ဘာကျာ်ဓာတ်သော်ဒဵုတၟံဗြာတ် “ထပိုဲဍောတ်” ၊ ပွိုင်ဍုင်ရေဝ်၊ တွဵုရးဍုင်မန် မဒုင်မံင်ဒါန်ကပေါတ်ဓရိုတ် သွက်ဂွံသောန်ခၞိင်ဂှ် ပ္ဍဲလ္ဒောဝ်ဂိတုနဝ်ဝေမ်ဗာတေံ ဒေံါဇူပရေင်ဒုန်ဒါန်ဣရရောင် ဂွံတီကေတ် နူဒါယကာကျာ်ဇၞော်အ္စာပုပ္ဖရမ္မ “ထပိုဲဍောတ်” ရ။
သွက်ဂွံသောန်ခၞိင်ဓရိုတ်ဇၞော်အိုတ်စတုတ္ထ ပ္ဍဲကၟိန်ဍုင်ဗၟာ နယၟု “ရာမည အတုလ ဓမ္မရာဇိက” မၞုံသၠုင် (၁၈) ပေ၊ သမၠဲ (၉) ပေ၊ လျိုင် (၂၅) တာန်ဂှ် ကျာ်ဇၞော်အ္စာဒဵုတၟံဗြာတ် “ထပိုဲဍောတ်” က္ဍိုက်က္ဍိုပ်စဳဇန်ဒၟံင်တုဲ အခိင်လၟုဟ်ဏံ ဒုင်မံင်ဒါန် ကပေါတ်ဓရိုတ်ဂမၠိုင်ရောင် ဂွံတီကေတ်ရ။
ညးတၠဒါန်နူဒေသနနာ မကဵုလဝ်ဒါန်ကပေါတ်ဓရိုတ် (၈) တာန်ပြင်နွံတုဲ သွက်ဂွံသောန်ခၞိင်ဓရိုတ်ဂှ် အခိင်ကြပ်ကၠုင်ဂှ်ရ ဒေံါဇူအာ ပရေင်ဒုင်ဒါန်ရောင် ဒါယကာကျာ်ဇၞော်အ္စာမွဲတၠ ဟီုရ။
“တ္ၚဲက္တိုန်ပေင်ဂှ်တှ်ေ ဒေံါဇူ ပရေင်ဒုင်ဒါန်ဓရိုတ်ရ။ သှ်ေမံင်တံဂှ်တှ်ေ သွက်ဂွံရာန်ဂှ် ဂရင်ပ္တီ (လျှောက်) လဝ် အလဵုအသဳရ။ တုဲတှ်ေ သွက်ဂွံသောန်ခၞိင်ဂှ်လေဝ် အခိင်ကြပ်ကၠုင်ယျ။ ညးတၠဒါန်တံဂှ်တှ်ေ ဒဵုကဵုအခိင်လၟုဟ် ကၠုင်စိုပ်ကဵုမံင်ဒါန်ရ” သာ်ဝွံ ဒါယာကာဂှ် ဟီုရ။
ပၞောဝ်ကဵုကပေါတ်ဓရိုတ် ကၠုင်စိုပ်မကဵုလဝ်ဒါန်ဂမၠိုင်ဂှ်မ္ဂး ညံင်ဟွံဂွံသောန်ဒး ကပေါတ်ဓရိုတ်တြေံတြဟ် မနွံကဵုၚုဟ်မးဂမၠိုင်ဂှ် ဒက်ပ္တန်လဝ် ဂကောံဂေါပက စၟဳစၟတ်ဓရိုတ်မွဲဂကောံတုဲ စၟဳစၟတ်ဒၟံင် ကပေါတ်ဓရိုတ်ဂမၠိုင် ဗွဲမချိုတ်ပၠိုတ် (ဗွဲမစှေ်ကဵုနဲကဲ) ရောင် ဂွံတီကေတ်ရ။
သွက်ဂွံသောန်ခၞိင်ဂှ်မ္ဂး အပ္ဍဲဂိတုနဝ်ဝေမ်ဗာဂတဏံ ကျာ်ဇၞော်အ္စာ “ထပိုဲဍောတ်” ကဵု ဒါယာကာဂမၠိုင်တံ အာချုက်လိက်ကမၠောန် ပ္ဍဲဍုင်အဝ (မန္တလေး) တေံတုဲ အပ္ဍဲဂိတုမေ၊ သၞာံ (၂၀၂၇) တေံ သွက်ဂွံသောန်ခၞိင်ဓရိုတ်တုဲဒှ်ဂှ် ရန်တၟံလဝ်ရောင် ဂးရ။
သောန်ခၞိင်ဓရိုတ်ဂှ်တုဲဒှ်မ္ဂး စွံအာနဓုပ်ပြကာ “ပြသာဒ်” ၊ ပ္ဍဲမုက်ရင် “ရင်ပြင်တော်” ဘာတိုက်ပိဋကတ်၊ ဌာန်ပ္တန်သာသနာ၊ ဘာကျာ်ဒဵုတၟံဗြာတ် “ထပိုဲဍောတ်” ဂှ်ရ။
ပ္ဍဲဌာန်ပ္တန်သာသနာ ကျာ်ဇၞော်အ္စာ “ထပိုဲဍောတ်” ဝွံ နဒဒှ်စၟတ်သမ္တီ ပရေင်သိုင်ခၞံ ဘာစေတဝန်၊ စေတဳပုပ္ဖရမ္မ ဓမ္မရာဇိက ကေုာံ တိုက်လိက်တၟံပိဋကတ် မပါလုပ်စေတဳ (၁၅၀၀) ဇကုပြင် အံင်ဇၞးတုဲဒှ်ဂှ်တုဲ စဳဇန်သွက်ဂွံသောန်ခၞိင်ဓရိုတ်ဏံရောင် ဂွံတီကေတ်ရ။