Homeပရိုၚ်ဒ္ဂေတ်ဗက်သၞောဝ်ဒဳကွဳစက်အောန်တုဲ ပ္ဍဲဍုၚ်မတ်မလီု ကွဳစက်တေက်ဇီု မွဲနှေံမွဲနှေံ

ဒ္ဂေတ်ဗက်သၞောဝ်ဒဳကွဳစက်အောန်တုဲ ပ္ဍဲဍုၚ်မတ်မလီု ကွဳစက်တေက်ဇီု မွဲနှေံမွဲနှေံ

ပ္ဍဲလ္တူဍုၚ်မတ်မလီု၊ တွဵုရးဍုၚ်မန်ဂှ် ဒ္ဂေတ်ဗက်သၞောဝ်ဒဳကွဳစက်အောန်တုဲ ဒဳဒၟံၚ်ကွဳစက်ကြာန်ကြာန်ဂှ်ရ ပရေၚ်ကွဳစက်တေက်ဇီု ကတဵုဒှ်မံၚ် မွဲနှေံမွဲနှေံရောၚ် ညးဍုၚ်မတ်မလီုတံကဵု ဂကောံဟံၚ်ပြာ်မၞိဟ်တံ ဟီုရ။

ပရေၚ်ကွဳစက်တေက်ဇီုဗွဲမဂၠိုၚ်ဂှ်ဝွံ ကတဵုဒှ် ပ္ဍဲလ္တူဂၠံၚ်ဇၞော်ဂြိပ်ဇမ္ၚောဲတုဲ ကွဳစက် (မဳနဳအိုဝ်ဝေ၊ ဟိုက်ဂျက်) တံ ဒှ်ဂၠိုၚ်ရဂှ်လေဝ် ဂကောံဟံၚ်ပြာ်မၞိဟ်တံ ဟီုရ။

ကွဳစက် (မဳနဳအိုဝ်ဝေ၊ ဟိုက်ဂျက်) ကေုာံ တက္ကသဳဂမၠိုၚ်ဂှ် ဖ္ဍိုက်မၞိဟ်ဂၠိုၚ်နူစၟတ်လဝ်ဂှ်ကီု၊ ဒဳအသိၚ်ထတ်ကီုဂှ်ရ ကတဵုဒှ် ပရေၚ်ကွဳစက်တေက်ဇီုဂၠိုၚ်တုဲ ပရေၚ်ဒးဘဲဇီုကပိုက်ချိုတ်ဂျိုၚ်လေဝ်နွံရောၚ် ဂးရ။

“တုဲကၠုၚ်ပြဟ်ဟ်ဏံ ဒှ်အာဂှ် ညးဒဳအိုဝ်ဝေဂတဂှ်ကီု ညးလက္ကရဴဂှ်ကီု ချိုတ်အာသီုၜါရ။ ၜိုတ်လဵုဒဳကၠုၚ်အသိၚ်ထတ်တ်ဂှ် အမ်သဝ်ရ။ တုဲတှေ် အိုဝ်ဝေတံ၊ ဟိုက်ဂျက်တံဂှ်လေဝ် ကာဖ္ဍိုက်ညးအာတရဴလေဝ်၊ ကဵုကာဍောတ်တ်ဂှ် ဖ္ဍိုက်မၞိဟ်ကွေံကွေံ” သာ်ဝွံ ကောန်ဂကောံဟံၚ်ပြာ်မၞိဟ် မဖျေံသဇိုၚ်ဍုၚ်မတ်မလီုမွဲတၠ ဟီုရ။

အခိၚ်လၟုဟ်ဏံ ပ္ဍဲဍုၚ်မတ်မလီုဂှ် ဟိုတ်နူသၞောတ်ဗ္ၜတ်လဝ် အခိၚ်အာကၠုၚ် ဗွဲကြဴနူ (၁၂) နာဍဳဗ္တံဂှ်ရ သွက်ဂွံပလံၚ်ဗ္စိုပ် ညးအာတရဴဗ္တံ ဗွဲမဂတာပ်အခိၚ်တုဲ ဒဳအသိၚ်ထတ်ထတ်ဂှ်လေဝ် သကဵုကတဵုဒှ် ဘဲအန္တရာဲကွဳစက်ရ။

