အစဳဇန်ဗ္တောန်လိက်မန် ပ္ဍဲဘာတန်အလဵုအသဳ Grade 4 စဓမံက်ရုပ်ရဴ (၄) ပွိုင်ဍုင်ဂှ် လၟိဟ်ဘာ (၁၃) ဘာ စဗ္တောန်ဒၟံင်နွံရောင် ညးတာလျိုင်ကမ္မတဳဓမံက်ရုပ်ရဴမွဲတၠ ဟီုလဴထ္ၜးရ။
အတိုင်လၟေင်ကမၠောန် ကမ္မတဳဓမံက်ရုပ်ရဴပရေင်ကမၠောန်ဂှ်မ္ဂး စတမ်နူဂိတုသေပ်တေမ်ဗာ (၁) တုဲကၠုင်ဏံ စဗ္တောန်အာ (၄) ပွိုင်ဍုင်ဂှ် လၟိဟ်ဘာ (၁၃) ဘာနွံရောင် ညးမၞုံလျိုင် ကမ္မတဳဓမံက်ရုပ်ရဴမွဲတၠ ဟီုထ္ၜးရ။
“ဗွဲကိုပ်ကၠာဏံ ဗ္တောန်အာ Grade 4 ဂှ်တှ်ေ စပံက်အာ (၄) ပွိုင်ဍုင်၊ ဖအိုတ်ပံက်ဂွံ (၁၃) ဘာတုဲအာ၊ ဘာပံက်လဝ် (၁၃) ဘာဏံဂှ်တှ်ေ ဘာဗ္တောန်ဒၟံင် LT ဂှ်ရ ဗ္တောန်အာကၠာ ဖျေံလဝ်သာ်ဂှ်၊ အတိုင်ဂှ်ရ ဓမံက်ဏာရုပ်ရဴကမၠောန်နွံ” သာ်ဝွံ ညးမၞုံလျိုင် ကမ္မတဳဓမံက်ရုပ်ရဴ ပရေင်ဗ္တောန်လိက်မန် ပ္ဍဲဘာတန်အလဵုအသဳမွဲတၠဂှ် ဟီုထ္ၜးရ။
ပ္ဍဲကဵုအစဳဇန်ဗ္တောန်အာ Grade 4 (၄) ပွိုင်ဍုင်ဂှ်ဝွံ ပွိုင်ဍုင်တ္ကအ်ခၟိုင်ဂှ် (၁) ဘာ၊ ပွိုင်ဍုင်မုဟ်ဍုင် (၄) ဘာ၊ ပွိုင်ဍုင်ဇြပ်ဗု (၂) ဘာ၊ ပွိုင်ဍုင်မတ်မလီုဂှ် (၆) ဘာနွံတုဲ သီုဖအိုတ် (၁၃) ဘာ စဗ္တောန်အာနွံရ။
ကိစ္စဗ္တောန်လိက်မန် ပ္ဍဲဘာတန် Grade 4 ဏံဂှ် ပ္ဍဲကဵုဘာ အ္စာဘာဗ္တောန်ဒၟံင် လိက်ဘာသာကောန်ဍုင်အရင် (မန်) (Language Teacher – LT) နွံဂှ်ရ စဗ္တောန်အာရောင် ကမ္မတဳဂှ် ဖျေံလဝ်တုဲ အတိုင်ဖျေံလဝ်ဂှ်ရ စဓမံက်အာရုပ်ရဴနွံရောင် ညးမၞုံလျိုင်ဂှ် ဆက်လဴလဝ်ရ။
ပရေင်ဗ္တောန်လိက်မန် ပ္ဍဲဘာတန်အလဵုအသဳ ဒဵုကဵု Grade 4, Grade 5 သွက်ဂွံဓမံက်ရုပ်ရဴပရေင်ကမၠောန်ဂှ် ညးစၞး နူသွာင်အလဵုအသဳ (တွဵုရးဍုင်မန်)၊ ညးစၞးနူဗော်ဍုင်မန်တၟိ၊ ညးစၞးနူဗော်ညဳသၟဟ်မန်၊ ညးစၞးဂကောံဗ္တောန်လိက်ပတ်မန်တအ် ပံင်ကောံတုဲ ဒက်ပ္တန်ကၠုင်လဝ် ကမ္မတဳဓမံက်ရုပ်ရဴ ပရေင်ကမၠောန်မွဲနွံရ။
သွာင်ဩန်ထံက်ပင်အ္စာဘာဂမၠိုင် ဘာဗ္တောန်သၠုင်ပ္တိုန် Grade 4 ဂှ် နူသွာင်အလဵုအသဳ ထံက်ပင်ဒၟံင် မွဲဂိတု (၁၂၀၀၀၀) ဒကေဝ်ဂှ် ထပ်ဗပဵုကဵု (၂၀၀၀၀) ပၠန်တုဲ ဒှ်အာ (၁၄၀၀၀၀) ဒကေဝ်ရ။ သွာင်အ္စာဘာဗ္တောန်ဒၟံင် ရေင်တၠုင်ကောပ်ကာဲ ဘာသာကောန်ဍုင်အရင် (မန်) (Teaching Assistant – TA) ဂှ် ကလိဂွံ ဒၟံင်ဩန်ထံက်ပင် မွဲဂိတု (၁၉၀၀၀၀) ဒကေဝ်နွံရ။
ပရေင်ဗ္တောန်လိက်မန် ပ္ဍဲဘာတန်အလဵုအသဳဂှ် အစဳဇန်သွက်ဂွံသၠုင်ဗ္တောန်ကဵု Grade 4, Grade 5 နွံ / ဟွံမွဲ ဂှ် နူကဵုညးစၞးကၠတ်ထဝ် ဗော်ညဳသၟဟ်မန် သၟာန်သဳကၠဳလဝ်ဂှ် တုပ်စိုတ်သ္ပဒတန်ရောင် ပ္ဍဲကဵုကောံဓရီုကၠတ်ထဝ်လၟေင်ဍာံ အလန်ဒုတိယ တ္ၚဲပထမ ဂိတုဂျောန် (၁၅) ဂှ် ဖျေံလဝ်ရ။
ပ္ဍဲတွဵုရးဍုင်မန်ဝွံ သၞာံဗ္တောန်ပညာ (၂၀၂၆-၂၀၂၇) ဏံ ပရေင်ဗ္တောန်လိက်မန် ပ္ဍဲဘာတန်အလဵုအသဳ နကဵုဘာသာမန်ဂှ် နွံလၟိဟ် (၃၃၉) ဘာတုဲ အပ္ဍဲဂှ်မ္ဂး သွာင်အ္စာဘာဗ္တောန်ရေင်တၠုင်ကောပ်ကာဲ ဘာသာကောန်ဍုင်အရင် (မန်) (Teaching Assistant – TA) (ဗ္တောန်အတိုင်မွဲတ္ၚဲ) နွံ (၂၆၈) တၠတုဲ အ္စာဘာဗ္တောန်ဘာသာမန် (ဗ္တောန်မွဲအခိင်) ဂှ် (၄၂) တၠ၊ ပံင်ဖအိုတ် အ္စာ (၃၀၀) တၠ ကေတ်ဒၟံင်တာလျိုင်နွံရ။