ဒပ်ကမ္မယှေန်ပၞာန် မဖျေံသဇိုင်ဍုင်ကျာ်ထဝ်၊ တွဵုရးဍုင်မန်ဂှ် ဟိုတ်နူပန်ကဵုလွဟ်ဇၞော်တုဲ ကောန်ၚာ်ချိုတ်မွဲတၠ၊ ညးဗြဴဒးဘဲဝပ်မွဲတၠနွံရဂှ် ဂွံတီကေတ်ရ။
နူၝောံဒပ် (၄၄) ကမ္မယှေန်ပၞာန်၊ မဖျေံသဇိုင်ဍုင်ကျာ်ထဝ်ဂှ်ဝွံ ပ္ဍဲဂိတုသေပ်တေမ်ဗာ စၟတ်တ္ၚဲ (၆) ၊ အခိင်သဝ်တ္ၚဲ အကြာ (၅) နာဍဳဂှ် ပန်ဏာလွဟ်ဇၞော် လ္ပာ်ကွာန် (ညောင်ထောက်) (၂) မရ။
ဟိုတ်နူလွဟ်ဇၞော်ဒတုံခတိုဟ်အာဂှ်ရ ကောန်ၚာ်အာယုက် (၁၀) သၞာံမွဲတၠဂှ် ချိုတ်အာဒၞာဲဂှ်ဟေင်တုဲ ညးမဒှ်မိ အာယုက် (၄၀) သၞာံပြင်ဂှ်လေဝ် ဒးအာဘဲဝပ်ကမ်လွဟ်ဇၞော်ကီု ညးဒေသတံ ဟီုရ။
“လွဟ်ဇၞော်ဒတုံတုဲ ကောန်ၚာ်အာယုက် (၁၀) သၞာံဂှ် ချိုတ်အာရ။ မိကောန်ၚာ်ဂှ်လေဝ် ဒးဘဲဝပ်ရ” သာ်ဝွံ ညးဒေသမွဲတၠ ဟီုရ။
ပ္ဍဲကဵုကွာန် (ညောင်ထောက်) ဒပ်ကမ္မယှေန်ပၞာန်တံ ပန်ကဵုလွဟ်ဇၞော်ဂှ် ဟွံဒှ်ပေဲါဗ္တိုက်မွဲသာ်ရဂှ်လေဝ် ဂွံတီကေတ် နူညးဒေသတံရ။
အပ္ဍဲဂိတုအဝ်ဂေတ်တုဲကၠုင်ဏံဂှ်လေဝ် ပ္ဍဲကွာန် (ဇီးပြောင်း) ဂှ် ဟိုတ်နူဒပ်ကမ္မယှေန်ပၞာန် ပန်ဏာလွဟ်ဇၞော် ဒတုံခတိုဟ်အာဂှ်ရ ကောန်ကွးဘာ တန် KG အာယုက် (၅) သၞာံမွဲတၠ ချိုတ်အာတုဲ ဟွံအောန်နူ (၁၁) တၠ ဒးအာဘဲဝပ်နွံရ။
ဒပ်ကမ္မယှေန်ပၞာန်တံဝွံ ပ္ဍဲကဵုကွာန်မၞိဟ်တန်တဴဂမၠိုင်ဂှ် ပန်ကဵုလွဟ်ဇၞော်၊ ပန်ကဵုက္ၜင်ကျာ အဆက်ဆက်နွံတုဲ မၞိဟ်ဒးဘဲဝပ်ချိုတ်ဂျိုင်ကီု ညးဒေသလၟိဟ်ကဵုလ္ၚီကီု ဒးဂြိပ်ပဲါဒဴအာ ဒၞာဲဗၠးဘဲတေံရ။
ဒပ်ကမ္မယှေန်ပၞာန်တံဝွံ စွံပွန်ကဵု ညးဍုင်ကွာန်တံတုဲ သၟာင်နူဗ္တိုက်ကဵုက္ၜင်ကျာဂှ်မ္ဂး သီုပန်ကဵုလွဟ်ဇၞော်ဂှ်ရ ကောန်ကွာန်ဒးဘဲဝပ်ချိုတ်ဂျိုင်၊ သ္ၚိဒၟံင် ကေုာံ ဒြပ်ကသပ်ဂမၠိုင် မဒးဆောံလေင်လီုလာ်အာနွံရဂှ် ကေအေန်ယူ လလောင်ပ္တိတ်လဝ်ရ။