ပ္ဍဲအရာပ်သၞေဟ်ကွဳပၟတ်၊ ဍုင်လၟိုင်၊ တွဵုရးဍုင်မန်ဝွံ တ္ၚဲဏံ ဂိတုအဝ်ဂေတ် (၂၅) ၊ အခိင်နူဂယးဏံ ညးတြုံအဝဲလ္ဒောဝ် ဒဳကၠုင်ကွဳလိုန်ဓာတ်မွဲတၠဂှ် ထ္ၜးကဵုလွဟ်ဂၠေံတုဲ ပၠံင်ၜးကွဳစက် ဒဳတိတ်အာရောင် ဂွံတီကေတ်ရ။
ညးတြုံဒဳကၠုင်ကွဳလိုန်ဓာတ်မွဲတၠဂှ် လုပ်တေက်ဇီုဒးကွဳစက် ဒေံါလဝ်ဂတမုက်သ္ၚိတုဲ နူကဵုသၟာန် ညးဗြဴနွံပ္ဍဲကွဳစက် “ဒးကဵုၚုဟ်လေဲမူစိ” ဂှ် ထ္ၜးကဵုလွဟ်ဂၠေံတုဲ ကဵုစှ်ေနူလ္တူကွဳစက်ဂှ်ရ။
ညးဗြဴစှ်ေတုဲဂှ်မ္ဂး တိုန်အာလ္တူကွဳစက်တုဲ အခိင်ဒဳတိတ်အာဂှ် ကောန်ၚာ်မၞုံအပ္ဍဲကွဳစက်မွဲတၠဂှ်လေဝ် ပါအာကီုရောင် ညးစုက်လုက်ကဵု ဂကောံသ္ၚိကၟိန်ဂှ်မွဲတၠ ဟီုရ။
“ထ္ၜးလွဟ်တုဲတှ်ေ ပၠံင်ၜးဏာကာရ။ ကောန်ၚာ်ဂှ်လေဝ် ပါအာပ္ဍဲကာရ။ တုဲတှ်ေ ကောန်ၚာ်ဂှ်အာထောံလဝ် ဒၞာဲတၞဟ်ရ။ မၞိဟ်ဂှ် ၜိုတ်အဝဲဒေါဝ်နွံရ၊ ဓလဝ်လဝ်အထုပ်ကွဳလိုန်ဓာတ်၊ သီုတက်လဝ်ပဠောံဒၞာဗြဲရ။ ကွဳလိုန်ဓာတ်ဍေံဂှ် သှ်ေမံင်အဏံရ” သာ်ဝွံ ညးစုက်လုက်ကဵု သ္ၚိကၟိန်ဂှ် ဟီုရ။
ကောန်ၚာ်ဂှ်ဝွံ ထောံလဝ်ပ္ဍဲဒၞာဲဂၠံင်မွဲဒၞာဲတုဲ အခိင်လၟုဟ်ဏံ က္လေင်စိုပ်အာ ဇရေင်မိမယျရောင် ဂွံတီကေတ်ရ။
ကွဳစက် ဒးဒုင်ပၠံင်ၜးဏာဂှ်ဝွံ စၟတ်ယာဉ် 1R/7598 ၊ Ford EcoSport အရံင်လမ္စံက် မဒှ်တုဲ တၠကွဳစက်ဂှ် တေင်လဝ်ကဵု တမ်ဒပ် (ခလရ ၁၀၆) တုဲ ကၠောန်သ္ပဒၟံင် ပရေင်စၟဳစၟတ်ဂၠိုက်ဂၠာဲဖိုဟ်ရောင် ညးဆက်ဟီုရ။
“လၟုဟ်ဏံ တေင်လဝ်ကဵု (၁၀၆) ရ။ ကွဳလိုန်ဓာတ်ဍေံသှ်ေမံင်ဂှ်လေဝ် ကေတ်ဏာတုဲ ဂၠိုက်ဂၠာဲစၟဳစၟတ်မံင်ဖိုဟ်၊ ဗီုလဵုကၠုင်ဂှ် ဟွံတီပုဟ်။ ကာဂှ် ဟွံဆဵုဏီပုဟ်။ တိတ်အာဂၠံင်လဵု ဟွံတီပုဟ်” သာ်ဝွံ ဟီုရ။
ညးတြုံဒဳပၠံင်ၜးကေတ်ဏာကွဳစက်ဂှ် စွံလဝ်ကွဳလိုန်ဓာတ် ပ္ဍဲဂတမုက်သ္ၚိဂှ်တုဲ နူဂကောံကမ္မယှေန်ပၞာန်တံ ကၠုင်စိုပ်စၟဳစၟတ်မံင်ရဂှ်လေဝ် ဂွံတီကေတ်ရ။
စဵုကဵုအခိင်လၟုဟ်ဏံ ဂၠာဲကွဳစက်ဂှ် ဟွံဆဵုဏီတုဲ တိတ်အာဂၠံင်ဍာန်လဵုဂှ်လေဝ် ဟွံဂွံတီကေတ်ဏီရ။
ပ္ဍဲဍုင်လၟိုင်ဝွံ ကပေါတ်ကယျိုင်ကယျဝ်ထဝ် ပ္ဍဲဆေင်ကီု၊ ကွဳစက်ယာဉ်ကီု ဒးဒုင်ပၠံင်ၜးဒၟံင် မွဲနှေံမွဲနှေံနွံကီုလေဝ် ဂွံက္လေင်ရပ်စပ်ကေတ်အရေဝ်မာန်ဂှ် ဟွံမွဲကၠုင်ဏီရ။