ပ္ဍဲဒေသပယျဵုကျာ်ပိဂှ် င္ရုဟ်ကပေါတ်သေံ ၜိုန်ရၚုဟ်မးနွံမံင်အတိုၚ်တြေံကီုလေဝ် ကပေါတ်ဗၞိက် ဇွောံမစသုင် မကၠုင်နူလ္ပာ်ဍုင်ဗၟာနာနာသာ်ဂှ် ၚုဟ်သၠုၚ်တိုန်ဒၟံၚ်ဖအိုတ်ရောၚ် ညးဒေသကျာ်ပိတအ် ဟီုထ္ၜးအိုတ်ရ။
“ကပေါတ်ဗၞိက်သေံဂှ် တိုန်ဟွံဂၠိုၚ်ကွေံ၊ ကပေါတ်ဗၟာဂှ်ရ တိုန်ဂၠိုၚ် အခိုက်ဍုၚ်ဗၟာဂှ် ညးညးအဲအဲ တီဒၟံၚ်ဖအိုတ်ရ ထ္ၜးဟိုတ် ပရေၚ်ဍုၚ်ကွာန်ဟွံညိၚ်ဝတ်ကီု၊ ဗြဲဂူဇၞော်တုဲ ဂၠံၚ်ဍာန်အာကၠုၚ်ပရေံကီု၊ ဒးကဵုကံက်သၞေဟ်ကၚ် ဇၟာပ်ဒၞာဲဂၠိုၚ်တိုန်ကီု၊ ခရိတ်အိုတ်ဂၠိုၚ်နာနာသာ်တုဲ ၚုဟ်ကပေါတ်ဗၞိက် သၠုၚ်တိုန်ဒၟံၚ်ဖအိုတ်ရောၚ်” သာ်ဝွံ ညးဍုင်ကျာ်ပိမွဲတၠ ဟီုထ္ၜးရ။
ပြဟ်ဟ်ဏံ ကပေါတ်ဇွောံမစၞစ မကၠုင်နူဍုင်ဗၟာ င္ရုဟ်ကသိုန်ဗ္ကေတ်မွဲကဳလိုဝ် နူ (၄၂) ၜါတ်ဂှ် ဒှ်အာ (၄၈) ၜါတ်ကီု၊ ကသိုန်ဗ္တာၚ်မွဲကဳလိုဝ် နူ (၈၀) ၜါတ်ဂှ် တိုန်အာ (၉၀) ၜါတ်ကီု၊ သ္ၚုမောဝ် (ပေါ်ဆန်မွှေး) မွဲရိုက် င္ရုဟ်မးနူ (၁၅၀၀) ၜါတ်ဂှ် ဒှ်အာ (၁၈၀၀) ၜါတ်ကီုတုဲ ကပေါတ်ဗၞိက်တၞဟ်ဟ်ဂမၠိုၚ်လေဝ် ၚုဟ်သၠုၚ်ဒၟံၚ်ညိညိနွံဖအိုတ်ရောၚ် ညးသွံရာန်ဖျာလ္တူဍုင်ကျာ်ပိမွဲတၠ ဟီုရ။
စပ်ကဵုကပေါတ်ဗၞိက်ဗၟာ မဇက်ပ္တိတ်နင်လဝ်နူဍုင်လ္ဂုင်မွဲအဆံင် ဂွံစိုပ်ဒေသကျာ်ပိဂှ် ခရိတ်အကံက်အခေါန် အကြာသၞေဟ်ကင် ဒပ်ပၞာန်တၠအဝဵုကဵု ဒပ်ပၞာန်ပၠန်ဂတးတအ် ဒးကဵုဂၠိုင်တိုန်မံင်ကီု၊ တုဲမ္ဂး အခိင်ဝွံ ဟိုတ်နူဒှ်အခိင်ဗြဲ အာကၠုင်ခက်ခုဲသၟးဟွံက င္ရုဟ်ကၠေင်စက်လေဝ် သၠုင်တိုန်မံင်ကီုဂှ်ရ င္ရုဟ်ကပေါတ်တအ်ဂှ် ဗက်သၠုင်တိုန်ကီုရောင် ညးဒဳကွဳစက်သၠာစှ်ဖ္ဍိုက်ဇက်ကပေါတ်ဗၞိက်သေံကဵုဗၟာ မွဲတၠဂှ် ဟီုထ္ၜးရ။
