ပ္ဍဲကဵုဂၠံင်ကၟာဝက် – ကၠအ်သတ်၊ ပွိုင်ဍုင်မုဟ်ဍုင်၊ တွဵုရးဍုင်မန်ဂှ် ဂကောံသၟဝ်ဒပ်ပၞာန်တံ ရပ်ကော်ဏာ သၟတ်ဒေသ (၂) တၠတုဲ ဒးကဵုသြန် (၂၀၀) ကိုဋ်ဒကေဝ်ရောင် အတိုင်ညးဒေသမုဟ်ဍုင် မစုက်လုက်ကဵု ညးတၠခန္ဓ (၁) တၠ ဟီုလဝ်ဂှ် ဂွံတီကေတ်ရ။
ပ္ဍဲဂိတုသေပ်တေမ်ဗာ သတ္တဟလက္ကရဴအိုတ်တုဲကၠုင်ဏံ ဂကောံသၟဝ်ဒပ်ပၞာန် ဗွိုက်လ္တက်လဝ်ကယျိုင်အရာပ် (၆) တၠ မရပ်လဝ်လွဟ်ဂှ် မင်ဒၟံင် ပ္ဍဲဒၞာဲသ္ကုတ်ဂၠံင် ကၟာဝက် – ကၠအ်သတ်မွဲဒၞာဲဂှ်တုဲ ရပ်ဏာ သၟတ်စဴနူကမၠောန် (၂) တၠဂှ်ရ။
ဗွဲကြဴဂှ်မ္ဂး ဂကောံသ္ၚိကၟိန်တံ ဒးအာကဵုသြန် (၂၀၀) ကိုဋ် ဒၞာဲမချိင်ဖာတ်လဝ်ဂှ်ရောင် ဂးရ။
“လောန်ကၠုင်ၜိုတ်ၜါပိတ္ၚဲဂှ်ရ က္လေင်ဗၠးကၠုင်တုဲရ။ ဍေံတံ ဗာ်အောန်တုဲက္လေင်စဴကၠုင် ၜိုတ် (၆) နာဍဳဂှ် ရပ်ဏာရ။ ချိင်မွဲဒၞာဲ ဂးတုဲတှ်ေ က္လေင်နုက်ရ” သာ်ဝွံ ညးဒေသမုဟ်ဍုင်ဂှ် ဟီုရ။
ဂကောံပၞာန်ကွာန်၊ ဂကောံ(နယ်လုံ)၊ ပျူသဝ်ထဳ မၞုံသၟဝ်ဒပ်ပၞာန် မဗွိုက်လ္တက်လဝ်က ယျိုင်အရာပ်တံဂှ် ဓရတ်ကေတ်မံင်သြန် နကဵုဗီုပြင်နာနာ (ဗီုပြင်ဇဳ) တုဲ သွက်ဂွံက္လေင်နုက်နကဵုသြန် ပ္ဍဲဗဒိုပ်ဗၠာဲသၟိင် ကေုာံ ဗဒိုပ်ဒပ်မနွံကြပ်တံဂှ် ကဵုပရိုင်ရ။
“ဂကောံတံဂှ် ဗွဲမဂၠိုင်ရ။ ပၞာန်ကွာန်၊ ဂကောံ(နယ်လုံ)၊ ပျူသဝ်ထဳ ဒပ်ပၞာန်တံ ဗွဲမဂၠိုင်ရ။ ဗက်ရပ်မံင်ဗီုဂှ်နွံရ။ ကွေံကွေံတှ်ေ ယဝ်လ္တက်လဝ်ကယျိုင်အရာပ်ဗီုဏံတှ်ေ တဝ်စၞေဟ်မာန်ရ။ ဍေံတံဂှ်တှ်ေ ရပ်မံင်ဗီုပြင်နာနာရ။ လွဟ်ပါမံင်ရ။ ကာတှ်ေလေဝ် ကၠုင်ဗီုပြင်နာနာရ” သာ်ဝွံ ညးဟီုရ။
ဂကောံသ္ၚိကၟိန်ကဵုသြန်မာန်တံဂှ် ဓရတ်ကေတ်သြန်တုဲ ညးကဵုသြန်ဟွံမာန်တံဂှ်မ္ဂး စကာမံင်နဲကဲ ပၠောပ်စုတ်သွက်ယိုက်ဂၠေင်ပၞာန်ဂှ်ရ ဘပဠမံင် ပရေင်ဂီုကၠီု ညးဒေသတံနွံရ။
တုပ်သာ်ဝွံကီု ပ္ဍဲပွိုင်ဍုင်သဓီု၊ ပံင် ကေုာံ ရေဝ်ဂှ်လေဝ် ဟိုတ်နူအမိင်ဒေသန္တရဂှ်ရ ပရေင်ရပ်စပ်ကေတ်အရေဝ် နွံဒၟံင်ကြပ်အရိုဟ်တ္ၚဲတုဲ ညးက္လေင်နုက်ပ္တိတ်ကဵုသြန်မာန်လေဝ်နွံ၊ ညးလ္ၚဵုတံ ဒးယိုက်ဂၠေင်မံင်ပၞာန်လေဝ်နွံရ။