ပ္ဍဲဍုင်မန်ဝွံ လက္ကရဴနူကဵု တၠအဝဵုတအ် ရပ်သီကပေါတ်သေံတုဲဂှ် ကပေါတ်အရပ်စပ်သုင်စောဲသ္ၚိ တိတ်နူသေံနာနာဂှ် ၚုဟ်က္ဍင်တိုန်အာၜါဆဖအိုတ်ရောင် တၠဆေင်သွံရာန်ကပေါတ်သေံ အပ္ဍ္ဍဲဍုင်မန်မွဲတၠ ဟီုထ္ၜးရ။
ကပေါတ်သေံနာနာဂှ် မပ္တံကဵု စၞစကီု၊ အရပ်စပ်ကပေါတ်သ္ၚိဂမၠိုင်ကီု၊ ကပေါတ်စက်ဂမၠိုင်ကီု က္ဍင်တိုန်အာၜါဆဖအိုတ်ရောင် တၠဆေင်သွံရာန်ဂှ် ဟီုရ။
“သၞာံတုဲကၠုင်တေံ ကပေါတ်မွဲမွဲ ၚုဟ်နွံ (၂) လက်တှ်ေ လၟုဟ်နူကဵု ဍေံရပ်ကပေါတ်သေံဒှ်အာတုဲတှ်ေ ၚုဟ်ပဵုက္ဍင်တိုန်အာကဝက် (၂) လက်တှ်ေ ဒှ်အာ (၄) လက်ဒှ်မံင်၊ ကပေါတ်တၞဟ်ဟ်လေဝ် က္ဍင်တိုန်မံင်ကီုရ၊ ဆဂး ကပေါတ်သေံဂှ် က္ဍင် ပဵုတိုန်အာဗွဲဟွံသာရ” သာ်ဝွံ တၠဆေင်သွံရာန်ကပေါတ်သေံဂှ် သ္ဂးရ။
ပ္ဍဲကဵုကပေါတ်အရပ်စပ်ဂမၠိုင်ဂှ် ကပေါတ်ဓာတ်လလဳဂှ် ပဵုက္ဍင်တိုန်ဂၠိုင်တုဲ ကပေါတ်လ္ၚဵုဂှ် ပိုတ်ဒဵုကဵုဗကန်ရာန်ဟွံဂွံရဂှ်လေဝ် တၠဆေင်သွံကပေါတ်ဂှ် ဆက်ဟီုရ။
“ဍေံရပ်ကပေါတ်သေံမွဲအလန်တှ်ေ ကပေါတ်ဂှ် ဍင်တိုန်မွဲတဲရ၊ ကၟာတ်ရပ်ဒဵုကဵုအိုတ်တးလေဝ် ကၟာတ်ဂွံဟွံသေင်ပုဟ်၊ ရဲဆက်စၠောံကဵု တၠအဝဵုတအ်နွံဂှ်တှ်ေ ဍေံပတိတ်ဂွံမံင်၊ ညးတၞဟ်ပတိတ်ဟွံဂွံတှ်ေ ရဲပတိတ်ဂွံဂှ်ရ သွံတြးမံင်ကပေါတ်သေံ စၞစသုင်သေံတှ်ေ ဍေံဗပဵုပ္တိုန်ၚုဟ်က္ဍင်င်၊ ဍေံရပ်ကပေါတ်သေံဏံဂှ် သွက်ရဲအဆက်ဆေန်ကဵု ညးတာလျိုင်တအ်ဂှ်ရ တက်စဏာပရဲ” သာ်ဝွံ တၠဆေင်ဖျာဂှ် ဟီုထ္ၜးရ။
ဍုင်မန်ဂှ် ဆက်စပ်ဒၟံင်ကဵု ပယျဵုဍုင်သေံတုဲ ကပေါတ်ဗၞိက်၊ ကပေါတ်အရပ်စပ်နာနာဂှ် ရပ်စပ်သုင်စောဲစသုင်ဒၟံင် ကပေါတ်သေံဂၠိုင်တုဲ လက္ကရဴနူကဵုတၠအဝဵုတအ် ဖျေံကိုန်စဳဇန်ကၟာတ်ရပ်ကပေါတ်သေံတုဲဂှ် ညးဍုင်ကွာန်တအ် ဒးရာန်စသုင်၊ ဒးရာန်ရပ်စပ်ကပေါတ်သေံ နကဵုၚုဟ်က္ဍင်င်ဖအိုတ်ရ။
ကြဴနူကဵုတၠအဝဵုအလဵုအသဳတအ် ရပ်ကၟာတ်ကပေါတ်သေံတုဲဂှ် ကၠေင်စမွဲလဳတာ နူကဵုအကြာ (၁၀၀၀၀) ဂှ် တိုန်ဒှ်အာ (၂၀၀၀၀) ၊ တုပ်သာ်ဂှ်ကီု ကပေါတ်မပၟတ် နွံၚုဟ် (၂၀၀၀၀) ဂှ် တိုန်ဒှ်အာ (၄၀၀၀၀) ပြင်၊ ဇၟာပ်ကပေါတ်သေံဂှ် တိုန်ဒှ်အာ ၜါၜါဆပြင်ဖအိုတ်ရ။
သ္ပဟိုတ်နူကဵု တၠအဝဵုညးအုပ်ဓုပ်ဍုင်တအ် ဖျေံကိုန်စဳန်ဇန် ရပ်ကၟာတ်လဒဵု ကပေါတ်တိတ်နူသေံဂှ်တုဲ ကွဳစက်ဒမြိပ်လာင်တအ်လေဝ် ဟွံဂံင်ဒုင်တဲပြင်ကပေါတ်တအ်ကီု၊ ပ္ဍဲကဵုကုမ္ပဏဳရေင် တၠုင်ပလံင်ဗစိုပ် ကပေါတ်တအ်လေဝ် ဟွံဂံင်ဒုင်တဲကပေါတ်တအ်ဂှ် ဒှ်ကၠုင်ရ။