ပေဲါထ္ၜးပျး စၞစအခိုက်ကၞာမန် ကေုာံ ပရေင်သၠုင်ပ္တိုန်ကမၠောန်အာတရဴဒေသဂှ်ဝွံ ဌာနက္ဍိုက်က္ဍိုပ်ဖောအ်ဗြေဝ်ဒေသ၊ ဂကောံသုတေသန၊ မိမညးဒေသဂမၠိုင်ကဵု ကျာ်ဇၞော်နွံပိုန်ဘာတံ ပံင်ကောံတုဲ ကၠောန်ဗဒှ်ဏာလဝ် ပွိုင် (၂) တ္ၚဲ၊ ပ္ဍဲဘာကျာ်ဇၞော် ကွာန်အံင်ဓိ၊ ခရိုင်ဓံင်ဖာဘောမ်၊ တွဵုရးကာန်ချဏၝုရဳ (ကမ္မရဳ) ဂှ်နွံရောင် ဂွံတီကေတ်ရ။
ပေဲါထ္ၜးပျး သွက်ဂွံသၠုင်ပ္တိုန်ကမၠောန်အာတရဴဒေသ ကေုာံ သွက်ဂွံဓမံက်ထ္ၜး ပရူပရာဝင် ပွဳဗွိုင်ညးဒေသမန်၊ ဗီုပြင်မံင်စံင်၊ အခိုက်ကၞာယေန်သၞာင်၊ ကွတ်ပညာအခိုက်ကၞာ (ပြဝေဏဳ) ၊ လက္ချန်အခိုက်ကၞာပိုင်ပြဳဂမၠိုင်ဂှ်ဝွံ ကၠောန်ဗဒှ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၂၊ ၁၃) ၊ အပ္ဍဲခရိုင်ဓံင်ဖာဘောမ်၊ ကၟိန်ဍုင်သေံရ။
နူဂကောံသုတေသန၊ တက္ကသဵုၜင်ကံက် မကၠောန်သ္ပမံင်သုတေသန စၞစသုင်မန် အကြာပွဳဗွိုင်ဒေသဓံင်ဖာဘောမ် အာတ်မိက်သြန်ဘဏ္ဍာ ဇရေင်အလဵုအသဳမွဲတဆံင်ဂှ် ဒှ်ကၠုင်ပေဲါထ္ၜးပျးရောင် အ္စာသုတေသနမန် က္ဍိုက်က္ဍိုပ်ကၠောန်ဗဒှ် ပေဲါထ္ၜးပျးမွဲတၠဂှ် ဟီုရ။
“သွက်ဂွံပသုတေသန စၞစမန် နွံပ္ဍဲကွာန်မန်နာနာဂှ် ပိုဲတံအာတ် scholarship နူတက္ကသဵုမွဲတဆံင်ရ။ တုဲတှ်ေ သွက်ဂွံဒှ်လိက်အုပ်ဂှ် ဂကောံအလဵုအသဳ ကဵုဗာတ်ဂျိတ်ရ။ နူဂှ်မွဲတဆံင် ဂွံကၠောန်ပေဲါထ္ၜးပျး လိက်အုပ်ကီု၊ ဂွံထ္ၜး ဆေင်စပ်ကဵု အခိုက်ကၞာယေန်သၞာင်ကီုဂှ် ရုဲစှ်ဏာ ကွာန်အံင်ဓိရ” သာ်ဝွံ ညးဟီုရ။
ပ္ဍဲကဵုပေဲါထ္ၜးပျးဂှ်ဝွံ သၟာင်နူသောင်ကလးလိက်သုတေသန စၞစအခိုက်ကၞာမန် နူဂကောံသုတေသန မပကောံပကေဝ်လဝ်ဂှ်တုဲ မပ္တံစၞစဝေင် အခိုက်ကၞာမန်ဂမၠိုင်၊ အခိုက်ကၞာလှ်ေဂမၠိုင် ကေုာံ အခိုက်ကၞာပူဇဴလှ်ေကလော်ဂမၠိုင်ကီု ထ္ၜးပျးဏာကီုရ။
ညးတာလျိုင် ဌာနက္ဍိုက်က္ဍိုပ်ဖောအ်ဗြေဝ်ဒေသဓံင်ဖာဘောမ် ကေုာံ ဂကောံအုပ်ဓုပ်ခရိုင်တံ တိုန်စုိုပ်တုဲ ပံက်လဝ်ကဵု အသေအဟာန် ပေဲါထ္ၜးပျးဂှ်နွံရဂှ်လေဝ် ဂွံတီကေတ်ရ။
ပ္ဍဲကဵုပေဲါထ္ၜးပျးဂှ်ဝွံ ကွာင်ၜဲယိုဟ်ၜန်စၞစဝေင်မန်ဂမၠိုင် မပ္တံကဵုကွာင်မပၞဟ်၊၊ ကွာင်ခၞံ၊ ကွာင်(ဘိန်းမုန့်) ၊ ခပေင်၊ ခၞာစာတ်၊ ကဝေက်က္ဍိုပ်ကၠိက် ကေုာံ ကွာင်တၞဟ်ဂမၠိုင်ဂှ်လေဝ် ကၠောန်ထ္ၜးပျးကဵုနတဲတုဲ သီုဒုင်တၠုင်ဗ္စဖျုင် ကုညးဇမၞော်အုပ်ဓုပ် တိုန်စိုပ်ကၠုင်ဂမၠိုင်ကဵု ညးဒေသတံကီုရောင် ဂွံတီကေတ်ရ။
ပေဲါထ္ၜးပျးဂှ်ဝွံ ညးဒေသကွာန်အံင်ဓိကဵု ညးဒေသမၞုံအကြာပွဳဗွိုင်ဂမၠိုင်တံ ကၠောန်ဗဒှ်ဏာ သီုစိုတ်သီုစရိုတ်တုဲ ပ္ဍဲကဵုကဏ္ဍလဟိင်စိုတ်ဂှ်လေဝ် နူကဵုဌာန်ဒတန်ယေန်သၞာင်မန် ကွာန်ဝင်္ကတံ ဘိုင်ဗပေင်လဝ်ဇြဟတ် နကဵုကွိင်ကွိုက်တူရိယာမန်ကီုရ။
နကဵုဌာနက္ဍိုက်က္ဍိုပ်ဖောအ်ဗြေဝ်ဒေသဓံင်ဖာဘောမ်တံဝွံ ရီုဗင်ကဵုအာဇြဟတ် ပ္ဍဲအရာဆက်ထိင်ဒဝ်သၠုင်ပ္တိုန် အခိုက်ကၞာယေန်သၞာင်ညးဒေသ၊ ကွတ်ပညာ (အနုပညာ) ကေုာံ အခိုက်အလေံဂမၠိုင်တုဲ ပ္ဍဲကဵုပရေင်ဖောအ်ဗြေဝ်တောတက် ကမၠောန်အာတရဴ သ္ပသဇိုင်ဒေသဂှ်လေဝ် ပရေင်ညးဍုင်ကွာန်ပံင်ကောံပါလုပ်ဂှ် ဓမံက်ရုပ်ရဴသၠုင်ပ္တိုန်အာရောင် လလောင်ပ္တိတ်လဝ် ပ္ဍဲမုက်လိက်ပရေင်မၞိဟ်မွဲတဆံင်ရ။