စမြိုင် မပ္တံကဵိုသ္ရိဒၟံင်၊ ဒၞါဲဇူဒီု မသိုင်ခၞံလဝ် ဒၞါဲတိဍာ်ဗၠိုက် လုပ်မံင်ဗွိုင်တိကၟိုန်ဍာ်ဝဇိရာလံင်ကောန် ဍုင်ထံက်ခၞောန်တအ်ဂှ် ကဵုဗ္စိုပ်တၞးလိက်တုဲ အတိုင်သၞောဝ်ဥပဒေ ဖျေံအာသ္ဂုတ်သွာတ်ဏောင် ညးတာလျိုင် ဂကောံအလဵုအသဳသေံ ခရိုင်ကမ္မရဳတအ် ဟီုဂးလဝ်နွံရ။
ဆက်စပ်ကဵုပရေင်ပရူ မလုပ်သိုင်ခၞံလဝ်စမြိုင် အပ္ဍဲဗွိုင်တိဗၠိုက်ဍာ် ကၟိုန်ဍာ်ဝဇိရာလံင်ကောန် နူဒေသထံက်ခၞောန် စဵုစိုပ်ကွာန်ဝင်ကတအ်ဂှ်တုဲ ညးတာလျိုင်အလဵုအသဳသေံကဵု ညးအုပ်ဓုပ်ကွာန်မဆေင်စပ်တအ် သ္ပလဝ်ကောံဓရီုနွံရ။
“ဒၞာဲပယျဵုတိ ဍာ်ဗၠိုက်ဂှ်တှ်ေ နူဌာနအလဵုအသဳသေံတံ ဟွံကဵုအခေါၚ်သိုၚ်ခၞံပုဟ်၊ ဗဒေါံလေဝ်ဟွံဗဒေါံပုဟ် မံၚ်အာဂွံ၊ ဆ လ္ပကဵုဒှ်ပရူ၊ လၟုဟ်ဏံ ဟိုတ်နူပၠံၚ်ဒၞာဲတုဲ ပတိုန်လိက် စိုပ်အာဒဵုကဵုအဆံၚ်လ္တူတုဲ နူအဆံၚ်လ္တူတေံ စှ်ေကၠုၚ်စၟဳစၟတ်ဂှ် နဒဒှ်ဒၞာဲပယျဵုတိဍာ်ဗၠိုက် ၜက်ၜေတ်မံင်ဂှ်ရ ဍေံကၠောန်အာ အတိုၚ်လၟေၚ်သၞောဝ်ဥပဒေ နဒဒှ် ဇကုလုပ်ၜက်ၜေက်လဝ် ဒၞာဲစေဝ်ပၞောန်အလဵုအသဳ ဗၞတ်ဗ္ၜတ်လဝ်ဂှ်ဏောင်” သာ်ဏအ် ညးအုပ်ဓုပ်ကွာန်ဝင်က (သြင်မန်) နာဲဝၚ်ဇၞး ဟီုထ္ၜးရ။
စပ်ကဵုကိစ္စဝွံတုဲ နူသၞာံတုဲကၠုင်တေံလေဝ် ညးတာလျိုင်အလဵုအသဳကဵု ညးတာလျိုင်ကၟိုန်ဍာ်တအ် စိုပ်ကၠုင်စၟဳစၟတ်လဝ်နွံတုဲ အမိင်နူအဆံင်လ္တူ ကဵုကၠုင်စၞောန် ဒးဖျေံသ္ဂုတ်သွာတ်ဇေတ်တ်မ္ဂး စမြိုင် မပ္တံကဵု သ္ရိဒၟံင်၊ ဒၞါဲဇူဒီုလ္ရဵု ဒးဒုင်ဇီုကပိုက်နွံမာန်ရ။
သ္အာင်နူဂှ်ပၠန် သ္ၚိဖံၚ် မသိုၚ်ခၞံလဝ် လ္တူဍာ် နွံပွဳပွူဒဒန်ဆု ကျာ်ဇၞော်ဥတ္တမတံဂှ် နူဌာနအလဵုအသဳသေံ ကဵုလဝ်စၞောန် ဒးနွံသ္ၚောဲခြာကဵုဒဒန် ဗၞတ် (၂၀၀) မေတ်ရောၚ် ဂွံတီကေတ်ရ။
“အဲခယျကေတ်တှ်ေ ကိစ္စဏအ်ဂှ် ၜိုတ်ဍေံတံ ကဵုသတိရ။ နူဍေံတံ ဂွံကဵုအရီုဗၚ်ထံက်ပၚ်ဂှ် ဟွံဟီုလဝ်မွဲသာ်ပုဟ်၊ ဂတဏံ ညံၚ်ဟွံဂွံၜက်ၜေတ်အာနူဏံ ညံၚ်ဟွံဂွံ ကယျာန်ဓဝါတ်ညးသ္ကံ ဒှ်မာန် ဟွံမာန်ဂှ် ဒးမၚ်ကောံဓရီုအလန်လက္ကရဴအိုတ်ဏံဏောၚ်” သာ်ဝွံ ညးအုပ်ဓုပ်ကွာန်ဝင်က နာဲဝၚ်ဇၞး ဟီုရ။
ပ္ဍဲကွာန်ဝၚ်္က (သြၚ်မန်) သၟးဂှ် လၟိဟ်သ္ၚိကီု၊ ဒၞာဲဇူဒီုကီု ဗၞတ် (၇၀၀) မပြၚ်ၚ် လုပ်သိုၚ်ခၞံလဝ် ဒၞာဲဗွိုင်တိဗၠိုက်ဍာ်ဂှ်နွံတုဲ ဂိတုသေပ်တေမ်ဗာ စၟတ်တ္ၚဲ (၂၈) ဏံမ္ဂး သွက်ဂွံထပ်ကော်အာ ကောံဓရီု နဒဒှ်အလန်လက္ကရဴအိုတ်နွံရောင် ဂွံတီကေတ်ရ။