တုဲပၠန် ဟိုတ်နူကွဳစက်ဖ္ဍိုက်ကပေါတ် “ကုန်တၚ်ယာဉ်တွဲ” ဂမၠိုၚ်တုဲ ကတဵုဒှ် ပရေၚ်ကွဳစက်တေၚ်ဇီုကီု၊ ကာလဂေတ်ကွဳစက်မ္ဂး ဟွံထ္ၜးပၟတ်ကဵုသမ္တီကီု၊ ဒဳတတ်ကၠောံပၟတ်ကဵုစၞောန် ပၟိၚ်ကီု၊ ဒဳလ္တူလဒေါဝ်ဂၠံၚ်တပ်တပ်ကီုဂှ်လေဝ် သကဵုဒှ်ဘဲအန္တရာဲ ကွဳစက်တေက်ဇီုရ။

ညးတြုံဒၟံၚ်တန်တဴ လ္တူဍုၚ်မတ်မလီုမွဲတၠဂှ် “ညးဒဳအိုဝ်ဝေတံ ပရေံအိုတ်ရ။ ပ္ဍဲဍုၚ်ဂှ်လေဝ် ဒဳမံၚ်အသိၚ်ထတ်ထတ်ရ။ ဒၞာဲဂေတ်တံ မုတံဂှ်လေဝ် ဟွံကေတ်ဂၠံၚ်မွဲသာ် ဂေတ်ဏာဟဂှ်၊ ဗီုကဵုဟွံထ္ၜး ပၟတ်ကဵုသမ္တီတံနွံရ။ ကွဳလိုန်ဓာတ်တံတှေ်လေဝ် ဗီုဂှ်ရ။ အခိၚ်ဗ္တံဂှ် ကာကီု ကွဳလိုန်ဓာတ်ကီု ဒဳအသိၚ်ထတ်ထတ်တှေ် ဒှ်ပရေၚ်ကွဳစက်တေက်ဇီုဂၠိုၚ်ရ” သာ်ဝွံ ညးဟီုထ္ၜးကဵု ပရေၚ်ဆဵုဂဗရ။

ဂိတုနဝ်ဝေမ်ဗာ စၟတ်တ္ၚဲ (၇) တုဲကၠုၚ်ဏံ အခိၚ်ဗ္တံဂှ် ကွဳစက်တောဲ “တွဲကား” ဒေံါလဝ် ပ္ဍဲသ္ကုတ်ဂၠံၚ်မတ်မလီု-မုဟ်ဍုၚ်ဂှ် မဳနဳအိုဝ်ဝေ ဖ္ဍိုက်လဝ်ညးအာတရဴမွဲဖ္ဍိုက် လုပ်တေက်ဇီုဏာ လ္ပာ်လက္ကရဴဂှ်ရ ညးဒဳကွဳစက်ပါလုပ်ကီု သီုဖအိုတ် မၞိဟ်ချိုတ်အာ (၂) တၠတုဲ ဒးအာဘဲဝပ် (၂) တၠရ။

ပ္ဍဲလ္တူဍုၚ်မတ်မလီုဝွံ အပ္ဍဲဂိတုနဝ်ဝေမ်ဗာဏံ ဟိုတ်နူဘဲအန္တရာဲကွဳစက်ဂှ် ညးချိုတ်အာ (၂) တၠနွံတုဲ ညးဒးဘဲဝပ် ဟွံအောန်နူ (၁၀) တၠနွံရောၚ် ဂွံတီကေတ် နူတၚ်နၚ်ဂကောံဟံၚ်ပြာ်မၞိဟ်အပ္ဍဲဍုၚ်တံရ။

ပရေၚ်ကွဳစက်တေက်ဇီု သ္ဂောံအောန်စှေ်အာမာန်ဂှ်မ္ဂး နကဵုညးဒဳကွဳစက်တံ ဒ္ဂေတ်ဗက်သၞောဝ်ကွဳစက်တုဲ ညံၚ်ဂွံဖ္ဍိုက်ညးအာတရဴ လၟိဟ်စၟတ်လဝ်ဂှ်ကီု၊ ညံၚ်ဂွံဒဳအသိၚ်စၟတ်လဝ်လဝ်ဂှ်ကီုဂှ် ဂကောံဟံၚ်ပြာ်မၞိဟ်တံ ဟီုဂးဖ္တိုက်ဖၟောဝ်လဝ်ရ။

RELATED ARTICLES

Most Popular

Recent Comments

nara on DSCF1116