သၟိၚ်တေအ်ဗဝ်ဒယှ် “လဳယိုဝ်နေဝ်မက်ဇြဳ’’ ဒေါံဇူရုပ်သီဏာဇာတ် ပ္ဍဲဂကောံဗဝ်ဍုၚ်အာဂျေန်တဳနာတုဲ သီုကဵုကၠောန်သ္ပ ပေါဲဒးသာဲခြာ ကုပုရိသာတ်တအ်ကဵု ကောန်ဂကောံတေအ်ဗဝ်မွဲစွံကီုရောၚ် ဂွံတီကေတ်ရ။
ကိုပ်ကၠာနူဟွံဂွံသ္ပဏာ ပေါဲသာဲခြာဏီ တ္ၚဲဏအ် ဂိတုအံက်တဝ်ဗာ စၟတ်တ္ၚဲ (၇) ၊ အခိၚ်နူဂယး ၜိုတ် (၅) နာဍဳကဝက်ဂှ် ဂကောံဗဝ်ဍုၚ်အာဂျေန်တဳနာတအ် တေအ်စမ်ဇိုၚ်ကဵု ဂကောံဗဝ်ဍုၚ်ဗဳနေန်တအ်တုဲ နကဵု’’မက်ဇြဳ’’ ထပၠုပ်ဏာ (၁) ဂိုဝ် ကေုာံ ဖန်ဗဒှ်လဝ်ဂိုဝ် မွဲအလန်တုဲ ရုပ်သီဏာဇာတ် ပ္ဍဲဘဝသၟာတေအ်ဗဝ် ဍုၚ်အာဂျေန်တဳဏာဂှ် နကဵုဝၚ်ကျေဝ်ဝ်ရ။
ပြိုၚ်ပ္ကာန်တေအ်စမ်ဇိုၚ်ကဵု ဂကောံဗဝ်ဍုၚ်ဗဳနေန်တအ်တုဲဂှ်မ္ဂး နကဵုပုရိသာတ်တအ် ကၠောန်သ္ပဏာ ပေါဲသာဲခြာ ကုသၟိၚ်ဗဝ်ဒယှ်မက်ဇြဳ ပ္ဍဲဖလာတ်သ္ၚိဍုၚ်အာဂျေန်တဳနာဂှ်တုဲ နကဵုမက်ဇြဳလေဝ် ဒတဴမံၚ်ဒၟံၚ်ပ္ဍဲလဒေါဝ်ဖလာတ်ဂှ်တုဲ ဟီုဏာဂလာန်တၚ်ဂုဏ် ကုပုရိသာတ်ညးတေအ်ကီုရ။
ပြဟ်ဟ်ဏအ်ဝွံ “မက်ဇြဳ’’ဂှ် ကလိဂွံအာယုက် (၃၉) သၞာံ၊ နူကဵုစလုပ်ဝေၚ်ကၠုၚ်လဝ် ပ္ဍဲဂကောံဍုၚ်အာဂျေန်တဳနာဂှ်မ္ဂး ဂွံလၟိဟ်လုပ်ဝေၚ် (၂၀၈) ပေါဲတုဲ ထပၠုပ်လဝ်ဂိုဝ် (၁၂၆) ဂိုဝ်၊ ဖန်ဗဒှ်လဝ်ဂိုဝ် (၆၉) အလန်နွံကၠုၚ်တုဲ ဗွဲကြဴဏအ်ဝွံ မက်ဇြဳ ဒှ်ကၠုၚ်က္ဍိုပ်သ္ကိုပ်ဗဝ် ပ္ဍဲဂကောံဍုၚ်အာဂျေန်တဳနာရ။ ဟိုတ်နူစိုတ်ဓါတ် ပရေၚ်ရုန်ဂ္စာန်တုဲ ကေတ်ကၠုၚ်လဝ် သၠိုၚ်ထဝ်အဆက်က်နွံရ။
မွဲဒမြိပ်ဝေၚ်ပြိုၚ်ပ္ကာန်ရုန်ဂ္စာန်ကၠုၚ်လဝ် ပ္ဍဲကဵုဂကောံဗဝ်ဍုၚ်ဂှ်မ္ဂး ကေတ်လဝ်ကဵုပေါဲအံၚ်ဇၞး သၠိုၚ်ထဝ်ဂၠးတိ (၁) အလန်၊ သၠိုၚ်ကိုဝ်ပါအာမေရိက (၂) အလန်၊ သၠိုၚ်ထဝ်ဖှိုၚ်နေဝ်လဳသဳမာ (၁) အလန်၊ လာဘ်သၠိုၚ်ထဝ်အိုဝ်လာန်ပေတ် (၁) အလန် ကဵု ပ္ဍဲအခိၚ်အဝဲသၟတ်ဍောတ်ဍောတ် အာယုက် (၁၈) သၞာံတေံဂှ် သီုကေတ်လဝ်ကဵု သၠိုၚ်ဂၠးတိ ယူ – (၂၀) ဂှ် မွဲအလန်နွံကၠုၚ်ကီုရ။
တုဲကၠုၚ်ပ္ဍဲပေါဲပြိုၚ်သၠိုၚ်ဂၠးတိ သၞာံ (၂၀၂၆) ဏအ်ဂှ် ညးတေအ် ယိုက်ထၜပတိုန်ဏာ ဂကောံဗဝ်ဍုၚ်အာဂျေန်တဳနာတအ် စဵုကဵုစိုပ်အဆံၚ်ဖှိုၚ်နေဝ် ပၠံၚ်သၠိုၚ်ထဝ်မာန်တုဲ ၜိုန်ရဟွံကလိဂွံသၠိုၚ်ထဝ်ကီုလေဝ် မက်ဇြဳ ထ္ၜးဏာအစောန်စရာဲဇိုၚ်ပေၚ်ၚ်ရောၚ်ဂှ် ညာတ်ကေတ်မံၚ်အိုတ်ရ။
မက်ဇြဳ ဒေါံဇူအာနူဂကောံဗဝ်ဍုၚ်သာ်ဏအ်ဂှ် နကဵုပုရိသာတ်ဍုၚ်ညးတအ်၊ ပရိတ်သာတ်ကဵုမံၚ်ဇြဟတ်မ္ၚးဏအ်ကီု၊ ကောန်ဂကောံဗဝ်ဍုၚ်အာဂျေန်တဳနာ မွဲကရောၚ်တအ်ကီုဂှ် ဂိုဟ်ကဟောံမံၚ်အိုတ်တုဲ သီုကဵုကေတ်မံၚ်ဂုဏ်စရာဲ လတူမက်ဇြဳလၟိုန်ရဂှ် ချူပတိုန်မံၚ်ပ္ဍဲမုက်လိက် ဗီုညးကဵုညးအိုတ်ရ။