင်ရောင် ဓမံက်ထ္ၜးလဝ် ပ္ဍဲလိက်ဒုင်စဳရေင်ရ။
ပရေင်စၟဳစၟတ်ဂၠိုက်ဂၠာဲ IIMM ဏံဝွံ သၟာင်နူတင်နင်သက်သဳ ဟီုဓမံက်ပ္တိတ် (၇၅၀) ပြင်ဂှ် သီုတင်နင်ကလိဂွံ နူတမ်ရိုဟ်ဖအိုတ် (၁၆၀၀) ပြင်တုဲ ဒုင်လဝ်သဇိုင်ကဵု ဗီုရုပ်ဂမၠိုင်၊ ဝဳဒဳယိုဝ်ဂမၠိုင်၊ ရမျှာင်ဂမၠိုင်၊ လိက်စၟတ်သမ္တီဂမၠိုင်၊ ဗီုတိ၊ ဗီုဂြိုလ်တု (ဂြိုလ်ပရောတ်) ၊ သဝ်ယှေဝ်မဳဒဳယာ ကေုာံ လ္တူအမှု (မှုခင်းဆေးပညာ) ဂမၠိုင်ဂှ်ရောင် ဂးရ။