ကပေါတ်ဗၞိက်ဇွောံမ မပါလုပ်စၞစသုင် နူလ္ပာ်ကုန်သေံ (ပယျဵုကျာ်ပိ) ဂှ်ဝွံ စနူတ္ၚဲစန် ဒဵုစိုပ်တ္ၚဲသိုက် ပွိုၚ် (၅) တ္ၚဲဂှ် မွဲတ္ၚဲ အောန်အိုတ် ကွဳစက်သၠာပန်ကီု ကွဳစက်သၠာစှ်ကီု လၟိဟ်ဟွံအောန်နူ (၃၀) ဖ္ဍိုက် ဇက်ပ္တိတ်ဏာမံင်လ္ပာ်သြင်ဗၟာနွံရောင် ညးဆဵုနမတ်တအ် လဴထ္ၜးလဝ်ဂှ် ဂွံတီကေတ်ရ။
တၟော်ရံၚ်ကဵုဂိတုတုဲတုဲကၠုင်တေံမ္ဂး အပ္ဍဲဂိတုသေပ်တေမ်ဗါဂှ် ကွဳစက်ဖ္ဍိုက်ကပေါတ်ဗၞိက်သေံ မတိတ်အာလ္ပာ်ဍုင်ဗၟာတေံ ဂၠိုၚ်တိုန်မံင်ရိုဟ်ဒဒှ်တ္ရဲတုဲ စဵုကဵုတ္ရဲချူပရိုင်ဏအ် ပွိုင်မွဲမွဲတ္ၚဲ ကွဳစက်ဇၞော်၊ ကွဳစက်ဍောတ် အောန်အိုတ် အကြာ (၄၀) ဖ္ဍိုက် စှ်ေဒၟံၚ်ရိုဟ်တ္ၚဲနွံရောၚ် ညးဒဳကွဳစက်ဖ္ဍိုက်ဒၟံၚ်ကပေါတ်ဗၞိက်သေံမွဲတၠ ဟီုရ။
ကပေါတ်ဗၞိက် မဇက်ပ္တိတ်ဏာမံင် နူလ္ပာ်သြင်သေံတအ်ဂှ်ဝွံ ဇွောံမစၞစ ဗီုကဵု (မမ)၊ ကၠေၚ်၊ ၜဵုခၞာတ်၊ ရောတ်ဍေဝ်၊ သ္ၚု၊ ဍာ်ဍာတ်တ်နာနာ၊ သုရာနာနာ၊ သၠာကွဳစက်၊ သၠာကွဳလိုန်ဓါတ်၊ ကပေါတ်စက်နာနာစတမ်တအ် ပါလုပ်ရ။
ကပေါတ်ဗၞိက်လ္ပာ်ဍုင်ဗၟာ မပလံၚ်ဗစိုပ်ဒၟံၚ်လ္ပာ်ဍုၚ်သေံဂှ် ကသိုန်ဗ္ကေတ်၊ ကသိုန်ဗ္တာၚ်၊ ၜံက်၊ ဖျေဲဂလာ၊ သ္ၚု၊ ၜဵု၊ ကၠေင်ၜဲ၊ ကၠေၚ်မြက်၊ မၜဲနာနာ ကပေါတ်ဗၞိက်တၞဟ်ဟ်ဂမၠိုၚ်လေဝ် ပါလုပ်မံင်ရောင် အတိုင်ညးသွံရာန်ဗၞိက် ပ္ဍဲဒေသပယျဵုမွဲတၠလဴထ္ၜးလဝ်ဂှ် ဂွံတီကေတ်ရ။