နူတနေံဏအ် ဂိတုအံက်တဝ်ဗာ စၟတ်တ္ၚဲ (၅) ၊ ပ္ဍဲဒေသကမ္မရဳ ကၟိန်ဍုၚ်သေံ ဒၞါဲခဒမ်ရုၚ်ဂဥုဲ မၞုံပွိုၚ်ဍုၚ်တာမံၚ် ခြိုၚ်စွံလဝ် ညးအာယုက်ဇၞော်ကဵု ညးမၞုံယဲစိုတ်တအ် နကဵုဗွဲဟွံလုပ်သၞောဝ်ဂှ် ညးတာလျိုၚ်ဗၠာဲသၟိၚ်သေံ (CIB) တအ် လုပ်အာစိုပ်စၟဳစၟတ်လဝ်နွံရောၚ် ဂွံတီကေတ်ရ။
အပ္ဍဲကဵုခဒမ်ရုၚ်ဂဥုဲဏအ်ဝွံ လွဳလွတ်ရံၚ်စံၚ်ထိၚ်ဒဝ်မံၚ် ညးအာယုက်ဇၞော် ကဵု ညးမၞုံကဵုယဲစိုတ်တအ်တုဲ ဂဥုဲဇဗဟွံမိက်သုၚ်တအ်ဂှ် ကဵုဇြဟတ်ဓရိုဟ်တုဲကဵုသုၚ်လေဝ်နွံ နနဲအဓမ္မ ဒးဒုၚ်ဘပၠ ဒးဒုၚ်သ္ပမာန်ဍဵုဍိုက်မံၚ်နွံတုဲ ကမၠောန်ဏအ်ဂှ် ကၠောန်မံၚ်နကဵုဗွဲဟွံလုပ်သၞောဝ်ရောၚ် ညးဒေသမစုက်လုက်မံၚ်ကဵု မၞိဟ်တၠယဲမွဲတၠ ဟီုလဴထ္ၜးလဝ် ကုညးတာလျိုၚ်ဗၠာဲသၟိၚ်သေံတအ်ရ။
ကမၠောန်ဗီုတဏအ်ဂှ်မ္ဂး ထေက်ကဵုဒးကေတ်အရေဝ်မာန်ရောၚ် အတိုၚ်ညးဒေသတအ် ဟီုလဴနၚ်ဂှ် ညးတာလျိုၚ်ဗၠာဲသၟိၚ်သေံ (CIB) တအ် လုပ်အာစိုပ်စၟဳစၟတ် ဂွံဆဵုကေတ် ကၠောန်ခၞံလဝ် နကဵုဗီုပြၚ်ခရိုၚ်ပသဲ၊ ကၟာတ်လဒဵု ဒၞါလဝ်နကဵုပသဲဂှ်ကီု၊ ပ္ဍဲကဵုရုၚ်ဂဥုဲဂှ်မ္ဂး တုပ်တဴညံၚ်ရဴ ဒၞါဲကောန်ထံၚ်တအ်ဒၟံၚ်တန်တဴရ။
ညးက္ဍိုက်က္ဍိုပ်မာန်နေဂျာ မၞိဟ်ဗြဴမွဲတၠဏအ်ဝွံ ကလိဂွံလဝ်တဆိပ်ဒဳဂရဳ အ္စာသဝ်ဝန် (အ္စာဂဥုဲ) မွဲတၠတုဲ ကၠာတေံ သီုလုပ်ကၠောန်သ္ပမံၚ်အ္စာဂဥုဲ ပ္ဍဲရုၚ်ဂဥုဲပုဂ္ဂလိက ဍုၚ်ကမ္မရဳဂှ်နွံရ။ ပ္ဍဲသၞာံ (၂၀၀၆) ဂှ် စပံက်ပ္တန်ကၠုၚ် ခဒမ်ရုၚ်ဂဥုဲလွဳလွတ် ညးအာယုက်ဇၞော်ကဵု ညးမၞုံယဲစိုတ်တအ်တုဲ စဵုကဵုလၟုဟ် ပံက်လွဳလွတ်မံၚ် မၞိဟ်ယဲတအ်ဖိုဟ်ဏီရောၚ် ဂွံတီကေတ်ရ။
တုဲပၠန် သၞာဲဒဴ ညးကၠောန်မံၚ်ကမၠောန် ပ္ဍဲခဒမ်ရုၚ်ဂဥုဲတအ် တၚ်နၚ်သက်သဳဂဥုဲမွဲမွဲသာ် နွံ/ဟွံမွဲဂှ် ညးတာလျိုၚ်ဗၠာဲသၟိၚ်သေံတအ် စၟဳစၟတ်အာတုဲ ယဝ်ဆဵုဒးဒုဟ်ဒဏ်မွဲမွဲသာ်မ္ဂး နကဵုအမှုရာဇဝတ်မွဲ ကဵုဒုဟ်ဒဏ်ကေတ်အာအရေဝ်မာန်ရောၚ်။
ပြဟ်ဟ်ဏအ်ဝွံ ညးတာလျိုၚ်ဗၠာဲသၟိၚ်သေံ (CIB) တအ် လုပ်အာစိုပ်ချဳဒရာၚ်စၟဳစၟတ်မံၚ် ပ္ဍဲခဒမ်ရုၚ်ဂဥုဲဂှ်တုဲ နူကဵု CCTV ဂှ်မွဲတဆံၚ် ကပှ်တၚ်နၚ်သက်သဳတုဲဒှ်အိုတ်မ္ဂး ပရေၚ်ဒဒှ်ဍာံဂှ် ကလေၚ်ဓမံက်ထ္ၜး ကုညးဍုၚ်ကွာန်တအ်ပၠန်ရောၚ် ဂွံတီကေတ်ရ။
Photo: Thai News