အခိင်ၚုဟ်သြန်ဗၟာစှ်ေကၠုင်မံင်အဆက်ဆက်ဏံဝွံ နူဂကောံတၠကမၠောန်ထဝ်တံ သွံမံင် ကပေါတ်ကယျိုင်ကယျဝ်ထဝ် မကၠောန်လဝ်ကဵု ထဝ်အပြောံ (ရွေကြမ်း) ကေုာံ ထဝ်ဂမၠိုင် နကဵုသၞောတ်အန်လာင်ဂှ် တၟာတ်ထောံဗွဲယာယဳရောင် ပ္ဍဲဂိတုနဝ်ဝေမ်ဗာ စၟတ်တ္ၚဲ (၃) တုဲကၠုင်ဏံ ဂကောံတၠကမၠောန်ထဝ်ရးလ္ဂုင် ကဵုသမ္တီလလောင်ပ္တိတ်လဝ်ရ။
ကပေါတ်မတၟာတ်လဝ်ဂမၠိုင်ဂှ်ဝွံ သၟာင်နူထဝ်၊ ထဝ်အပြောံ၊ မၞိက်ရတ်တုဲ ကပေါတ်မကၠောန်လဝ်ကဵု ထဝ်အပြောံ ကေုာံ ထဝ်တံလေဝ် ပါလုပ်ကီုရောင် ဂွံတီကေတ်ရ။
ပ္ဍဲကဵုရာန်ထဝ်နူကဵုအန်လာင်ဂှ်ဝွံ ဟိုတ်နူပြဒ္ဒညာ ၚုဟ်မး၊ ဍာ်ဒကေဝ်ထဝ် ကေုာံ လျိုင်ထဝ်ဂှ်ရ သၟာင်နူညးရာန်တံ မဒးဂိကၠုင်နွံဂှ်တုဲ မိက်ဂွံထိင်ဒဝ် ၚုဟ်ထဝ်တိုန်စှ်ေဂှ်ရ တၟာတ်ဒၞာထောံဒှ်မာန်ရောင် တၠဆေင်ထဝ်ဍုင်မတ်မလီုမွဲတၠ ဟီုရ။
“ဗီုကဵုသွံမံင်ပ္ဍဲဆေင်ဂှ် ဂွံရ၊ လ္တူအန်လာင် လ္တူသဵုယှေဝ်မဳဒဳယာဂှ် ကၠောန်သ္ပလလောင် ဂွံရ။ ဆဂး Live Sale ဟွံဂွံပုဟ်၊ ဗ္ကန်နူအန်လာင်တုဲ ကဵုပလံင်ဟွံဂွံပုဟ်။ ညးရာန်တံ အာရာန်ပ္ဍဲဆေင်ဂွံရ။ အဓိပ္ပဲါဗီုဂှ်ရ” သာ်ဝွံ ဟီုရ။
ဂကောံတၠကမၠောန်ထဝ်တံဝွံ ၚုဟ်ဒဝ်လာ ကေုာံ ၚုဟ်ထဝ် သ္ဂောံညိင်ဝတ်ဂှ်မ္ဂး ပြဟ်ပြဟ်ဏံ ညံင်ဂွံဒှ်ထံက်ပင် ပရေင်ရေင်တၠုင်ထိင်ဒဝ်ဂှ် တၟာတ်ထောံဒှ်ရောင် ဓမံက်ထ္ၜးလဝ်ရ။
အခိင်လၟုဟ်ဏံဝွံ ကမၠောန်ပ္တိုန်စရင်ကဵုလဝ်အခေါင်ဂမၠိုင်ဂှ် ဟွံဗပဵုကဵုအာယုက်တုဲ ကမၠောန်သွံမၞိက်ရတ်တၞဟ်ခြာဂမၠိုင်ဂှ် နကဵုဒုင်ကအ်ပါင်ဟေင် ကဵုအခေါင်သွံနွံရောင် ဓမံက်ထ္ၜးလဝ်ရ။
စပ္တံနူဂိတုအံက်တဝ်ဗာ၊ သၞာံ (၂၀၂၃) စဵုကဵု ဂိတုအံက်တဝ်ဗာ စၟတ်တ္ၚဲ (၉) ၊ သၞာံ (၂၀၂၆) ဏံ နကဵုဂကောံကပေါတ်မၞိက်ရတ်ဂှ် လိက်စၟတ်တဲပ္တိုန်လဝ်စရင် online Sale နွံ (၈၁၁) တၞးတုဲ လိက်တၞးအာယုက်အိုတ် (၅၇၀) တၞး နွံရဂှ် ဂွံတီကေတ်ရ။
ကပေါတ်မကၠောန်လဝ်ကဵု ထဝ် ကေုာံ ထဝ်အပြောံဂမၠိုင်ဂှ် အခေါင် (လာင်ဇြေန်) သွံ နူကဵုမုက်လိက်ပရေင်မၞိဟ်မွဲတဆံင် ဟွံမွဲမွဲသာ် ယဝ်သွံမ္ဂး ဒးဒုင်ကေတ်အရေဝ်ကဵု သၞောဝ်ဥပဒေရေင်တၠုင်ဗၞိက်ကိစ္စဇၞော်မာန်ရဂှ်လေဝ် ကဵုလဝ်သမ္တီရ။
အပ္ဍဲတ္ၚဲအကြာတဏံဝွံ ၚုဟ်မးသြန်ဗၟာစှ်ေမံင်တုဲ ပ္ဍဲကဵုၚုဟ်ပံက်ဒၟံင်မ္ၚးဂှ်မ္ဂး သြန်ဗၟာမွဲကိုဋ်ဂှ် သြန်သေံ (၆၉၀) ၝာတ်နွံရောင် ဂွံတီကေတ် နူညးကၠောန်မံင်ကမၠောန်လှောဲသြန်မ္ၚးတံရ။