ဟိုတ်နူညးဍုင်ကွာန်မန် အပ္ဍဲဍုင်၊ ဍုင်မ္ၚးဂမၠိုင် ကဵုဇြဟတ်တုဲ စပ္တံနူပံက်သွံတၞးမာဲရာမညတုဲ စဵုကဵုကြပ်ပွိုင် (၂) သၞာံဏံ တၞးမာဲရာမည သွံခိုဟ်ဒၟံင်ဖိုဟ်ရောင် အတိုင်ကမ္မတဳမာဲတံ ဟီုဂးလဝ်ဂှ် ဂွံတီကေတ်ရ။
နကဵုညးတာလျိုင်က္ဍိုပ်သ္ကိုပ်ဗော်ဍုင်မန်တၟိ (NMSP) တံ က္ဍိုက်က္ဍိုပ်စဳဇန်တုဲ တၞးမာဲရာညမ စပံက်သွံကၠုင်လဝ်ကဵု ညးဍုင်ကွာန်တံ ပ္ဍဲဂိတုနဝ်ဝေမ်ဗာ၊ သၞာံ (၂၀၂၄) တုဲကၠုင်တေံဂှ်ဝွံ ပ္ဍဲသၞာံ (၂၀၂၆) ၊ ဂိတုနဝ်ဝေမ်ဗာ (၂) တေံမ္ဂး ပေင်ကၠုင်ပွိုင် (၂) သၞာံရောင် ဂွံတီကေတ်ရ။
မွဲလၟေင်မာဲရာမညဂှ် သွံတိတ်ဒၟံင် စဵုကဵုကြပ် (၈) ဠက်တၞးမာဲနွံတုဲ အတိုင်ပကတိ ဆက်ဂေတ်အာမံင်ဖိုဟ်ရောင်ဂှ်လေဝ် ကမ္မတဳတၞးမာဲရာမညမွဲတၠ ဟီုရ။
“ဟိုတ်နူညးဍုင်ကွာန်မန်တံ ဇြဟတ်ပံင်ကောံပါလုပ်ခိုဟ်ဂှ်ရ လၟိဟ်သွံတၞးမာဲ ဟွံစှ်ေအာပုဟ်။ အတိုင်ပကတိဟေင် သွံခိုဟ်မံင်ရ။ တၞးမာဲဂှ်တှ်ေ ပ္ဍဲဒေသမန်နာနာကီု၊ ပ္ဍဲဍုင်သၟာင်တှ်ေ စွံလဝ်ညးစၞးတုဲ သွံကဵုမံင်ရ” သာ်ဝွံ ညးဟီုရ။
နကဵုညးမိက်ဂွံကဵုဇြဟတ်အပ္ဍဲဍုင်တံဝွံ တၞးမာဲဂမၠိုင်ဂှ် သၟာင်နူဗလးတိ (offline) တုဲ သွက်ညးမိက်ဂွံကဵုဇြဟတ် နူဍုင်သၟာင်တေံလေဝ် နကဵုတၞးမာဲဒဳဂျဳတေဝ် (စၟတ်တဲဒဳဂျဳတေဝ်) ဂှ် (၂) ဂိတုမွဲဝါ ပံက်သွံကဵုဒၟံင်ရ။
လာဘ်ဂမၠိုင်ဂှ်ဝွံ လာဘ်ပထမ (၃၀၀) ကိုဋ်ဒကေဝ်၊ ဒုတိယ (၁၀၀) ကိုဋ်၊ တတိယ (၃၀) ကိုဋ်၊ စတုတ္ထ (၂၀) ကိုဋ် (၁၀ – လာဘ်) ကေုာံ လာဘ်ပဥ္စမ (၁၀) ကိုဋ်ဒကေဝ် (၃၀) လာဘ် စၟတ်လဝ်နွံရ။
ပရဲပရင်ကလိဂွံ နူမာဲရာမညဏံဝွံ စကာလဝ် သွက်လၟေင်ကမၠောန်ဖောအ်ဗြေဝ်ဒေသမန် နွံရဂှ်လေဝ် ကမ္မတဳလ္တူဂှ် ထပ်ဟီုရ။
