ကောန်သ္ဂံင်တန်ဗ္တောန်ပၞာန် (၁) တၠကဵု သၟတ်ဒးဒုင်ရပ်သွက်ယိုက်ဂၠေင်ပၞာန် (၂) တၠ၊ ပ္ဍဲကွာန်မလိဝါမ်၊ ပွိုင်ဍုင်ကအ်သံင်၊ ရးတၞင်သဳဂှ် ဟံင်ပြာ်ပ္တိတ်လဝ်မာန်ရောင် ဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်တံ ဟီုရ။
သၟတ်ဒးဒုင်ရပ်သွက်ယိုက်ဂၠေင်ပၞာန် (၂) တၠဂှ်ဝွံ ကျဝ်မေန်ဥူ၊ အာယုက် (၂၁) သၞာံ၊ နူဍုင်ကအ်သံင်ကဵု ကျဝ်မေန်ခ၊ အာယုက် (၂၄) သၞာံ၊ နူဇာတိဍုင်မုင်ယွဲ၊ ရးသေတ်ဂိုင်ရ။
ညး (၂) တၠဂှ်ဝွံ ကၠာဟွံဂွံပလံင် ဇရေင်တန်ဗ္တောန်ပၞာန်ဏီ အဃောထိင်ဒဝ်လဝ် ပ္ဍဲရုင်အုပ်ဓုပ်၊ ကွာန်မလိဝါမ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၅) တုဲကၠုင်ဏံ ဂြိပ်ဗၠးတိတ်ကၠုင်တုဲ ကေတ်အဆက်စၠောံကဵု ဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်ဂှ်ရ အာစိုပ်ဟံင်ပ္တိတ်လဝ်မာန်ရောင် ဂးရ။
“ဍေံတံ ဒးဒုင်ရပ်ပဝ်တာလ္တူဂၠံင်ရ။ တုဲတှ်ေ ရပ်ထိင်လဝ် ပ္ဍဲရုင်အုပ်ဓုပ်မလိဝါမ်ဂှ် ဟွံဗဗွဲဓဝ်ရ။ ရပ်ထိင်လဝ်ဂှ် လအ် (၂) တ္ၚဲရ။ အေ ဂြိပ်ဗၠးကၠုင်နူဂှ်တုဲတှ်ေ ကေတ်ဆက်စၠောံကဵုပိုဲတုဲ ဟံင်ပြာ်ပ္တိတ်ဗွဲမဗၠးဘဲအန္တရာဲမာန်ရ” သာ်ဝွံ ညးတာလျိုင် နူဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်မွဲတၠ ဟီုရ။
တုဲပၠန် ကောန်သ္ဂံင်ဇြဝ်ကိုဝ်ကိုဝ်၊ အာယုက် (၂၉) သၞာံ၊ ဇာတိဍုင်ဏာတ်မာက်၊ ရးမဂွေ၊ စှ်ေနူတန်ဗ္တောန်ပၞာန်ယှိုဲပျဳတာ၊ လၟေင် (၂၀) ဂှ်လေဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၀) ဂှ် ကေတ်ဆက်စၠောံကဵု ဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်တုဲ အာစိုပ်ဟံင်ပြာ်ပ္တိတ်မာန်ကီု ဂးရ။
“ဇြဝ်ကိုဝ်ကိုဝ်ဂှ်တှ်ေ ပ္ဍဲသၞာံ (၂၀၂၅) ၊ ဂိတုနဝ်ဝေမ်ဗာ (၁၀) ဂှ် ဒးဒုင်ပလံင်ဏာ တမ်ဒပ် (ခလရ ၂၆) ၊ ကအ်သံင်ရ။ သၞာံ (၂၀၂၆) ၊ ဂိတုအဝ်ဂေတ် (၉) ဂှ် ဂြိပ်တိတ်နူဒပ်ရ။ ဂိတုသေပ်တေမ်ဗာ (၁၀) ဏံ အာစိုပ်ဟံင်ပြာ်ပ္တိတ် နူကဵုဒၞာဲဍေံနွံဂှ်မာန်ရ။ လွဟ်ဂှ်တှ်ေ ဟွံပါကၠုင်ပုဟ်” သာ်ဝွံ ညးတာလျိုင်ဂှ် ဟီုရ။
ညး (၃) တၠဂှ်ဝွံ အခိင်လၟုဟ်ဏံ ဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်တံ မင်မွဲရံင်စံင်လဝ် ဗွဲမညဳသၟဟ်ကဵု ဂုဏ်သိက္ခာမၞိဟ်တုဲ ညးတံလေဝ် လုပ်ဇရေင်ဂကောံဒပ်ပၠန်ဂတးတံတုဲ က္လေင်တဝ်စၞေဟ်အာ ဒပ်ပၞာန်ပကီုပရာပ်တံဂှ်ရောင် ဟီုဂးလဝ်ရ။
နကဵုသၟတ်စှ်ေနူတန်ဗ္တောန်ပၞာန် ဒးဒုင်ရပ်ပကောံလဝ် ဗွဲအဓမ္မတံဝွံ သွက်ဂွံစ္ၜုဲစ္ၜော် လ္ပာ်ညးဍုင်ကွာန် ဗွဲမပြဟ် ကေုာံ အခိင်ပြံင်လှာဲစ္ၜုဲစ္ၜော်ဂှ် ကေတ်နင်လွဟ်လနက်မ္ဂး ပ္တိုန်ဂုန်စရာဲကဵုလာဘ် ဗွဲမထေက်တန်ရောင်ဂှ်လေဝ် ဂကောံဒပ်စဵုဒၞာညးဍုင်ကွာန်၊ ပွိုင်ဍုင်ကအ်သံင်တံ ကဵုသမ္တီဖတိုက်ဖအောဝ်လဝ်ရ။