ပ္ဍဲတွဵုရးဍုင်မန်ဝွံ ၜဵုစဲတ္ၚဲမွဲပသာ ၚုဟ်နွံမံင် အကြာ (၅၀၀) ဒကေဝ်တုဲ သၟာဗၞိက် ပရဟ်ဒုင်ရာန်ခြိုင်စွံလဝ်လ္ၚဵုတံ ဒးကျမံင်ရောင် ဂွံတီကေတ် နူပွဳဗွိုင်ကမၠောန်ၜဵုရ။
သၞာံတုဲကၠုင်တေံဝွံ အတိုင်ဗွဝ်ဖျာနွံပၟိက်ဂှ် ၜဵုစဲတ္ၚဲပသာ ၚုဟ်သၠုင်တိုန်လဝ် စဵုကဵု (၁၁၀၀) ဒကေဝ်ကီုလေဝ် ပ္ဍဲသၞာံဏံဝွံ စနူဂိတုအဝ်ဂေတ်တုဲ ၜဵုမွဲပသာ ၚုဟ်ညိင်ဒၟံင် အကြာ (၅၀၀) ဒကေဝ်ဟေင်ရ။
ဟိုတ်ဂှ်ရ စပ္တံနူဂိတုက္ညင်တုဲကၠုင်ဏံရ သၟာဗၞိက်လ္ၚဵုတံ ပရဟ်ဒုင်ရာန်ခြိုင်စွံလဝ် ၜဵု (ဆားကြမ်း) မွဲသာ (၅၅၀) ဒကေဝ်ဂှ် တော်စဟွံကိတ်ရောင် တၠကမၠောန်ၜဵုမွဲတၠ ဟီုရ။
“ပြဟ်ပြဟ်ဏံ သၟာဗၞိက်တံ ကျမံင်ရ။ အဃောရာန်ဂှ် မွဲပသာ (၅၅၀) ၊ လၟုဟ်ဏံ (၅၀၀) ရ။ ထေင်ကေတ် ၚုဟ်ခိုဟ်ဗီုသၞာံတုဲတေံတုဲ ပရဟ်ဒုင်ခြိုင်စွံလဝ်ရ။ တၠကမၠောန်တံလေဝ် မင်ရံင်မံင်အကာဲအရာဖိုဟ်ရ” သာ်ဝွံ တၠကမၠောန်ၜဵုဂှ် ဟီုရ။
ၚုဟ်ၜဵုဟွံခိုဟ်ဂှ်ဝွံ သၟာင်နူတန်တဴလ္တူဗွဝ်ဖျာနွံပၟိက်ၜဵုဂှ်တုဲ ဟိုတ်နူအကြာသၟာဗၞိက်ကဵု တၠကမၠောန်ၜဵုတံ ၜဵုသှ်ေသၟေဟ်ဂၠိုင်ဒၟံင်ဂှ်ရောင် ဂးရ။
ၜိုန်ဂှ်ကီုလေဝ် ၚုဟ်ၜဵုအခိင်လၟုဟ်ဏံဝွံ သွက်တၠကမၠောန်ၜဵုတံ အကာဲအရာကျဟွံသေင်ဏီ သွက်ကမၠောန်ဂွံဂေတ်ဂှ် ပြေပြံင်မံင်တုဲ ဒှ်ဂဝိင်ကဵု ၚုဟ်ၜဵုထပ်က္လေင်စှ်ေအာပၠန်ဟေင် ဂးရ။
ပ္ဍဲဂိတုသေပ်တေမ်ဗာ ကေုာံ အံက်တိုဝ်ဗာ အခိင်ကလိဂွံၚုဟ်ၜဵုသၠုင်အိုတ်မာန်ဂှ် ၚုဟ်ၜဵုဟွံခိုဟ်ဏီဂှ်ရ ဟွံသွံရာန်မွဲသာ် ခြိုင်သီစွံလဝ်ဖိုဟ်ရောင် တၠကမၠောန်ၜဵုလ္တူဂှ် ဂးရ။
“ကၠာၜဵုတၟိဟွံတိတ်ဏီဂှ်တှ်ေ ဒဵုကဵုၜါပိဂိတု ဒးမင်ရံင်ၚုဟ်ဏောင်။ ဆဂး ကၠာၜဵုတၟိဟွံတိတ်ဏီဂှ်တှ်ေ ဂွံၚုဟ်ခိုဟ်တှ်ေဂွံ၊ ဂွိုအ်တှ်ေလေဝ် ဒးသွံရ။ မုဒှ်ရောဟီုတှ်ေ သွက်ဂွံခြိုင်စွံၜဵုတၟိဂှ် နွံပၟိက်ဒၞာဲရုင်ခြိုင်စွံရ” သာ်ဝွံ တၠကမၠောန်ၜဵု နူပွိုင်ဍုင်ဇြပ်ဗုမွဲတၠ ဟီုရ။
ဟိုတ်နူၚုဟ်မးတမ္ညဝ် အပ္ဍဲဗွဝ်ဖျာၜဵုဂှ်တုဲ အကြာသၟာဗၞိက်ကဵု တၠကမၠောန်တံ ဗီုပြင်ဒးဇီုကပိုက်တၞဟ်ခြာမံင်ရောင် ဂးရ။
ကမၠောန်ၜဵု ပ္ဍဲတွဵုရးဍုင်မန်ဝွံ ဗွဲကြဴနူဒပ်ပၞာန်သီအဝဵုတုဲဂှ်မ္ဂး သၟာကမၠောန်စိုန်သကီုအောန်၊ ၚုဟ်ကၠေင်စက်တိုန်ကီု သီုခက်ခုဲၚုဟ်စရိတ်နာနာဂမၠိုင်ဂှ်ရ ဖအောန်ဖျေံကမၠောန်ရ။
ကမၠောန်ၜဵုစဲတ္ၚဲဂှ် စပ္တံနူလဒေါဝ်ဂိတုအံက်တဝ်ဗာတုဲ ဒးပလေဝ်ပလေတ်ကီုလေဝ် သၞာံဏံဝွံ အတိုင်ဥတုရာသဳ သွက်ကမၠောန်ဂွံဂေတ်မာန်ဂှ် ပလေဝ်ပလေတ်အာရောင် တၠကမၠောန်ၜဵုဂမၠိုင်တံ ဟီုရ။