ကပေါတ်စသုင် ကေုာံ ကပေါတ်ရပ်စပ်နာနာတအ်ဂှ် မွဲတ္ၚဲကဵုမွဲတ္ၚဲ ၚုဟ်က္ဍင်တိုန်အရိုဟ်တ္ၚဲတုဲ အကာဲအရာၚုဟ်ဗွဝ်ဖျာလၟုဟ်ဏံဂှ် ကၠောန်သဘင်ဇၞော်ဇၞော်မွဲမ္ဂး ဩန်အိုတ်ကဵုလက်ကိုဋ်ဒှ်ရောင် ကမ္မတဳကၠောန်ဗဒှ်သဘင်ဖျဴသွဝ်ကျာ်ဇၞော်အ္စာ ဍုင်မန်မွဲတၠ ဟီုထ္ၜးရ။
“ကပေါတ်ဗွဝ်ဖျာဖအိုတ်ဂှ် မွဲတ္ၚဲကဵုမွဲတ္ၚဲဂှ် ၚုဟ်က္ဍင်တိုန်ဒၟံင်အရိုဟ်တ္ၚဲဟီုဂွံ၊ တ္ၚဲဏံရာန်လဝ် ၚုဟ်သ္ၚုတ္ၚဲဏံ တ္ၚဲယးကလေင်သၟာန်မွဲတဲပၠန်ဂှ် ၚုဟ်ရာန်လဝ်နူတနေံတေံ ဟွံဂွံရ၊ ကပေါတ်ရပ်စပ်တၞဟ်ဟ်လေဝ်ဗီုဂှ်ရ၊ ၚုဟ်ရာန်လဝ်တ္ၚဲဏံဂှ် တ္ၚဲယးကလေင်ရာန်မွဲတဲပၠန်ဂှ် ၚုဟ်တိုန်အာလအ်၊ ဗီုၚုဟ်ဗွဝ်ဖျာတ္ၚဲဏံရတှ်ေ ကၠောန်သဘင်ဇၞော်ဇၞော် ဗီုသဘင်ဖျဴသွဝ်ကျာ်ဇၞော်အ္စာမွဲမွဲတှ်ေ အိုတ်ကဵုလက်ကိုဋ်ဒှ်ဏောင်” သာ်ဝွံ ဂကောံကမ္မတဳကၠောန်ဗဒှ် သဘင်ဖျဴသွဝ်ကျာ်ဇၞော်အ္စာဍုင်မန်ဂှ် ဟီုရ။
ဆက်တုဲ “ဗီုကဵုသဘင်ဖျဴသွဝ်ဇၞော်ဇၞော် ဗီုသၞာံတုဲကၠုင်တေံတှ်ေ အကြာၜိုတ် (၅) လ္ၚီကိုဋ်ဂှ် ကၠောန်သဘင်တုဲမံင်ဏောင်၊ ကဵုၚုဟ်ဗွဝ်ဖျာလၟုဟ်ဏံတှ်ေ ဩန် (၁၀၀၀) ကိုဋ်ဂှ် ဂွံဆၜိုတ်ပြာသာဒ်မွဲဟေင်ရဂွံမာန်၊ အလုံသဘင်ဖျဴသွဝ်မွဲ ဂွံတုဲဒှ်ဂှ် ဗီုလၟုဟ်ရတှ်ေ ဖေက်အိုတ်အကြာဗဒါဲကဵုလက်ကိုဋ်ဟာဟွံတီ” သာ်ဝွံ ညးဆက်ဟီုရ။
လၟုဟ်မ္ဂး သ္ၚုဓမ္မတာမွဲရိုက် (၁၀၀) ပံင်ဂှ် တိုန်ဒှ်အာဗၞတ် (၂) ကိုဋ်ဒှ်တုဲ ကၠေင်၊ မြေက်၊ လသိုန်အိုတ်သီုဂှ် ၚုဟ်က္ဍင်တိုန်ဒၟံင် အရိုဟ်ဒဒှ်တ္ၚဲတုဲ မပ္တံကဵုကပေါတ်အရပ်စပ်နာနာတအ်လေဝ် ၚုဟ်က္ဍင်တိုန်ဒၟံင်အရိုဟ်ဒဒှ်တ္ၚဲကီုရ။
