အတိုင်ဝန်ဇၞော်ကေင်ကာပယျဵု ကေုာံ ပရေင်ဂီုကၠီု တွဵုရးဍုင်မန် စၞောန်လဝ်ဂှ်မ္ဂး ပ္ဍဲကဵုသၞေဟ်ကင်စၟဳစၟတ်ဒဵုခရီု မပံက်လဝ် အပ္ဍဲပွိုင်ဍုင်ကျာ်မြဟ်ဂှ် အာတ်ကေတ်မံင်အကံက်သြန် ဟွံမွဲကဵုသၞောတ်ဗ္ၜတ်တုဲ ညးဍုင်ကွာန်တံ အာကၠုင်ခက်ခုဲမံင်ရောင် ဂွံတီကေတ်ရ။
အတိုင်ညးဗြဴဒေသကအ်သိုခ်မွဲတၠဟီုဂှ် ကောန်ဂကောံကေင်ကာပယျဵု ကေုာံ ပရေင်ဂီုကၠီု သၟဝ်တဲကမ္မယှေန်ပၞာန် ဇြဟတ်ၜိုတ် (၂၀) တံ ကေတ်လျိုင်ဖျေံလဝ်ဂီုကၠီုတုဲ ညးတတ်ကၠောံအာကၠုင်မွဲတၠမ္ဂး အာတ်ကေတ်မံင်သြန် အကြာၜါဠက်ဒကေဝ်ရောင် ဂးရ။
“ကၠာတေံတှ်ေ ကာမွဲမဂှ် ၜိုတ်စေတနာနွံဟေင် ဒးကဵုရ၊ ၜိုတ် (၅၀၀၀၊ ၁၀၀၀၀) ပိုဲတံကဵုရ။ ဆဂး အပ္ဍဲဂိတုဏံ မၞိဟ်မွဲတၠဂှ် အာတ်ကေတ်မံင် ဒဵုကဵုမွဲဠက်ဘာ်၊ ၜါဠက်ရ။ ညးအာသေံကဵု ညးဒေသတံ ဟွံပါ်ရပုဟ်။ သီုဖအိုတ် ညးမွဲတၠ ဒးကဵုမွဲဠက်ဘာ်ရ” သာ်ဝွံ ဟီုရ။
သၞေဟ်ကင်စၟဳစၟတ်ဒဵုခရီု ကမ္မယှေန်ပၞာန်တံဝွံ နွံတန်တဴဒၟံင် ပ္ဍဲကွာန်ခရီု၊ ပွိုင်ဍုင်ကျာ်မြဟ်တုဲ ဖျေံလဝ်သဇိုင် ပ္ဍဲလ္တူဂၠံင်မတ်မလီု-ရမ္မဝတဳ မဆက်စၠောံလဝ်ကဵု ကွာန်ကအ်သိုခ်၊ ကအ်ဇြဲ၊ ကြေဝ်ဏာ၊ သင်ကၠံ၊ ဓမ္မသကဵု ကွာန်ကအ်ဗိန်တံရ။
စၞးဝန်ဇၞော်ကေင်ကာပယျဵု ကေုာံ ပရေင်ဂီုကၠီု တွဵုရးဍုင်မန် သ္ကိုပ်ဗိုလ်ဇၞော်ကျဝ်ဇြဲမျေအ် ယၟုပရေံမံက်ဒၟံင် ဆေင်စပ်ကဵု ဝိုင်ဝေင်္ၚှင်လံင်သြန်ဟွံလုပ်သၞောဝ်၊ ပရေင်စလာဘ်ဗဇဴ၊ ပရေင်သွံရာန်ဗၞိက်သေံဟွံလုပ်သၞောဝ်ဂှ် ပြံင်လှာဲခါန်ကၞက်ဏာ သ္ကိုပ်ဗိုလ်ဇၞော်ယျေဝ်ထောဋ်ရောင် အလဵုအသဳကမ္မယှေန်ပၞာန်တံ လလောင်ပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၂၁) တုဲကၠုင်ဏံရ။
ဗွဲကြဴနူလိက်လလောင်တိတ်ကၠုင်တုဲဂှ်မ္ဂး စရိတ်ညးဒေသတံ ဒးကဵုအကံက်သၞေဟ်ကင်ဂှ်လေဝ် ပြံင်လှာဲအာလဝဲါဂှ်ရောင် ဂွံတီကေတ် နူညးနွံကြပ်ကဵု ပွဳဗွိုင်သၞေဟ်ကင်စၟဳစၟတ်ဒဵုခရီုဂှ်မွဲကဆံင်ရ။
အခိင်ကာလဝှ်သှ်ပဝါဏံ အာလ္ၚောဝ်ကလအ် ညးအာယုက်ဇၞော်တံကီု၊ ဟိုတ်နူအကာဲအရာ ပရေင်ထတ်ယုက်တုဲ အာလွဳလွတ်ပ္ဍဲဍုင်မတ်မလီုကီု ဒးတတ်ကၠောံအာကၠုင်သၞေဟ်ကင်ဂှ်ရ ယဝ်ဒးဆက်ကဵု စရိတ်သၞေဟ်ကင် အတိုင်လၟုဟ်ဏံမ္ဂး စရိတ်တရဴ သၠုင်တိုန်ကၠုင်မာန်ရောင် ဂးရ။
ပ္ဍဲအခိင်ရာသဳက္ညင်ဏံ နကဵုဂကောံသၟဝ်တဲဒပ်ကမ္မယှေန်ပၞာန်တံ အာတ်ကေတ်သြန် ဟွံမွဲကဵုသၞောတ်ဗ္ၜတ်တုဲ ဗီုကဵုဖန်ဗဒှ်ဒၟံင် ဂၠံင်ဍာန်သြန်လုပ်မွဲရောင် ဂးရ။
ဟိုတ်ဂှ်ရ စရိတ်အကံက်သြန် လ္တူညးအာတရဴကၟိန်ဍုင်သေံကဵု ညးဒေသတံဂှ် စၟတ်ကဵုဗွဲတၞဟ်ခြာညိ ညးဒေသကွာန်ခရီုတံ အာတ်မိက်လဝ်ရ။
“ဂိတုဏံရ စတုဲတှ်ေ ကံက်ဂလိုင်လဝ်၊ ဝှ်သှ်ဝါတှ်ေ ညးတတ်ကၠောံအာကၠုင်တံ ဂၠိုင်မံင်လေဝ်၊ သွက်ဍေံတံ ဂွံသြန်လုပ်ဂၠိုင်အာရ၊ ဆဂး သွက်ညးဒေသတံ ဟွံပြေပြံင်ပုဟ်” သာ်ဝွံ ဟီုရ။
ညးဒေသတံ မဒးဆဵုဂဗမံင် ပြဒ္ဒညာစရိတ်အကံက်သြန်သၞေဟ်ကင် ဟွံမွဲကဵုသၞောတ်ဗ္ၜတ်လၟုဟ်ဏံဂှ် ဟိုတ်နူဂကောံကေင်ကာပယျဵု ကေုာံ ပရေင်ဂီုကၠီု သၟဝ်တဲကမ္မယှေန်ပၞာန်တံ ကၠောန်သ္ပမံင်တိုက်ရိုက်ဂှ်ရ နကဵုညးစၞးကၠတ်ထဝ်ကီု သီုသ္ကိုပ်အုပ်ဓုပ်ကွာန်/အရာပ်တံလေဝ် လုပ်စိုပ်ပသောင်ကဵုဟွံမာန်ရောင် ဂွံတီကေတ်ရ။