တၠအဝဵုဒပ်ပၞာန်တအ် ခါန်ကၞက်လဝ် သကိုပ်အုပ်ဓုပ်ကွာန် ပ္ဍဲဍုင်မန်ဗွဲမဂၠိုင်ဂှ် ညးဍုင်ကွာန်တအ် ၜိုန်ဟွံဒးဂၞပ်စိုတ်ကီုလေဝ် ဟွံဂံင်ပ္တိုန်ထ္ၜးတုဲ သကိုပ်အုပ်ဓုပ်ကွာန်တအ် ကေတ်သ္ပမာန်ဒၟံင် လတူညးဍုင်ကွာန်တအ် နွံဗွဲမဂၠိုင်ရောင် ညး နွံပၟိက်မိက်ပြံင်သၠာဲ သကိုပ်အုပ်ဓုပ်ကွာန် နူပွိုင်ဍုင်မုဟ်ဍုင်မွဲတၠ ဟီုရ။
“သကိုပ်အုပ်ဓုပ်ကွာန်ဖအိုတ်ဂှ် နူဒပ်ပၞာန်တအ်ဖအိုတ်ရ ခါန်ကၞက်လဝ်ဏောင်၊ ဟွံဒးစိုတ်လေဝ် ဒးပံင်ရ၊ ဒးစိုတ်လေဝ် ဒးပံင်ဂှ်ရ၊ ကောန်ကွာန်တအ်ဟွံဒးစိုတ်တုဲ ပၟိက်ဆန္ဒမိက်ဂွံကလေင်ရုဲစှ် ခါန်ကၞက်တၟိလေဝ် ဒးဖေက်မံင် ရောံဒညမံင်ဒပ်ပၞာန်တအ်တုဲ ဟွံဂံင်ပ္တိုန်ထ္ၜးမွဲ၊ ကောန်ကွာန်တအ်ဟွံဂံင်ပတိုန်ထ္ၜးခ္ဍင် ကေတ်သ္ပမာန် လတူညးဍုင်ကွာန်တအ်ခ္ဍင်” သာ်ဝွံ ညးဍုင်ကွာန်သကုတ်ဒေသပွိုင်ဍုင်မုဟ်ဍုင်ဂှ် ဟီုရ။
သကိုပ်အုပ်ဓုပ်ကွာန်လ္ၚဵုဂှ် ကေတ်မုက်ကဵု ဒပ်ပၞာန်တအ်တုဲ စလာဘ်ဗဇဴ လတူကောန်ကွာန်တအ်ကီု၊ ပံက်ဝိုင်ဝေင်လံင်ဇျှင်ဩန်တုဲ ပလီုဒၟံင် ဒ္ဂေတ်စရိုတ်ကောန်ညးဍုင်ကွာန်တအ်ကီု ဍဵုဍိုက်သ္ပမာန် လတူကောန်ကွာန်တအ်ကီု နွံမံင်ကၠးကၠးရောင်ဂှ်လေဝ် ညးဍုင်ကွာန်ပွိုင်ဍုင်ဇြပ်ဗုမွဲတၠပၠန်ဂှ် ထပ်ဟီုဗီုဏံပၠန်ရ။
“အုပ်ဓုပ်ကွာန်ဒေသပိုဲဏံလ္ၚဵုဂှ် ဗက်ကေတ်စမုက်ကၠးကၠး ဗီုနူလတူတေံစကာဂှ် ဒုင်ဓညိက်ကအ်တုဲ ကၠောန်ဗက်ကၠးကၠး၊ ပရေင်စဩန်မွဲရတီ၊ ပရေင်တၞဟ်တှ်ေ မုဟွံသ္ပတီ၊ ဇကုခိုဟ်တှ်တေုဲ ညးတၞဟ်မုဒှ်ဒှ်၊ ဇေတ်ဇေတ်တေံ စိုပ်အခိင်တှ်ေ ဒးပြံင်သၠာဲဏောင်ဟီုဂှ် ဟွံဒှ်ပြံင်သၠာဲပၠန်၊ ပၟိက်ညးကွာန်တအ်ဂှ်တှ်ေ မိက်ဂွံပြံင်မံင်၊ ဆဂးတှ်ေ ညးတေံသ္ပလဝ်ဗီုလဵုဂှ် ကေတ်ဟွံဒး၊ ပရေင်ရုဲစှ်အုပ်ဓုပ်ကွာန်တၟိဒေသပိုဲဏံ မုလေဝ်ဟွံမိင်ရပုဟ်” သာ်ဝွံ သ္ဂးရ။
သကိုပ်အုပ်ဓုပ်ကွာန် နူကဵုလက်ထက်အလဵုအသဳပၞာန်တအ် ခါန်ကၞက်လဝ်တုဲကၠုင်တေံဂှ် ညံင်ဂွံကိတ်ညဳကဵုသၞောဝ်ဥပဒေ၊ ညံင်ဂွံကလေင်ရုဲစှ်ကဵုတၟိဂှ် တုဲကၠုင်အံက်တိုဝ်ဗာ (၅) တေံ ညးစၞးကၠတ်ထဝ် ဗော်ညဳသၟဟ်မန် နာဲအံင်ထူ သဳကၠဳ ပတိုန်ထ္ၜး သၟာန်လဝ်ပ္ဍဲကောံဓရီုကၠတ်ထဝ်နွံရ။
အတိုင်ဂလာန်သဳကၠဳ ညးစၞးကၠတ်ထဝ် နာဲအံင်ထူ သၟာန်သၟုက်လဝ်ဂှ် ပ္ဍဲကောံဓရီုကၠတ်ထဝ်ဍုင်မန် အံက်တိုဝ်ဗာ (၈) ဂှ် ဒှ်ပါ်မာဲတုဲ ညးစၞးကၠတ်ထဝ်ဍုင်မန် ဖအိုတ် နွံ (၃၁) တၠဂှ် ညးထံက်ဂလာန် နွံ (၈) မာဲ၊ ညးဒစဵုဒစး ညးစၞးဒပ်ပၞာန်တအ်ကဵု ညးစၞးဗော်ကျဖောအ်တအ် (၁၅) တၠ သှ်ေညးစၞး (၅) တၠဂှ် ဟွံကဵုမာဲတုဲ လ္ပာ်ဒစဵုဒစးတအ် ဂွံမာဲဂၠိုင်တုဲ ဂလာန်ပြံင်သၠာဲ သကိုပ်အုပ်ဓုပ်ကွာန်ဂှ် ကျအာရ။