အပ္ဍဲတွဵုရးဍုင်မန်ဝွံ သၟာင်နူဟွံဂွံပၟတ်ဓာတ်လလဳ ဗွဲလၟေင်ဍာံတုဲမ္ဂး သွက်ဂွံဒုင်ဒဝ်ဂမ္တဴအေဝ်နဳညဵုသ္ကာတ်မြဟ်မာန်ဂှ် ညးရာန်စကာသိုဝ်လာ Solar “ခတှ်ေဓာတ်တ္ၚဲ” ဂၠိုင်ကၠုင်တုဲ ၚုဟ်က္ဍင်တိုန်ကၠုင်ဒၟံင်ရောင် ဆေင်သွံ Solar ကဵု ညးရေင်တၠုင်တောဲဗ္ဂပ် Solar တံ ဟီုရ။
စနူအခိင်ကျာမုတ်သုန်ဆုတ်တိတ် ကၞောတ်ရာသဳကသီုဏံတုဲ ဂမ္တဴပသာန်တ္ၚဲ ပ္ဍဲတွဵုရးဍုင်မန် သၠုင်တိုန်ကၠုင်သိုက်သိုက်တုဲ ပ္ဍဲအခိင်ကာလအေဝ်နဳညဵုကၠုင်စိုပ်ဏံ သွက်ဂွံစကာပၟတ်ဓာတ်လလဳ နကဵုသၞောတ်သိုဝ်လာမာန်ဂှ် ပရဟ်ဒုင်ရာန်တောဲဗ္ဂပ်စုတ် ခတှ်ေဓာတ်တ္ၚဲ Solar ရ။
ဟိုတ်နူဇြဟတ်ရာန်သၠုင်တိုန်ကၠုင်ဂှ်ရ အပ္ဍဲဂိတုမာတ်တုဲကၠုင်တေံ ၚုဟ်ခတှ်ေဓာတ်တ္ၚဲ Solar (၆၀၀) ဝါတ် watt နွံကၠုင်လဝ် ၜိုတ်မသုန်ကိုဋ်ဘာ်ဂှ် အခိင်လၟုဟ်ဏံ စဵုကဵုအကြာ (၈) ကိုဋ်ဒကေဝ် သၠုင်တိုန်အာနွံရောင် ညးတြုံမရေင်တၠုင်တောဲဗ္ဂပ်မံင်သိုဝ်လာ နူပွိုင်ဍုင်ရေဝ်မွဲတၠ ဟီုရ။
“လ္ပာ်ပိုဲတံတှ်ေ ၜိုတ်ကဝက်ကွာန်ဂှ် တောဲဗ္ဂပ်စုတ်လဝ်သိုဝ်လာရ။ အခိင်က္ညင်ဂှ် ပိုဲတံဗ္ဂပ်ကဵု (၄) တၞးဂှ် ဒးၜိုတ် (၈၅) ကိုဋ်ရ။ လၟုဟ်ဏံ တိုန်အာဒဵုကဵု (၁၁၀) ကိုဋ်ရ။ ညးရာန်ဂၠိုင်ကၠုင်တှ်ေ ဒ္ဂေတ်ဍုင်ဏံဂှ် တီမံင်ရတှ်ေ။ ၚုဟ်ဂှ် တိုန်အာဟဂှ်ရ” သာ်ဝွံ ညးဟီုရ။
ဗွဲတၟေင်မ္ဂး ပ္ဍဲကဵုသ္ၚိဒၟံင်ကောန်ၚာ်ဍောတ်ဍောတ် (ကောန်ၚာ်စၜံင်) ကဵု ညးအာယုက်ဇၞော်တံ၊ သွက်စကာကမၠောန်/ဆေင် ကေုာံ ပ္ဍဲဘာဗ္တောန်လိက်ဂမၠိုင်တံ ရာန်တောဲဗ္ဂပ်စုတ်ဒၟံင်ရ။
တန်တဴလ္တူဒၞာဲဒေသ ကေုာံ တဆိပ်ကပေါတ်တုဲ ၚုဟ်တၞဟ်ခြာမာန်ကီုလေဝ် ဇြဟတ်ရာန်ဂၠိုင်တုဲ ကပေါတ်ဟွံရုံဂပ်ဂှ်ရ ၚုဟ်ဆက်သၠုင်တိုန်မာန်ရောင် နူကဵုဗွဝ်ဖျာသွံရာန်သိုဝ်လာတံ သ္ၚဳဂၠိပ်လဝ်ရ။
ညးတာလျိုင်ဆေင်သွံသိုဝ်လာ ဍုင်မတ်မလီုမွဲတၠဂှ် “အဓိကဂှ်တှ်ေ လ္တူဇြဟတ်ရာန်ဂၠိုင်ကၠုင်ဏံဂှ် ဗက် supply ဟွံမာန်ပုဟ်။ Demand ဂၠိုင်ကၠုင်ကွေံကွေံ။ ဠအခါဂှ်တှ်ေ လ္ပာ် supplier ဂှ် ဗက်ဟွံမာန်။ ဗက်ဟွံမာန်တှ်ေ ၚုဟ်တိုန်အာရ။ ဣညအ်ဂှ် သဘဴဓဝ် ဇြဟတ်ရာန် ဇြဟတ်သွံရ” သာ်ဝွံ ညးဟီုရ။
အခိင်ကာလဂမ္တဴသၠုင်မံင် ဗွဲမလောန်ကာဲလၟုဟ်ဏံဂှ် ၚုဟ်စရိတ်အိုတ်ဂွံသက်သာဂးတုဲ သ္ၚိဒၟံင်စကာတောဲဗ္ဂပ်စုတ် နကဵုသၞာတ်ဗၠေတ်မှာတံဂှ် ပၟတ်တူခတိုဟ်ဒၟံင်နွံရ။
ဟိုတ်ဂှ်ရ နကဵုညးစကာသိုဝ်လာဂမၠိုင်တံလေဝ် ကဵုညးစိုန်သကီုတံတောဲဗ္ဂပ်စုတ်ကီု၊ ကပေါတ်တောဲဗ္ဂပ်သိုဝ်လာ မနွံကဵုသၞောတ်ဂီုကၠီုဂှ် ရာန်စုတ်ကီု၊ လ္ပစကာပၟတ် လျိုင်ဇြိုင်နူမစၟတ်လဝ်ဂှ်ကီု ကေုာံ ကၠောန်သ္ပပရေင်စၟဳစၟတ် ဗာတ်ထရဳ၊ အေန်ဗာတာတံ မွဲနှေံမွဲနှေံညိကီုဂှ်လေဝ် ညးရေင်တၠုင်ပရေင်သိုဝ်လာတံ ဟီုဂးဖ္တိုက်ဖၟောဝ်လဝ်ရ။