ပ္ဍဲပွိုင်ဍုင်ကျာ်ထဝ်၊ တွဵုရးဍုင်မန်ဝွံ စပ္တံနူဂိတုအံက်တဝ်ဗာ စၟတ်တ္ၚဲ (၉) စဵုကဵု (၁၅) ဂှ် ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜင်ကျာ၊ စက်ဗရုသာဲ ကေုာံ လွဟ်ဇၞော်တုဲ ကောန်ကွာန်ချိုတ် (၈) တၠ၊ ဒးဝပ် (၁၁) တၠနွံရဂှ် ဗော်သွးကရေင် ကေအေန်ယူ လလောင်ပ္တိတ်လဝ်ရ။
ဂိတုအံက်တဝ်ဗာ စၟတ်တ္ၚဲ (၁၂) တုဲကၠုင်ဏံ အပ္ဍဲကွာန် (ၚှက်ပျောတော) ၊ ပွိုင်ဍုင်ကျာ်ထဝ်၊ တွဵုရးဍုင်မန်ဂှ် ဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵု စက်ဗရုသာဲတုဲ ဥူမေန်ဇြဝ် အာယုက် (၄၃) သၞာံ၊ ဒဝ်ဇြာန်ဒါ ကေုာံ မာံဇြဲဇြေန်ဖျဵု အာယုက် (၂၁) သၞာံတံ ဒးချိုတ်အာလဝ်ရ။
သၟာင်နူဂှ်ပၠန် ဥူချေတ်တေဝ်အံင်ဂှ်လေဝ် ဒးအာဘဲဝပ်ဗွဲမသ္ကာတ်မြဟ် စဵုကဵုဒးကုတ်ထောံဇိုင်ပုင်ရဂှ် ကေအေန်ယူ လလောင်ပ္တိတ်လဝ်ရ။
ဂိတုအံက်တဝ်ဗာ စၟတ်တ္ၚဲ (၁၃) တုဲကၠုင်ဏံဂှ်လေဝ် ပ္ဍဲကဵုကွာန် (အထက်ရွာလေး – အလူးရွာကြီး) ၊ ပွိုင်ဍုင်ကျာ်ထဝ်ဂှ် ဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜင်ကျာဏီရ။
ဟိုတ်နူဒပ်ကမ္မယှေန်ပၞာန် ပန်ဗ္တိုက်ထောံဖျေံဗမ်ဂှ်ရ ကောန်ကွာန်ချိုတ်အာ (၅) တၠ၊ ဒးဝပ် (၁၀) တၠတုဲ သ္ၚိဒၟံင်ဟွံအောန်နူ (၁၃) မဂှ်လေဝ် ဒးလီုလာ်အာကီုရ။
တုဲပၠန် ဒၞာဲညးပဲါဒဴဘဲပၞာန် ဗဒဗဒဲါဇူဒီုဂှ်ကဵု ဒေသပွဳဗွိုင်တံဂှ်လေဝ် ဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜင်ကျာ၊ လွဟ်ဇၞော် ကေုာံ စက်ဗရုသာဲရ။
“ပန်မံင်ကဵုလွဟ်ဇၞော်ဂှ်တှ်ေ ကြပ်ရိုဟ်တ္ၚဲရ။ ပန်ဂေတ်မံင် လ္ပာ်ကွာန်ရ။ ပရေင်ပန်ဗ္တိုက်ကဵုၜင်ကျာဂှ်လေဝ် အကြာတဏံ ဆက်မံင်ဟဂှ်ရ။ မၞိဟ်ဒးဘဲဇီုကပိုက်ချိုတ်ဂျိုင်လေဝ်နွံတုဲ သ္ၚိဒၟံင်တံလေဝ် လီုလာ်အိုတ်ရ” သာ်ဝွံ ညးဒေသကျာ်ထဝ်မွဲတၠ ဟီုရ။
ဂိတုအံက်တဝ်ဗာ စၟတ်တ္ၚဲ (၉၊ ၁၂) ကဵု (၁၅) တုဲကၠုင်ဏံဂှ်လေဝ် အပ္ဍဲဒၞာဲဗွိုင်ကမၠောန် ကေုာံ ဒၞာဲကောန်ညးဍုင်ကွာန်တံ ဒၟံင်တန်တဴဂမၠိုင်ဂှ် ပန်ဗ္တိုက်ကဵုက္ၜင်ကျာ၊ လွဟ်ဇၞော်၊ စက်ဗရုသာဲတုဲ ကပေါတ်ညးဍုင်ကွာန်ပိုင်ပြဳ မပ္တံကွဳလိုန်ဓာတ်၊ ကွဳစက်၊ သ္ၚိဒၟံင်ဂမၠိုင်လေဝ် လီုလာ်အာနွံရ။
ဟိုတ်နူဒပ်ကမ္မယှေန်ပၞာန်တံ ပန်ဗ္တိုက်ကဵုက္ၜင်ကျာ၊ လွဟ်ဇၞော် ကေုာံ စက်ဗရုသာဲတုဲ အပ္ဍဲပွိုင်ဍုင်ကျာ်ထဝ်ဂှ် ညးဒေသလၟိဟ်ကဵုလ္ၚီ ဟွံအောန်နူ (၁၀) ကွာန်တံဂှ်လေဝ် ဒးဂြိပ်ပဲါဒဴအာ ဒၞာဲဗၠးဘဲတေံရ။
ပွဒပ်ကမ္မယှေန်ပၞာန်တံ ကၠောန်သ္ပမံင်ဏံဂှ် သၟာင်နူပိုန်ဒြပ်/လမျီု ညးဒေသ၊ ညးဍုင်ကွာန် ကေုာံ ကမၠောန်ဂယိုင်လမျီုဂမၠိုင် လီုလာ်ဆောံလေင်တုဲ တင်ဝါတ်ဂါတ် မဆေင်စပ်ကဵု ဓဝ်ဗ္စာရဏာဆာန်ဍူမၞိဟ် ကေုာံ ပရေင်ဂီုကၠီု ညးပဲါဒဴဘဲပၞာန်တံဂှ်လေဝ် သာတုဲဒးဆဵုဂဗမံင်ရောင် ကေအေန်ယူ လလောင်ပ္တိတ်လဝ်ရ။