လဂွံကဵုအသိင်အလိုန်ပရေင်ဍုင်ကွာန် ပရေင်ပၞာန်ဂှ်တုဲ သၞာံဏံ ပဵုတုဲ ဂၠာဲကောန်ကမၠောန်ခွါတ်ထၜိုတ်ဝါတ်တိုန်ကၠုင်နွံရောင် တၠကၠအ်ဗွဲမဂၠိုင်တအ် ဟီုကရောတ်ရ။
ခြာဟွံလအ်ဏံမ္ဂး စိုပ်ကၠုင်အခိင်ခွါတ်ထၜိုတ်ကီုလေဝ် ကၠအ်ထၜိုတ်ဗွဲမဂၠိုင်ဂှ် ထုဲထံင်ဒၟံင်ကဵု ပရေင်ဂၠာဲကောန်ကမၠောန်ခွါတ်ထၜိုတ်ဂှ်ဖိုဟ်ရောင် တၠကၠအ်နူပွိုင်ဍုင်ဇြပ်ဗုမွဲတၠ ဟီုရ။
“ကၠအ်ဂွံလဝ်ကောန်ကမၠောန်တအ်ဂှ်တှ်ေ ပလေဝ်စ အရင်ဂွံခွါတ်ထၜိုတ်အိုတ်ရ၊ ကၠအ်ပိုဲမွဲရဲ ဂၠာဲကောန်ကမၠောန် ခွါတ်ထၜိုတ်ဟွံဂွံဏီဖိုဟ်၊ ဗီုကၠအ်ပိုဲကီု ကၠအ်အကြာပိုဲလေဝ် ကျာတ်မံင်ကဵု ကောန်ကမၠောန်ဖိုဟ်၊ ကဵုပရေင်ဍုင်ကွာန် ပရေင်ပၞာန်ဏံဂှ် သၞာံဏံ ဂွံမံင်ကောန်ကမၠောန်ညိဏီဟာ” သာ်ဝွံ တၠကၠအ်ဂှ် ပတိတ်တင်သၟာန်ရ။
ပရေင်ကမၠောန်ကၠအ်ထၜိုတ်ဂှ် လၟေင်သၞာံစိုပ်ကၠုင်ဂိတုဘတ်၊ ဝှ်မ္ဂး ပလေဝ်ပလေတ်စ သွက်ဂွံခွါတ်ထၜိုတ်တုဲ သၟာကမၠောန်ခွါတ်ထၜိုတ်ညးကဵုညးဂှ် ဂွံလဝ်ဒၞာဲနွံကီုလေဝ် ကၠအ်ဗွဲမဂၠိုင်ဂှ် ဒဵုလၟုဟ် ဂၠာဲကောန်ကမၠောန်ခွါတ်ထၜိုတ် ဟွံဂွံဏီ နွံဂၠိုင်ရ။
လတူဂၠာဲကောန်ကမၠောန်ခွါတ်ထၜိုတ်ဝါတ်ကျာတ်ဏံဂှ် တၠကၠအ်နူပွိုင်ဍုင်မုဟ်ဍုင်မွဲတၠ ဟီုသာ်ဝွံပၠန်ရ။
“သၞာံဏံဂှ် ပရိုင်ဗက်ရပ်မံင်သၟတ်တအ် သ္ပကောန်ပၞာန်ဂှ် ပရိုင်ကာတ်မံင် နူအရိုဟ်ဟ်သၞာံဏီ၊ တုဲတှ်ေ သၞာံတုဲတုဲကၠုင်တေံတှ်ေ ဍုင်မန်သကုတ်လ္ပာ်လတူတေံသၟးရ မိင်မံင်ဂၠိုင်၊ လၟုဟ်ဏံဂှ် ဒေသဍုင်မန် သကုတ်မတ်မလီု၊ မုဟ်ဍုင်၊ ဇြပ်ဗု မိင်ဂၠိုင်တိုန်၊ ဒေသပိုဲဏံ ပရေင်ဂၠာဲကောန်ကမၠောန်ဝါတ်ဂှ် ဒှ်ကၠုင်ၜါပိသၞာံတေံရ၊ ဆဂး သၞာံဏံဂှ် ပဵုတုဲ ဂၠာဲကျာတ်တိုန် နူသၞာံတုဲတုဲတေံဏီ” ညးဟီုရ။
သၟာကမၠောန်ခွါတ်ထၜိုတ်ပ္ဍဲဍုင်မန်ဂှ် ပရေင်ပါ်ပရအ် အကြာသၟာကမၠောန်ကဵု တၠကမၠောန်ဂှ် နူကဵု ကဵုၚုဟ်လိင်ဂိတုဂှ် ဒၟာနူဂၠာဲကောန်ကမၠောန် ဝါတ်ကျာတ်တိုန်ဂှ်တုဲ ပရေင်ပါ်ပရအ်ကဝက် ဒှ်ကၠုင်ဂၠိုင်ရ။
အကြာသၟာကမၠောန်ကဵု တၠကမၠောန်ဂှ် ၜိုန်ရပရေင်ပါ်ပရအ်ကဝက် ဒှ်ကၠုင်ကီုလေဝ် နကဵုအသိင်ပရေင်ဍုင်ကွာန်၊ ပရေင်ပၞာန်ဂှ်တုဲ ပြသၞာဂၠာဲကောန်ကမၠောန်ဝါတ်ကျာတ်ဂှ် တၠကၠအ်ထၜိုတ်ဂမၠိုင်တအ် ဒးဆဵုဂဗဒၟံင် အရိုဟ်ရိုဟ်သၞာံရ။