ပ္ဍဲတိဍာ်မဟာဒပ် (၁) ၊ ဗော်သွးကရေင် “ဗော်သွးကရေင်” ထိင်ဒဝ်၊ ပွိုင်ဍုင်ၜဳက္လေင်၊ တွဵုရးဍုင်မန်ဝွံ ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜင်ကျာတုဲ စမြိုင်ဘာဗ္တောန်လိက်ဂမၠိုင် ကေုာံ သ္ၚိဒၟံင် (၄၂) မ လီုလာ်အာနွံရောင် ဂွံတီကေတ် နူတင်နင်ဗော်သွးကေအေန်ယူ ခရိုင်သဓီုရ။
ပ္ဍဲကွာန်ယိုဝ်ကဠာ (ကြသောင်းဆိပ်) ၊ မၞုံအပ္ဍဲတိဍာ်မဟာဒပ် (၁) ၊ ကေအေန်ယူထိင်ဒဝ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၉) ၊ အခိင်ဗ္တံ ၜိုတ် (၁၁) နာဍဳဂှ် ဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာ (ဂျက်ဖိုက်တာ) ပံင် (၅၀၀) ၊ (၄) မရ။
ဟိုတ်နူပန်ဗ္တိုက်ထောံဖျေံဗမ်ကဵုက္ၜင်ကျာဂှ်ရ ပ္ဍဲလ္ပာ်ပလိုတ်ကွာန်ယိုဝ်ကဠာ (ကြသောင်းဆိပ်) ဂှ် စမြိုင်ဘာဗ္တောန်လိက် (၃) မ၊ သ္ၚိဒၟံင်သၞာဲဒဴ (၁) မ၊ သ္ၚိဒၟံင် (၂) မ လီုလာ်အာတုဲ ပ္ဍဲလ္ပာ်ဗၟံက်ကွာန်ဂှ်လေဝ် စမြိုင်ဘာဗ္တောန်လိက် (၂) မ၊ သ္ၚိဒၟံင် (၃၆) မ လီုလာ်အာနွံရောင် ကေအန်ယူ ခရိုင်သဓီု လလောင်ပ္တိတ်လဝ်ရ။
“စမြိုင်ဘာဗ္တောန်လိက်တံ၊ သ္ၚိဒၟံင်တံ လီုလာ်အာရ။ မၞိဟ်ဂှ်တှ်ေ ဒးဘဲဇီုကပိုက်ဟွံမွဲပုဟ်” သာ်ဝွံ ညးဒေသမွဲတၠဂှ် ဟီုရ။
တုဲပၠန် ပ္ဍဲအခိင်ဗ္တံ ၜိုတ် (၁၁း၄၄) နာဍဳဂှ်လေဝ် နူဒပ်ပၞာန် (ကတိုင်ဒိ) ဂှ် ထပ်ပန်ဏာကဵုလွဟ်ဇၞော် (၁၂၀) မမ (၄) မ၊ လ္ပာ်ပလိုတ်ကွာန် (ကြသောင်းဆိပ်) ဂှ်ပၠန် ကေအေန်ယူ ခရိုင်သဓီု ဂးရ။
ဟိုတ်နူဒပ်ပၞာန် နူကတိုင်ဒိ ပန်ကဵုလွဟ်ဇၞော်ဂှ်တုဲ ဗွိုင်ကမၠောန်ညးဍုင်ကွာန်/ကောန်ကွာန် မပိုင်ပြဳဂမၠိုင်ဂှ်ကဵု ကၠအ်ဂူဂမၠိုင် ဒးဘဲဇီုကပိုက်လီုလာ်အာနွံရ။
ဒပ်ပၞာန်တံဝွံ ဟွံဒ္ဂေတ်ဗက် တင်တုပ်စိုပ်အာဇြဳယာန် (Five-Point Consensus) မွဲသာ် ပန်ဗ္တိုက်မံင်ကောန်ဍုင်ကွာန်ဒုဟ်ဟွံမွဲ အလုံဍုင်တံ နကဵုက္ၜင်ကျာ၊ စက်ဗရုသာဲ ကေုာံ လွဟ်ဇၞော်ဂမၠိုင်ကီု၊ ရပ်ဂစိုတ်မံင်ကောန်ဍုင်ကွာန်တံကီုတုဲ ဇၟာပ်တ္ၚဲ လုတ်လောန်ဒၟံင်ဒုဟ် ဆေင်စပ်ကဵုအမှုရာဇဝတ်ပၞာန်ဂမၠိုင်နွံရောင် ကေအေန်ယူ လလောင်ပ္တိတ်လဝ်ရ။