“လှုဲဘဏ္ဍာပရဲ ဂွံနင်နူမာဲရာမညဂှ်တှ်ေ ပ္ဍဲကဵုလၟေင်ကမၠောန်ဟံင်ပြာ်ရီုဗင်၊ ပရေင်ဂီုကၠီု၊ ပရေင်ဖောအ်ဗြေဝ်၊ ပရေင်ထတ်ယုက်၊ ပရေင်ပညာ ဒေသမန်ဂှ် နကဵုဗော်ဍုင်မန်တၟိဍိုက်ဍိုပ်တုဲ သွက်ဂွံဆက်ရီုဗင်/ထံက်ပင်အာ နလၟေင်ကဏ္ဍဂှ် စဳဇန်လဝ်နွံဏီရ” သာ်ဝွံ ဟီုရ။
အပ္ဍဲသၞာံ (၂၀၂၅) တုဲကၠုင်ဏံဝွံ ပရဲပရင်ကလိဂွံ နူမာဲရာမညဂမၠိုင်ဂှ် သွက်သြန်ထံက်ပင်လၟေင်ဂိတု အ္စာ၊ အ္စာၝောံ ကဏ္ဍပရေင်ပညာကောန်ဂကူမန်ကီု၊ သွက်ညးဍုင်ကွာန်ပဲါဒဴဘဲပၞာန်ကီု ကဵုလဝ်သြန်ထံက်ပင်နွံရောင် ဂးရ။
မွဲလ္ပာ်ဂှ်လေဝ် သွက်ဂွံသၠုင်ပ္တိုန်သြန်လာဘ်စၟတ်လဝ်ဂှ်ကီု ကေုာံ သွက်ဂွံဂလိုင်ပ္တိုန်တၞးမာဲလာဘ်ဂမၠိုင်ကီုဂှ် နွံပၟိက်ဒၟံင်ရောင် ညးဍုင်ကွာန်မန်တံ ဟီုဂးမံင်နွံရ။
အခိင်လၟုဟ်ဏံဝွံ ၚုဟ်မးမာဲရာမညမွဲတၞးဂှ် အပ္ဍဲဍုင် (၂၀၀၀) ဒကေဝ်၊ ပ္ဍဲသေံ (၂၀) ၝာတ်၊ မလေဝ်ယှာ (၂) ရေန်ဂေတ်၊ အမေရိကာန် ကေုာံ သေင်ကာပေါဝ် (၁) ဒဝ်လာ သွံကဵုဒၟံင်ရ။
ပ္ဍဲသၞာံ (၂၀၂၆) ၊ ဂိတုသေပ်တေမ်ဗာ စၟတ်တ္ၚဲ (၁) တုဲကၠုင်ဏံဂှ် ပံက်လဝ်တၞးမာဲရာမည မရနုက်ကဵု (၁၁) ဝါတုဲ ညးတၠကုသဵုကလိဂွံလာဘ်ဂမၠိုင်တံဂှ် အတိုင်စဳဇန်ဟေင် ပ္တိတ်ကဵုဒၟံင်လာဘ်ဂမၠိုင်ရ။
ဆေင်စပ်ကဵု လၟေင်တၞးမာဲလာဘ်၊ ဗီုပြင်ကဵုလာဘ် ကေုာံ ၚုဟ်မးတၞးမာဲဂမၠိုင်ဝွံ ပ္ဍဲကဵုမုက်လိက်ပရေင်မၞိဟ်မာဲရာမည (Htee Mai Rehmonnya) ဂှ် ဗွဲမဗဗွဲကဵုအခိင် လလောင်ပ္တိတ်ဒၟံင်အဆံင်ဆံင်နွံတုဲ သွက်ဂွံလုပ်စိုပ်ကျောဝ်ဗဵုဂှ်လေဝ် ကမ္မတဳဂမၠိုင်တံ ဖ္တိုက်ဖၟောဝ်လဝ်ရ။