ပ္ဍဲသ္ၚိဒၟံင် က္ဍိုပ်သ္ကိုပ်ပျူသဝ်ထဳ မၞုံအပ္ဍဲပွိုင်ဍုင် (ခမောက်ကြီး) ၊ ခရိုင်ကအ်သံင် ၊ ရးဒေသဇၞော်တၞင်သဳဂှ် သီဂွံလဝ် လွဟ်ကၠောန်ကဵုတဲကီု သီုမကမ် ကေုာံ ကပေါတ်ဆက်စပ်ဂမၠိုင်နွံရောင် ဒပ်စဵုဒၞာညးဍုင်ကွာန် ပွိုင်ဍုင်ကအ်သံင် ဟီုရ။
အတိုင်ဂွံလဝ်ပရိုင်မ္ဂး ပ္ဍဲဂိတုဂျူလာင် (၃၀) ဂှ် သ္ၚိဒၟံင်က္ဍိုပ်သ္ကိုပ်ပျူသဝ်ထဳ ကိုဝ်တိတ်ဥူ ပ္ဍဲကွာန် (နမ္မနွယ်)၊ ပွိုင်ဍုင် (ခမောက်ကြီး) ဂှ် ဂကောံဒပ်စဵုဒၞာညးဍုင်ကွာန် ၊ ပွိုင်ဍုင်ကအ်သံင် အာစိုပ်စၟဳစၟတ်တုဲ သီဂွံလဝ် ကပေါတ်လွဟ်လနက်ဂမၠိုင်ရောင် ညးတာလျိုင်ဂကောံမွဲတၠ ဟီုရ။
“ပိုဲတံ ဂွံပရိုင်တုဲ အာဂၠာဲရ။ ဠစိုပ်တေံဂှ် ကပေါတ်လွဟ်လနက်တံ၊ ကပေါတ်စကာတံဗွဲမဂၠိုင်ဂှ် ပါ်ဒၞာဲ ပၞုက်လဝ်ဂှ် ဂွံဆဵုကေတ်တုဲ သီနင်ရ။ ပ္ဍဲသ္ၚိဂှ်တှ်ေ ဂကောံသ္ၚိကၟိန်ညးတံနွံရ။ ပိုဲတံ မုဟွံပပုဟ်” သာ်ဝွံ ဟီုရ။
အပ္ဍဲကဵုသ္ၚိဒၟံင်ဂှ်ဝွံ ဖျေံကမ် M 16 (၂) ၊ ကမ် M 16 (၇၂) မ၊ ကမ် AK (၁၃) မ၊ ဖျေဲကမ် 9 mm (၁) ၊ လွဟ်တူမဳ (၁) ဇကိုအ်၊ လွဟ်ကၠောန် .22 (၁) မွဲဇကိုအ်၊ ကမ် .22 (၅၀) မ၊ ကၟာင်တဲ (လက်ထိပ်) (၃)၊ စက်ဆက်စၠောံ (၄) မ၊ ကယျိုင်ပၞာန် (၂၅) စုံ၊ ခပေဲ (၂၆) မကဵု ကပေါတ်ဆက်စပ်ဂမၠိုင်ဂှ် သီဂွံလဝ်ရ။
က္ဍိုပ်သ္ကိုပ်ပျူသဝ်ထဳ ကိုဝ်တိတ်ဥူဂှ်ဝွံ တုဲကၠုင် (၉) ဂိတုပြင်တေံရ ဂကောံဒပ်စဵုဒၞာညးဍုင်ကွာန် ပွိုင်ဍုင်ကအ်သံင် ပန်ပသောင်ဏာလဝ်တုဲ ချိုတ်အာလဝ်ရောင် ဂွံတီကေတ်ရ။
ပ္ဍဲသၞာံ (၂၀၂၅) ၊ ဂိတုအံက်တဝ်ဗာဂှ် ဂကောံဒပ်ပၠန်ဂတးတံ ရပ်ဏာ က္ဍိုပ်သ္ကိုပ်ပျူသဝ်ထဳ ကိုဝ်တိတ်ဥူတုဲ အဃောကော်ဖျဴနင် ဇရေင်တမ်ဒပ်ဂှ် ညးက္လေင်ပၠန်တဝ်စၞေဟ်ဂှ်ရ ဒးပန်ပသောင်ဏာရဂှ်လေဝ် လ္ပာ်ဂကောံဒပ်စဵုဒၞာညးဍုင်ကွာန်တံ ဟီုရ။
ဂကောံဒပ်စဵုဒၞာညးဍုင်ကွာန် ပွိုင်ဍုင်ကအ်သံင်ဝွံ ဓမံက်ဒၟံင်ပေဲါဗ္တိုက် ကုဒပ်ကမ္မယှေန်ပၞာန် အပ္ဍဲခရိုင်ကအ်သံင် မွဲနှေံမွဲနှေံတုဲ ကုက္ဍိုပ်သ္ကိုပ်ပျူသဝ်ထဳ မၞုံသၟဝ်တဲဒပ်ပၞာန်၊ သ္ကိုပ်အုပ်ဓုပ် ကေုာံ ဂိုဏ်ဂဥုဲၜူမာဲဂမၠိုင်ဂှ် အတိုင်ပရေင်ပၞာန် ကၠောန်သ္ပကေတ်မံင်အရေဝ်နွံဂှ်လေဝ် ဂွံတီကေတ်ရ။