ဒၞာဲဒေသပယဵု ကၟိန်ဍုင် သေံ-ဗၟာ လ္တူဍုင်ကျာ်ပိဂှ် စနူဂိတုအဝ်ဂါတ် သတ္တဟဒုတိယတုဲ ကလေင်ရပ်စကာ လာင်ဖုင်၊ အေန်တာနေတ် Atom, Mytel တအ်ဂွံကၠုင်ဂှ် ဂွံတီကေတ် နူညးဒေသကျာ်ပိတအ်ရ။
အေန်တာနေတ်တအ်ဂှ် စဵုကဵု 4G လာင်ခိုဟ်မံင်တုဲ ဟွံဒးသ္ပပဓါန်ကဵု WiFi သွံတြးပ္တိတ်နူ starlinks တအ်မွဲသာ် ပရေင်ဆက်စၠောံ ပြဟ်ပြေဟ်ကၠုင်မံင်နွံရောင် ညးဒေသကျာ်ပိတအ်သ္ဂးရ။
“ဝေင်လာင်ကဵုတေဝ်လဳနဝ် ဟွံဂွံကဵုသၞာံရဏောင်။ ဆဂး ဆက်ဖုင်ဂွံမံင်။ လ္တူဍုင်တှ်ေ တောဲလဝ် starlinks တုဲ ဍေံကဵုမံင် WiFi။ လၟုဟ်ကလေင်ဂွံ အေန်တာနေတ်ယျတှ်ေ ကၠောန်ကမၠောန်ပြေပြံင်ကၠုင် တၟာဂလိုင်” သာ်ဝွံ တၠဆေင်ဖုင်ဍုင်ကျာ်ပိမွဲတၠ ဟီုရ။
လာင်အေန်တာနေတ် Atom ခိုဟ်ဂၠိုင်တုဲ ပြဟ်ဟ်ဏံ ပ္ဍဲဆေင်ဖုင်ဍုင်ကျာ်ပိဂှ် ညးကၠုင်ရာန် တၞးသေန်ကာတ် Atom ဂၠိုင်ဂှ်လေဝ် ညးဆက်ဟီုရ။
မွဲလပါ်ဂှ်လေဝ် ရန်ကဵုကမၠောန်ကျာဖျ ၜက်ၜေတ်မံင် ပ္ဍဲဒေသကျာ်ပိတအ် ဂွံပြေပြံင်တုဲ နအလဵုအသဳဒပ်ပၞာန်တအ် ပံက်လဝ်ဟာဂှ်လေဝ် ညးဒေသတအ် ဒှ်မံင်သံသယရ။
“ညအ်လေဝ် ဟိုတ်နူ starlinks တအ် ဒးဒုင်ကၟာတ်တုဲ ဍေံတအ်မိက်ဂွံကဵုကြုက်တအ် ပြေပြံင်တုဲ ဍေံကလေင်ကဵု အေန်တာနေတ်လေဝ်။ ဍေံ(ကြုက်)တအ် ကလေင်သုင်စောဲ လာင် Atom ကဵု Mytel ယျ။ သုင်စောဲမံင် ဂွံၜိုတ်ကဝက်ဂိတုရဏောင်” သာ်ဏံလေဝ် မၞိဟ်တြုံ ညးဒေသဍုင်ကျာ်ပိမွဲတၠ ဟီုပါ်ပါဲရ။
ၜိုန်ရဍုင်ကျာ်ပိ ရပ်စကာအေန်တာနေတ် 4G ဂွံကီုလေဝ် ဒၞာဲအရာပ်တိသဝ်လ္ၚဵုတအ်ဂှ် ဆက်ဖုင်သၟးရဂွံတုဲ ဒၞာဲလ္ၚဵုဂှ် ဟွံဂွံလာင်ဏီလေဝ် နွံရ။
ဆဗၞတ်လ္တူဍုင်ဟေင် ဂွံအေန်တာနေတ်ခိုဟ်ဟ်မာန်တုဲ သွက်ညးဒေသ နွံပ္ဍဲအရာပ်တိသဝ်တအ်ဂှ် ဒးပဓာန်မံင် WiFi နူ Starlinks တအ်ဖိုဟ်ဏောင် ညးဒေသတအ်ဟီုရ။
ပရေင်အေန်တာနေတ်ပိုတ်ဂှ် ညးဒေသတအ် ဆဵုဂဗမံင် မွဲဏှေံမွဲဏှေံတုဲ အခိင်ကလေင်ဂွံဏံလေဝ် ဂွံလအ်အ်မာန်ဟာဂှ် ဒးမင်ဗဵုအာရောင် ပရေင်ဟီုဂးထေင်ခယျတအ် တိတ်ကၠုင်နူညးဒေသတအ်ကီုရ။
သွက်သ္ဂောံသောင်သအးထောံ ကမၠောန်လီဠာန်သြန် လ္တူဍုင်ကျာ်ပိတုဲ ပ္ဍဲသၞာံ (၂၀၂၅) ဂိတုဖေဖဝ်ဝါရဳတုဲကၠုင်တေံဂှ် လ္ပာ်ဍုင်သေံတအ် ထပိုတ်ထောံပၟတ်၊ ကၠေင် ကေုာံ အေန်တာနေတ်တုဲ ညးဒေသတအ် ဒှ်ကၠုင်ခက်ခုဲကဵု ပရေင်ဆက်စၠောံရ။
တုဲပၠန် ဂိတုမာတ်ဂှ်လေဝ် သေန်ကာတ်ဍုင်ဗၟာ ATOM တအ် သုင်စောဲ အေန်တာနေတ်ဟွံဂွံကီုတုဲ လာင်ဖုင်တအ်ဂှ် ဒၞာဲလ္ၚဵုဂွံ၊ ဒၞာဲလ္ၚဵုဟွံဂွံ နွံမံင်ရ။