ပ္ဍဲကွာန်မဆက်စပ်မံင် တွဵုရးဍုင်မန်ကဵု ကရေင်လ္ၚဵုဂှ်ဝွံ လၟေင်ကမၠောန် ဂကောံရပ်လွဟ်အပ္ဍဲဒေသတံ ရပ်စပ်ကေတ်အရေဝ်ကဵု ဂဥုဲၜူမာဲဂမၠိုင် ဟွံကၠးဖ္ဍးပိုတ်သ္ကုတ်ဂှ်ရ ညးဒေသတံ ဒှ်မံင်ဂဝိင်ရောင် ဂွံတီကေတ်ရ။
ဗွဲတၟေင်မ္ဂး ပ္ဍဲကွာန်မွဲဒမြိပ်ၜဳဂြာင်ဂှ်ဝွံ လၟေင်ကမၠောန်ရပ်စပ် ဆေင်စပ်ကဵုဂဥုဲၜူမာဲဂမၠိုင်ဂှ် ဂကောံရပ်လွဟ်အပ္ဍဲဒေသတံ ကၠောန်သ္ပမံင်အဆက်ဆက်တုဲ ပွမကော်စၟဳစၟတ် ညးဒှ်သံသယဂမၠိုင်ကဵု ပရေင်ရပ်စပ်ဂမၠိုင်ဂှ် သၠုင်ပ္တိုန်လဝ်အသိင်နွံရ။
ညးဒးဒုင်ရပ်လ္ၚဵုတံဂှ် ကဵုသြန်တုဲ က္လေင်ဗၠးကၠုင်နွံကီုလေဝ် ညးလ္ၚဵုဂှ် ဟွံဂွံဆက်စၠောံကဵု ဂကောံသ္ၚိကၟိန်မွဲသာ်ဏီ ဒးဒုင်ထိင်ဒဝ်လဝ် ပ္ဍဲတမ်ဒပ်မဆေင်စပ် ဗွဲမလအ်ကီု ဒးဒုင်ပကောံပကေဝ်ယိုက်ဂၠေင်ပၞာန်ကီုနွံရ။
ဟိုတ်ဂှ်ရ ဂကောံရပ်လွဟ်အပ္ဍဲဒေသတံဝွံ နကဵုသက်သဳခိုင်ခိုင် ညံင်ဂွံရပ်ညးဒှ်သံသယတံကီု၊ သၟတ်ဒးဒုင်ရပ်လဝ်ဂမၠိုင်တံဂှ်လေဝ် နကဵုဗဗွဲဓဝ် ကေတ်အရေဝ်ကဵုဒုဟ်ဒဏ် ညံင်ဂွံစိုပ်တရဴကီု၊ ညံင်ဂွံကဵုပရိုင်/ပလံင်ပရိုင် ဇရေင်မိမ၊ ညးထိင်ဒဝ်တံကီုဂှ် နွံပၟိက်ဒၟံင်ရောင် ညးတြုံဒေသၜဳဂြာင်မွဲတၠ ဟီုရ။
“ရပ်ဂဥုဲၜူမာဲဂှ် ခိုဟ်မံင်ရ။ ဆဂး ရပ်စပ် နကဵုတင်နင်ထေက်ရ။ ၜိုတ်ဒှ်သံသယဂှ် ကော်ဏာတုဲ စၟဳစၟတ်ဂှ်တှ်ေ ဒှ်ဟွံထေက်ပုဟ်။ ကေတ်အရေဝ်ကဵု ညးတြးသွံရာန်ဇေတ်ဇေတ်တံဂှ် ကိစ္စဟွံမွဲကီုလေဝ် ကေတ်အရေဝ် သ္ကာတ်သ္ကာတ်မြဟ်မြဟ်ကဵု သၟတ်သုင်စောဲတံဂှ်တှ်ေ ဟွံထေက်ကြိုက်ပုဟ်” သာ်ဝွံ ညးဟီုရ။
အပ္ဍဲဂိတုဂျူလာင်တုဲကၠုင်ဏံဝွံ သၟတ်ဒှ်သံသယ ဆက်စပ်မံင်ကဵု ကိစ္စဂဥုဲၜူမာဲ နူကွာန်ကြေဝ်ဏာ၊ ကအ်ကတဝ်(ကော့ကသော်) ဟွံအောန်နူ (၁၀) တၠဂှ် ရပ်ဏာတုဲ ထိင်ဒဝ်လဝ်ရောင် ဂွံတီကေတ်ရ။
ဟိုတ်နူရပ်စပ်တုဲ ပရေင်သွံရာန်သုင်စောဲဂဥုဲၜူမာဲ အပ္ဍဲဒေသအောန်စှ်ေရောင် ပတှ်ေကေတ်လဝ်ကီုလေဝ် လ္တူကိစ္စစဳရေင်သၞောဝ်ဓဝ်ဂှ် ဒးဒှ်မံင်ဂဝိင်ရဂှ်လေဝ် ညးဒေသ နူကွာန်ရပ်စပ်မံင်ဂဥုဲၜူမာဲမွဲတၠဂှ် ဟီုရ။
“ညးဒးဒုင်ရပ်သီုဖအိုတ်တံဂှ် သက်သဳနွံကီုဒှ်၊ ဟွံမွဲကီုဒှ် ဒးဒုင်ဒုဟ်ဒဏ်ဟေင်ရ။ လ္ၚဵုဂှ်တှ်ေ ကဵုပကောန်ပၞာန် ပ္ဍဲတမ်ဒပ်ဂှ်လေဝ်နွံရ။ ကဵုတိုန်တန်ဗ္တောန်ပၞာန်လေဝ်နွံရ။ ဒဵုကဵုဂလိုင်ဏံ ဒှ်ဟွံထေက်ပုဟ်ဏး။ ညအ်ဂှ်တှ်ေ ဗဗွဲဓဝ်ဟွံမွဲမံင်ပုဟ်” သာ်ဝွံ ညးဟီုရ။
ကွာန်မၞုံပွဳဗွိုင်ပယျဵု တွဵုရးဍုင်မန်ကဵု ကရေင်လ္ၚဵုတံဂှ် နွံဒၟံင်သၟဝ်ပရေင်ထိင်ဒဝ် ဒပ်မန်ရာမည RMA ၊ ဒပ်ကရေင် DKBA ၊ ဒပ်ပၞာန်ဗၠးၜးကရေင် (KNLA/KNU) တံရောင် ဂွံတီကေတ်ရ။
ပ္ဍဲဂိတုအေဗရဴတုဲကၠုင်ဏံဝွံ ညးလဵုမွဲဟွံဟီု ပွမဂိုင်ဒေပ်လဝ်ဂဥုဲၜူမာဲကီု၊ သွံရာန်ကီု ဒုဟ်ဒဏ်မံက်ကၠးဖ္ဍးမ္ဂး ကေတ်အရေဝ်ကဵုဒုဟ်ဒဏ်ထံင် စဵုကဵု ပွိုင် (၃) သၞာံရောင် နူဗျူဟာကောပ်ကာဲ (၂) ၊ DKBA ဒေါန (လ္ပာ်ပလိုတ်) စၟတ် (၂) လလောင်ပ္တိတ်လဝ်ရ။