ဩန်ကၟိန်ဍုင်ဗၟာဂှ် ဖေါဝ်တိုန်ဒၟံင်အရိုဟ်ဒဒှ်တ္ၚဲဂှ်ကီု ကပေါတ်စၞစသုင်ကီု ကပေါတ်အရပ်စပ်နာနာသာ်တအ်ကီုဂှ် အဓိက ဒးသ္ပပဓာန်ဒၟံင်ကဵု ကပေါတ်ဍုင်သအာင်ဂၠိုင်ဂှ်တုဲ မွဲတ္ၚဲကဵုမွဲတ္ၚဲဂှ် ၚုဟ်က္ဍင်တိုန်ဗက်အာ မွဲကရောံဩန်ဖေါဝ်ဂှ် ကီုရ။
“ဂွံဒှ်အာဗီုဏံဂှ် ပိုဲဒးဒုင်အာၜါထပ်၊ မုၜါထပ်ရောဟီုတှ်ေ အကာဲအရာ ပရေင်ပိုန်ဒြပ်ဂၠးတိတုဲ ဩန်ဍုင်ပိုဲလေဝ်ဖေါဝ်တုဲ ၚုဟ်ကပေါတ်တိုန်ဂှ်မွဲသာ်၊ မွဲသာ်ပၠန်ဂှ် အလဵုအသဳတၠအဝဵုတအ် ဖန်ဖက်အုပ်ဓုပ်ကောပ်ကာဲ ပရေင်ဗွဝ်ဖျာဟွံလေပ်တုဲတှ်ေ ရဲပံင်ဖက်ကဵုဍေံ (တၠအဝဵုအလဵုအသဳ) တအ်ဂှ်တှ်ေ ပံက်ကဵုလဝ်အခေါင်ပၠုပ်ကပေါတ်၊ ညးဍုင်ကွာန်ဂှ်တှ်ေ ကၟာတ်လဝ်ပရေင်ပၠုပ်ကပေါတ်တုဲတှ်ေ ရဲဂွံလဝ်အခေါင်ပၠုပ်ကပေါတ်တအ်ဂှ် ထ္ၜးဟိုတ်ကဵု ပရေင်ပိုန်ဒြပ်ဂၠးတိတုဲတှ်ေ ခ္ဍင် သၠုင်ပတိုန်ၚုဟ်ကပေါတ်တအ်ဂှ် စၞစသုင်တအ်၊ ကပေါတ်ရပ်စပ်တအ်၊ ၚုဟ်ထဝ်တအ်၊ ၚုဟ်ကာတအ် ဖအိုတ်ရ ဍေံထိင်ဟွံဂွံရ ဗီုဒှ်ဂှ်ရ ဒှ်မံင်” သာ်ဝွံ တၠကမၠောန်ရုင်ဗုတ်ထ္ၜိုတ်ဂတှ်ေ ကဆံင်မုက်ဂၞန် (၁) ဍုင်ဇြပ်ဗုမွဲတၠပၠန်ဂှ် ထပ်ဟီုရ။
ပ္ဍဲကၟိန်ဍုင်ဗၟာဂှ် ကပေါတ်စၞစသုင်အိုတ်သီုဂှ်ကီု၊ ကပေါတ်ရပ်စပ်နာနာသာ်ဂှ်ကီု မွဲတ္ၚဲကဵုမွဲတ္ၚဲ ၚုဟ်တိုန်ဒၟံင် ဟွံပိုတ်သကုတ်တုဲ သ္ၚုဓမ္မတာမွဲရိုက် (၁၀၀) ပံင်ဂှ် ဟွံဒှ်မွဲလှေ် တိုန်ဒှ်အာ ၜါကိုဋ်ပြင်ကီု၊ ဗွဲတၟေင် လသိုန်ဗ္ကေတ်မွဲပသာ ဟွံမိင်မွဲလှေ် တိုန်ဒှ်အာ အကြာၜါလက်ကီုရ။