ကာလဓမံက်ရုပ်ရဴ ပရေင်ဗၠးၜးကောန်ဂကူမန်မ္ဂး သွက်သ္ဂောံကလိဂွံ ပရေင်ပံင်ကောံရီုဗင် ကေုာံ တင်ကဵုကသပ်အနာဂတ်ဂမၠိုင်ဂှ် နူဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) NMSP-AD ဆဵုဂဗကုတၠကမၠောန်မန် မစိုပ်ကၟိန်ဍုင်သေံဂမၠိုင်၊ တၠပညာဂမၠိုင် ကေုာံ ညးဍုင်ကွာန်ဂမၠိုင်တုဲ ကၠောန်သ္ပဒၟံင် ပရေင်စန္ဒက်ဆဝ်မ္ၚုဟ်နွံရောင် ဂွံတီကေတ်ရ။
အကာဲအရာပရေင်ဍုင်ကွာန်တ္ၚဲဏံ ကေုာံ အကာဲအရာပၠန်ဂတးဂမၠိုင်၊ လၟေင်ကမၠောန် NMSP-AD ဂမၠိုင်၊ လၟေင်ကမၠောန်ဂတ ဒပ်မန်ရာမညကဵု တင်ခက်ခုဲဂမၠိုင်ဂှ်ဝွံ သွက်ဂွံဟီုဂးသောင်ကလးကဵု ညးဍုင်ကွာန်မန် မစိုပ်ကၟိန်ဍုင်သေံဂမၠိုင်ဂှ် ကၠောန်သ္ပဒၟံင် ပေဲါဆဵုဂဗရောင် ညးမၞုံအခေါင်ဟီုဂးဗော် နာဲဂံင်သကာ ဟီုရ။
“လ္ပာ်ပိုဲတံ မုကၠောန်မံင်ရောဟီုဂှ် ပ္တိုန်ထ္ၜးကဵု ပရိုင်၊ မဳဒဳယာ သီုဖအိုတ်ဟွံမွဲဂှ်ရ နကဵုညးတံ အရာဟွံတီတံဂှ်နွံရ။ အရာကၠောန်မံင်လၟုဟ်ကီု၊ အရာခက်ခုဲမံင်ကီု ဂွံတီအာ၊ ဨလ္တူဂှ်လေဝ် နကဵုညးတံ ဂွံကဵုကသပ်ဂွံ၊ ဂွံကဵုရီုဗင်ဂွံဂှ် ဒးဆဵုဂဗရ” သာ်ဝွံ ညးဟီုရ။
အပ္ဍဲကဵုပေဲါဆဵုဂဗဂမၠိုင်ဂှ်ဝွံ ညးအုပ်ကာ NMSP-AD နာဲဗညာလဴ၊ ညးလျိုင်ပရေင်ဆက်ဆောံသေံ၊ ညးလျိုင်စန္ဒက်ဍုင်သၟာင်၊ ညးလျိုင်ဟံင်ပြာ်ပရေင်မၞိဟ် ကေုာံ ဒုညးလျိုင်ပရေင်စန္ဒက်ဍုင်သၟာင်တံ က္ဍိုက်က္ဍိုပ်တုဲ ကၠောန်သ္ပရေင်တၠုင်မံင်ရ။
သွက်ပရေင်ဗၠးၜးကောန်ဂကူမန်ဂှ် ညးဍုင်ကွာန်မန် နူကဏ္ဍနာနာတံ ညံင်သ္ဂောံပံင်ကောံပါလုပ်ဂှ် နွံပၟိက်ဒၟံင်ရောင် နာဲဂံင်သကာ ဆက်ဟီုလဝ်ရ။
“ပရေင်ရုန်ဂ္စာန် သွက်ပရေင်ဗၠးဂကူမန်ဂှ် တၠကမၠောန်မန်မွဲဓဝ် ဟွံကပုဟ်။ မၞိဟ်နူကဏ္ဍနာနာသီုဖအိုတ် ဥပမာ – သၟာကမၠောန်၊ သၟတ်၊ ညးလေပ်ပညာ၊ တၠပညာတံ၊ သေဌဳတံ၊ ခၟဳသင်တံ မပ္တံသီုဖအိုတ် ပါလုပ်ရုန်ဂ္စာန်ရီုဗင်မှ စိုပ်တိုင်ပ္ကဴပြဟ်ပြဟ်ဏောင်ဂှ် ပတှ်ေကေတ်လဝ်ရ” သာ်ဝွံ ညးဟီုရ။
တုဲပၠန် သၟာကမၠောန်ဆုဲပြံင်မန် လိက်သက်သဳဟွံမွဲ မစိုပ်ကၟိန်ဍုင်သေံတံ ဒးဒုင်ရပ်တုဲ နူ NMSP-AD သွက်ဂွံပံင်ကောံရီုဗင်ပသောင်ကဵု တင်ခက်ခုဲအခေါင်မံင်တန်တဴ ကေုာံ အကာဲအရာဒးဒုင်က္လေင်ပလံင်ဒေသပယျဵုနွံရဂှ်လေဝ် ဂွံတီကေတ်ရ။
NMSP-AD ကေုာံ တၠပညာ၊ တၠကမၠောန်မန် မစိုပ်ကၟိန်ဍုင်သေံတံဝွံ ပ္ဍဲဂိတုသေပ်တေမ်ဗာ စၟတ်တ္ၚဲ (၁၃) တုဲကၠုင်ဏံဂှ် ဆဵုဂဗလဝ်ညးသ္ကံ ပ္ဍဲကၟိန်ဍုင်သေံမွဲဒၞာဲတုဲ သဳကၠဳသၠာဲဂတးလဝ်လညာတ်နွံရဂှ်လေဝ် လလောင်ပ္တိတ်လဝ် ပ္ဍဲမုက်လိက်ပရေင်မၞိဟ် NMSP-AD ရ။
အပ္ဍဲသၞာံ (၂၀၂၆) ဏံဝွံ က္ဍိုပ်သ္ကိုပ်အဆံင်လ္တူ ဗော်ဍုင်မန်တၟိ (ဗတိုက်သရိုဟ်တၠအဝဵုပၞာန်) NMSP-AD တံ သၟာင်နူဆဵုဂဗ ကုဂကောံဗော်နာနာ မၞုံပ္ဍဲကၟိန်ဍုင်သေံကဵု ညးလျိုင်ပရေင်ထံက်ပင် ကေုာံ ပရေင်စန္ဒက်တုဲ သီုဆဵုဂဗကဵု ညးဍုင်ကွာန်မန်ဂမၠိုင်၊ ဂကောံမှာဇန်မန်ဂမၠိုင် မွဲနှေံမွဲနှေံနွံရ။