ပ္ဍဲလ္တူဍုင်လှာဒကှ်၊ တွဵုရးကရေင်ဂှ်ဝွံ စနူဂိတုအဝ်ဂေတ် စၟတ်တ္ၚဲ (၁၁) ဏံတုဲ ဂကောံအုပ်ဓုပ်ကမ္မယှေန်ပၞာန်တံ ဖ္ဍိုန်ဖျေံ (ယှအ်ဖျေံ) လဝ် အမိင်တိတ်ဗ္တံဟွံဂွံညိညနွံရောင် ဂွံတီကေတ် နူညးဒေသတံရ။
အခိင်ကၠာတေံဝွံ အမိင်တိတ်ဗ္တံ စၟတ်လဝ် နူ (၆) နာဍဳသဝ်တ္ၚဲ စဵုကဵု (၆) နာဍဳဂယးဂှ် ရုပ်သီထောံတုဲ ပြံင်လှာဲဏာလဝ် နူ (၈) နာဍဳဗ္တံ စဵုကဵု (၅) နာဍဳဂယးရောင် ကောန်ဂကောံအုပ်ဓုပ်ဂမၠိုင်တံ ဗက်ဆဝ်မ္ၚုဟ်ဖ္တိုက်ဖၟောဝ်လဝ်ရဂှ် ညးဒေသဍုင်လှာဒကှ်မွဲတၠ ဟီုရ။
“ညးစဴကၠုင်နူသ္ၚောဲသ္ၚောဲတံကဵု ညးသွံရာန်ဖျာတံ ခက်ခုဲဂှ်ရ ယှအ်ဖျေံဏောင် ထေင်ကေတ်ရ။ တုဲတှ်ေ လ္ပာ်ဏံဂှ် ၜိုဟ်သြိုဟ်ကၠုင် နူအခိင်ကၠာတေံ ညိညရ။ စနူပေဲါဗ္တိုက်လေဝ်ဏး။ ဒှ်ပြဿနာလေဝ်အောန်ရ။ ဟိုတ်ဂှ်ရ ဒှ်မာန်ဏောင် ထေင်ကေတ်ရ” သာ်ဝွံ ဟီုရ။
ၜိုန်ဂှ်ကီုလေဝ် အကာဲအရာဒှ်ဓဝိင် ပရေင်ဂီုကၠီုကဵု အမိင်ဒးယိုက်ဂၠေင်ပၞာန် နွံမံင်ဖိုဟ်ဂှ်ရ ညးလ္တူဍုင်ဗွဲမဂၠိုင်တံဂှ် အာကၠုင်မံင်စံင်ဒၟံင် အတိုင်ဓမ္မတာ (ဗီုတြေံ) ဟေင်ရဂှ်လေဝ် ညးဆက်ဟီုရ။
တုဲပၠန် ဖျာဗ္တံကီု ကမၠောန်ညးကောံကလောံဂမၠိုင်ကီုဂှ် က္လေင်ကၠောန်သ္ပ အတိုင်ဓမ္မတာ (ဗီုတြေံ) ဟွံမာန်ဏီရ။
မွဲလ္ပာ်ပၠန်ဂှ်လေဝ် ဟိုတ်နူဖ္ဍိုန်ဖျေံ (ယှအ်ဖျေံ) လဝ် အခိင်တိတ်ဗ္တံဟွံဂွံဂှ်ရ သွက်ညးဒေသတံ မပ္တံကဵုပရေင်သွံရာန်၊ အာတရဴ ကေုာံ နူတရဴသ္ၚောဲဂွံက္လေင်စဴကၠုင်ဂှ် ပြေပြံင်ကၠုင်ညိညနွံရောင် သၟတ်ဒေသမွဲတၠ ဟီုရ။
“သွက်ညးသွံဖျာတံဂှ် ပြေပြံင်ကၠုင်ညိညရ။ သီုသွက်ညးအာတရဴသ္ၚောဲတံလေဝ်ဏး။ ကၠာတေံတှ်ေ ခက်ခုဲမံင်သီုဖအိုတ်ရ။ နူကဵုပ္တိတ်မာယှေဝ်လဝ်တုဲဂှ် ဖျာဗ္တံလေဝ် ဟွံမွဲရပုဟ်။ အလဵုလေဝ် သွက်ဂွံအာ ဟွံမွဲရပုဟ်လေဝ်” သာ်ဝွံ ညးဟီုရ။
အပ္ဍဲဂိတုဂျာန္နဝါရဳ၊ သၞာံ (၂၀၂၃) တုဲကၠုင်တေံဝွံ နူဂကောံကမ္မယှေန်ပၞာန်တံ သွက်ဂွံရေင်တၠုင် ပရေင်ဂီုကၠီု၊ ပရေင်သၞောဝ်ဥပဒေအုပ်လဒံ ကေုာံ တိဍာ်ဂွံၜိုဟ်သြိုဟ်သာယာမာန်ဂးတုဲ ပ္ဍဲပွိုင်ဍုင်ကအ်ကြိက် ကေုာံ လှာဒကှ်၊ တွဵုရးကရေင်ဂှ် လလောင်တြးအမိင် ပရေင်အုပ်ဓုပ်ပၞာန်တုဲ နူ (၆) နာဍဳသဝ်တ္ၚဲ စဵုကဵု (၆) နာဍဳဂယးဂှ် လလောင်ပ္တိတ်အမိင်တိတ်ဗ္တံဟွံဂွံရ။
ပ္ဍဲဒေသဗွဲမဂၠိုင် အခိင်ပရေင်ပၞာန်ကြံင်မ္ၚိုဟ်ဒၟံင်ကဵု သၠုင်မံင်အသိင် ပရေင်ရပ်စပ် သွက်ယိုက်ဂၠေင်ပၞာန်ဂှ်မ္ဂး လ္တူကမ္မယှေန်ပၞာန် ဖ္ဍိုန်ဖျေံ (ယှအ်ဖျေံ) အမိင်တိတ်ဗ္တံဟွံဂွံဏံ စွံသတိညိဂှ်လေဝ် ဂကောံဇြဟတ်ပၠန်ဂတးဂမၠိုင်တံ ကဵုလဝ်လညာတ်သမ္တီနွံရ။