တ္ရဲဏအ် (ဂိတုနဝ်ဝေမ်ဗါ ၁၆) အကြာအခိင် (၁) နာဍဳလ္ဒောဝ်တ္ရဲဂှ် ပေါဲဗ္တိုက်ဟွံဒှ်မွဲသာ် နူကဵုဒပ်ပၞာန်ဗၟာ ကၠုင်ပန်ဗ္တိုက်ကဵုက္ၜင်ကျာ ပ္ဍဲကွာန်ချေံဍာ် မၞုံပွိုင်ဍုင်ရေဝ်ဂှ်တုဲ ကောန်ကွာန်တအ် ချိုတ်ဒးဝပ်နွံရောင် ဂွံတီလဝ်ပရိုင် ဗွဲကိုပ်ကၠာရ။
လဂွံကဵုတမ်ရိုဟ်ပရိုင်နူဒေသတအ် ပလံင်ဗစိုပ်နင်လဝ်မ္ဂး ပၞာန်ဗၟာတအ် ကၠုင်ပန်ကဵုက္ၜင်ကျာဂှ် စှ်ေအာ လ္ဒောဝ်ကွာန်ဂှ်ရ ကောန်ကွာန်ချေံဍာ် ဟွံအောန်နူကဵု ၃ တၠ ချိုတ်အာတုဲ ရဲဒးဝပ်တအ်ဂှ်လေဝ် နွံဂၠိုင်မာန်ရ။

"ရဲဒးဝပ်တအ်ဂှ် မၞိဟ်ဍောတ်တ်ပါဂၠိုင်မံင်၊ ပလံင်ဏာလဝ် ရုင်ဂဥုဲ ပါ်ဝါဇြေန်တေံရ” သာ်ဏအ် တမ်ရိုဟ်ပရိုင်နူဒေသ လဴထ္ၜးနင်ရ။
တုဲပၠန် ဟိုတ်နူဒးဒုင်ပန်ဗ္တိုက်ကဵု က္ၜင်ကျာပၞာန်ဗၟာ နူအခိင်လ္ဒေဝ်တ္ရဲဏအ်ဂှ်တုဲ သ္ရိဒၟံင်၊ ဆေင်ဖျာညးဍုင်ကွာန်သၟးဟွံက ရုင်ဂဥုဲထတ်ယုက် ဗော်ဍုင်မန်တၟိ မၞုံကွာန်ချေံဍာ်ဂှ်လေဝ် လီုလာ်အာလဝ်နွံရောင် ဂွံတီကေတ်ရ။
နူဗ္တမ်ဏအ်လေဝ် ဟွံဒှ်ပေါဲဗ္တိုက်မွဲသာ် က္ၜင်ကျာဒပ်ပၞာန်ဗၟာတအ် ကၠုင်ပန်ဗ္တိုက် ဖျေံဗမ် ပ္ဍဲကွာန်ဖဠာန်ပါင်ကြုင်တုဲ ကောန်ကွာန်တအ် ချိုတ် ၁ တၠ၊ ဒးဝပ် ၂ တၠနွံကၠုင်လဝ်ရ။
ဒၞါဲပၞာန်ကျာ ဒပ်ပၞာန်ဗၟာတအ် ပန်ဗ္တိုက်ကဵုက္ၜင်ကျာ ကွာန်ချေံဍာ်ကီု သီုကွာန်ဖဠာန်ပါင်ကြုင်ဂှ် မဒှ်ကွာန် မၞုံသၟဝ်အုပ်ဓုပ်ဗော်ဍုင်မန်တၟိ၊ ဒပ်ပၞာန်ဗၠးၜးကောန်ဂကူမန်ရ။
ဆက်စပ်ကဵုပရူတအ်ဂှ်တုဲ တင်နင်သောဲဗြောဲ ဂွံသ္ပဒ္တန်မာန် နူကဵုဌာန်ပရိုင်ဗၠးၜးမန် ဆက်လ္ရတ်မံင်ဖိုဟ်ရ။
