ပ္ဍဲကဵုပွိုင်ဍုင်လ္ၚဵု တွဵုရးဍုင်မန်ဝွံ သွက်ဂွံဒ္ဂေတ်ဗက် အမိင်တိတ်ဗ္တံဟွံဂွံ ချိုတ်ချိုတ်ပၠိုတ်ပၠိုတ်ဂှ် ထပ်ကဵုလဝ်သတိတုဲ ပရေင်ရပ်စပ်ကဵု ပရေင်မၞိဟ်ကၠေံဂှ်လေဝ် နွံကၠုင်ဒၟံင်ရောင် ဂွံတီကေတ်ရ။
ပ္ဍဲပွိုင်ဍုင်ပံင်၊ ကျာ်မြဟ်၊ မုဟ်ဍုင်၊ ဇြပ်ဗု ကေုာံ ဒၞာဲလ္တူဍုင်ရေဝ်လ္ၚဵုတံဂှ် ဗွဲကြဴနူ (၉) နာဍဳဗ္တံတုဲ လ္ပတိတ်အာကၠုင်မ္ၚးကီု၊ ညးတြုံၜါတၠ လ္ပဍိုက်ကွဳလိုန်ဓာတ်မွဲစွံကီု၊ ညးဗြဴဒဳကွဳလိုန်ဓာတ်တုဲ ညးတြုံဍိုက်ဗက်ဟွံဂွံကီုဂှ် အပ္ဍဲဂိတုဂျူလာင်တုဲကၠုင်ဏံ နူဂကောံအုပ်ဓုပ်မဆေင်စပ်ဂမၠိုင်တံ ဗက်ကဵုလဝ်သတိရ။
ဗွဲကြဴနူကဵုသတိတုဲဂှ်မ္ဂး ဒပ်ပၞာန်၊ ဂကောံဒပ်ဗၠာဲသၟိင် ကေုာံ BGF တံ ပံင်ကောံတုဲ နကဵုဇြဟတ်ဗွဲမဂၠိုင် ကေတ်ဂီုကၠုင်အခိင်ဗ္တံကီု၊ ဂေင်ကင်ကီုဂှ် ကၠောန်သ္ပကၠုင်အဆက်ဆက်နွံရောင် ညးဒေသဍုင်ကၟာဝက်မွဲတၠ ဟီုရ။
“ရိုဟ်ဗ္တံ ဂေတ်ကင်ရ။ ဒပ်ပၞာန်၊ ဗၠာဲသၟိင်၊ BGF ဇြဟတ်ၜိုတ် (၁၅၀) နွံရ။ ညးတြုံၜါတၠ ဍိုက်ကွဳလိုန်ဓာတ်မွဲစွံ ဆဵုစုတ်တှ်ေ ဍေံတံရပ်တှ်ေလေဝ် ဒုဟ်ဟွံမွဲရပုဟ်။ ကဵုလဝ်သတိရ၊ အေကေတ် (အကွက်) ဂှ်ရ။ ဒဵုတ္ၚဲတေံ ညးဒးဒုင်ရပ်ဂှ် ၜိုတ် (၁၈) သၞာံဟေင်နွံရ။ ကွဳလိုန်ဓာတ်ဍေံမွဲဖ္ဍိုက် ပါအာရ” သာ်ဝွံ ညးဟီုရ။
ပွမဖံက်ပလီုအမိင်ဒေသန္တရဂးတုဲ သၟတ်ကၟာဝက် က္လေင်စဴကၠုင်နူၜှ်ပ္ကဴဒ္ဂိုန် မွဲဂကောံဂှ် ဒးဒုင်ရပ်တုဲ က္လေင်ဗၠးကၠုင်ကီု ဂးရ။
အပ္ဍဲသတ္တဟဒုတိယ ဂိတုဂျူလာင်တုဲကၠုင်ဏံဝွံ သၟတ်တြုံဒၟံင်တန်တဴမံင် ပ္ဍဲအရာပ်ဂုင်ညေန်တာန်မွဲတၠ အဃောက္လေင်စဴကၠုင်နူကမၠောန်ဂှ် ဟွံဂွံပရိုင်မွဲသာ် စဵုကဵုတ္ၚဲဏံ ကၠေံမံင်ဖိုဟ်ရဂှ်လေဝ် ဂွံတီကေတ်ရ။
ပွမလုပ်စိုပ်စၟဳစၟတ်စရင်ကၟုဲ ကေုာံ ပရေင်စၟဳစၟတ်ရပ်စပ်ဂမၠိုင်ဂှ် ကၠောန်သ္ပမံင် တေင်တေင်ဂြတ်ဂြတ်ရောင် ဂွံတီကေတ်ရ။
ညးဒေသရေဝ်မွဲတၠဂှ် “လ္တူဍုင်ရေဝ်ဂှ် လၟုဟ် ဒှ်အာ (၈) နာဍဳဗ္တံရ။ တက် (၈) နာဍဳဗက်တှ်ေ ကာပၞာန်တံဂေတ်တုဲ ရပ်မၞိဟ်ဖအိုတ်ရ။ ဒှ်သံသယတှ်ေ စၟဳစၟတ်စရင်ကၟုဲရ။ တက် (၈) နာဍဳတုဲ သ္ၚိဟွံကၟာတ်တြင်ဂှ်တှ်ေ ဒးဒုင်စၟဳစၟတ်သၟာန်သၟုက်ရ။ ညံင်ဟွံဂွံတိက်ပ္ဍဲကၠအ်ဂှ်လေဝ် ပ္တိတ်လဝ်အမိင်ရ” သာ်ဝွံ ညးဟီုရ။
အပ္ဍဲပွိုင်ဍုင်ပံင် ကေုာံ ပွိုင်ဍုင်သဓီု၊ ခရိုင်သဓီုဂှ်လေဝ် ဟိုတ်နူအမိင်ဒေသန္တရတုဲ ညးဒးဒုင်ရပ်ကေတ်အရေဝ်နွံဇၟာပ်တ္ၚဲကီု၊ ကဵုသြန်တုဲ က္လေင်နုက်ကေတ်ကီု နွံမံင်ရောင်ဂှ်လေဝ် ဂွံတီကေတ် နူညးဒေသတံရ။
အပ္ဍဲတွဵုရးဍုင်မန်ဝွံ သၟာင်နူပွိုင်ဍုင်ၜါသွာင် (တ္ကအ်ခၟိုင်) တုဲ သှ်ေ (၉) ပွိုင်ဍုင်တံဂှ် လလောင်ပ္တိတ်လဝ် အမိင်တိတ်ဗ္တံဟွံဂွံတုဲ မပ္တံကဵုပွိုင်ဍုင်ကျာ်ထဝ်၊ ၜဳက္လေင်၊ သဓီု၊ ပံင်တံဂှ်လေဝ် လလောင်ပ္တိတ်လဝ် အမိင်ဒေသန္တရဖိုဟ်ရောင် ဂွံတီကေတ်ရ။