ပ္ဍဲကွာန်လ္ၚဵု၊ သ္ကုတ်ရေဝ်သၟဝ်ကျာ၊ တွဵုရးဍုင်မန်ဝွံ နူဂကောံကရောင်ပၞာန် ကမ္မယှေန်ပၞာန်တံ သွက်ဂွံစကာအာကၠုင်ကိစ္စရေင်ပၞာန်ဂှ် ဗက်ကံက်ကေတ်လဝ်စရင် ကွဳစက်လာင်ဇြေန်ဟွံမွဲဂမၠိုင်နွံရောင် ဂွံတီကေတ်ရ။
အပ္ဍဲပွိုင်ဍုင်ရေဝ် ဇြဟတ်ပၠန်ဂတးခိုဟ်မံင်ဂှ်ဝွံ ဂကောံကရောင်ပၞာန်ကမ္မယှေန်ပၞာန်တံ လုပ်စိုပ်ဒၟံင်မွဲနှေံမွဲနှေံတုဲ ကွဳစက်ညးဒေသ ဒးဒုင်ဆဵုဂဗတဝ်တဝ်တံဂှ် ရပ်စကာ ကိစ္စပရေင်ပၞာန် ဗွဲအဓမ္မနွံရ။
အခိင်လၟုဟ်ဏံလေဝ် ကၠုင်စိုပ်သၟာန်သၟုက်လဝ် လၟိဟ်သ္ၚိဒၟံင်ကွဳစက်လာင်ဇြေန်ဟွံမွဲ ပ္ဍဲဇရေင်သ္ကိုပ်အုပ်ဓုပ်အရာပ်/ကွာန်၊ သ္ကုတ်ရေဝ်သၟဝ်ကျာတုဲ ကေတ်လဝ်စရင်နွံရောင် ညးဒေသရေဝ်မွဲတၠ ဟီုရ။
“ကာဍေံတံကေတ်ဂှ်တှ်ေ ကာ Without တံရ။ ဗက်ကံက်လဝ်စရင် ပ္ဍဲကွာန်ရ၊ သ္ၚိညးလဵု ကာနွံရောဟီုဂှ်၊ ကာတံဂှ်တှ်ေ ကေတ်ကဵုအလန်တုဲ သွက်ဂွံစကာဏောင်” သာ်ဝွံ ညးဟီုရ။
ဟိုတ်ဂှ်ရ ညးဒေသတၠကဳစက်တံ ဒှ်မံင်ဓဝိင်ကဵု ကိစ္စဒးကဵုကွဳစက်ဂမၠိုင် နကဵုအလန် သွက်ကရောင်ပၞာန်ကမ္မယှေန်ပၞာန်တံရ။
ကွဳစက်ရပ်နင်လဝ် သွက်ဂွံစကာကိစ္စပရေင်ပၞာန် နူကောန်ကွာန်ဂမၠိုင်တံဂှ်ဝွံ သၟာင်နူဒးဒုင်လီုလာ်ဆောံလေင် အကြာပေဲါဗ္တိုက်ၜါလ္ပာ်ကဵု ဒးဒုင်ကြတ်ဗ္တိုက်ဂှ်တုဲ စဵုကဵုတ္ၚဲလအ်လ ဟွံက္လေင်ပလံင်ဂှ်ရ တၠကွဳစက်ဂမၠိုင်တံ ဒှ်ဓဝိင်စံင်ကတဴအိုတ်ရ။
အခိင်ကၠာတေံ အဃောထ္ပက်မံင်ကရောင်ပၞာန်ကဵု ဂၠံင်ဍာန်တိုက်မ္ဂး ကွဳစက်ဒဳအာကၠုင်ဒၟံင် လ္တူဂၠံင်ဍာန်ကီု (ဝါ) ကွဳစက်ဒေံါဒၟံင်ကီုဂှ် ဗဒေံါတုဲ အာတ်မိက် သွက်ဂွံဍိုက်ဗက် ကေုာံ သွက်ဂွံစကာနွံရ။
“ကာလာင်ကီု၊ ကာဓမ္မတာကီုဂှ် ဗက်ဍိုက်ရ။ သၟာကာတံလေဝ် ဟွံကဵုဍိုက် ဟွံဂွံပုဟ်။ ဟွံကဵုဍိုက်တှ်ေလေဝ် ဂၠာဲသၞပၠန်ရ။ ကဵုဍိုက်တုဲတှ်ေလေဝ် ဒးဖေက် ဂကောံပၠန်ဂတးတံရ” သာ်ဝွံ ညးဒေသအာကၠုင်တရဴမွဲတၠ ဟီုရ။
ကွဳစက်ညးဍုင်ကွာန်ပိုင်ပြဳဂမၠိုင်ဂှ်ဝွံ နူဂကောံကရောင်ပၞာန်ကမ္မယှေန်ပၞာန်တံ ဂၠံက်ကေတ်မာဲကီု၊ နကဵုအလန်ကီု၊ နနဲအဓမ္မကီု စကာကိစ္စပရေင်ပၞာန်နွံရ။
အပ္ဍဲပွိုင်ဍုင်ရေဝ်ဝွံ အခိင်ဒပ်ကမ္မယှေန်ပၞာန် ထ္ပက်ကရောင်ပၞာန်အာကၠုင်ဒၟံင်ဂှ် သၟာင်နူညးဒေသတံ အာကၠုင်ခက်ခုဲတုဲ အကာဲအရာပရေင်ဂီုကၠီုဂှ်လေဝ် ဒးဒှ်မံင်ဓဝိင်နွံရောင် ဂွံတီကေတ်ရ။