မိစၠန်ထဝ် :
မၞိဟ်ဂြိပ်ပဲါတိတ်ကၠုၚ် နူတိဍာ်ဗော်ဍုၚ်မန်တၟိ ဇူတဴဒၟံၚ် ဒေသပယျဵု သေံ-ဗၟာ ပ္ဍဲဗဒပ်ဟံၚ်ပြာ် ခလံက်ခနဳတံဂှ် ကလေၚ်စဴအာ ဌာန်ဒေသညးတံညိညယျရောၚ် ဂွံတီကေတ်ရ။
ဟိုတ်နူ ပဋိပက္ခ အကြာဗော်ဍုၚ်မန်တၟိကဵု အလဵုအသဳပၞာန်တံဂှ် သ္ၚိတ်ဇြမံၚ်ကီု၊ သီုဒှ်ထဓဝိၚ်ကဵု ကၠအ်သွဝ်ညးတံတုဲ ညးတံ ကလေၚ်စဴဌာန်ညးတံရ။ ညးဒေသဂြိပ်စိုပ်မံၚ် ၆၀၀ တၠပြၚ်ဂှ် လၟုဟ်ကလေၚ်စဴအာ ၂၀၀ တၠ ဒှ်ဒၟံၚ်ယျရောၚ် ကမ္မတဳဟံၚ်ပြာညးဒှ်ဒဒိုက်ဍုၚ်မန် ပ္ဍဲဗဒိုပ်ခလံက်ခနဳ မွဲတၠဟီုရ။
“မွဲတ္ၚဲတှေ် ၂ အိန်ထံၚ်၊ ၃ အိန်ထံၚ် စဴမံၚ်၊ လၟုဟ်ပ္ဍဲခလံက်ခနဳဂှ် လၟိဟ်မၞိဟ် သှေ်မံၚ် ၂၁၄ တၠ၊ ပ္ဍဲကွာန်ဗလးဒုန်ဖာ်ဂှ် ၂၀၀ တၠရ သှေ်မံၚ်၊ မၞိဟ်စဴအာတံဂှ် ညးတံဂွိၚ်ကဵု ကၠအ်သွဝ်ညးတံကီု ဟိုတ်ဂှ်ရ ညးတံစဴအာ” သာ်ဝွံ ကမ္မတဳဂှ် ဟီုရ။
ညးဒှ်ဒဒိုက်ဂြိပ်ဒဴ သှ်ၜေက်မံၚ်တံဂှ်ဝွံ ညးတံစဴအာတုဲမှ ဂွိၚ်ဖောက်ပၞာန်ဒှ်ကၠုၚ်ဂှ်ရ မၚ်ရံၚ်အကာဲအရာတုဲ ညးတံဆက်ဗဒမံၚ် ပ္ဍဲဗဒိုပ်ဟံၚ်ပြာ်ဟလံက်ခနဳဂှ်ဖိုဟ်ရ။
“စဴအာတုဲမှ ဂွိၚ်ဖောက်ဒှ်ပၞာန်လေဝ်၊ ၜိုတ်သြိုဟ်အိုတ်မှ ပိုဲစဴဏောၚ်” သာ်ဝွံ ညးဂြိပ်ဒဴ ဇူမံၚ်ပ္ဍဲဘာဗတောန်လိက်ဟလံက်ခနဳဂှ် ဣစဳမွဲတၠ ဟီုရ။
သွက်ညးဂြိပ်ဒဴတံ ဂွံစသုၚ်ဂှ် နူကဵု ဂကောံရီုဗၚ်ထံက်ပၚ်ပယျဵု TBBC တံ ထံက်ပၚ်ကဵုဒၟံၚ်သ္ၚုဂှ် လၟုဟ်ညးတံ ဒေံါဇူထောံအာယျရောၚ် ကောန်ဂကောံကမ္မတဳဟံၚ်ပြာ်ဂှ် ဟီုရ။
“TBBC ဂှ် ဍေံတံထံက်ပၚ်မံၚ် မွဲတ္ၚဲတှေ် သ္ၚု ၁ ရိုက်၊ ဆဂး စၟတ်တ္ၚဲ ၆ တုဲကၠုၚ်ဏံဂှ် ဍေံတံစထပိုတ်ထောံ ပရေၚ်ထံက်ပၚ်ဂှ်ရ၊ နူကဵုပိုဲ ကလေၚ်အာတ်မိက်တုဲ ဍေံတံကလေၚ်ကဵု သွက် ၃ တ္ၚဲပၠန်၊ မၞိဟ်တၠဒဒိုက်တံလေဝ် အောန်စှေ်မံၚ်ရတှေ် သွက်ဂွံစဂှ် ဍေံပြေပြံၚ်အာမံၚ်ရလေဝ်၊ မုဟိုတ်ဍေံတံ ဂွံထပိုတ်ထောံ ပရေၚ်ထံက်ပၚ်ဂှ်ရောဂှ် ပိုဲလေဝ် ဟွံတီပုဟ်” သာ်ဝွံ ကောန်ဂကောံဂှ် ဟီုရ။
ဗော်ဍုၚ်မန်တၟိဂှ် အတိုၚ်အလဵုအသဳပၞာန်တံ အာတ်မိက်ကၠုၚ်လဝ် သွက်ဂွံပြံၚ်သၠာဲ ဒပ်မၚ်ကွာန်ဂှ် တးပဲါထောံကၠုၚ်ပေၚ်ပေၚ်တုဲရ။ အတိုၚ်အလဵုအသဳပၞာန်တံ အာတ်မိက်လဝ်ဂှ် ဟွံဒုၚ်တဲမ္ဂး ပရေၚ်ဆက်ဆောံအကြာဗော်ဍုၚ်မန်တၟိကဵု အလဵုအသဳပၞာန်တံဂှ် ဒှ်အာ အတိုၚ်ကၠာဟွံဂွံဒေံါပန်ပှော်တေံမာန်မံၚ်ဏောၚ် ဒုသကိုပ်ဒိုဟ်ရးအဂၞဲယျေဝ်မျေတ် ဟီုကၠုၚ်လဝ် ပ္ဍဲဧပြဳ ရ တုဲကၠုၚ်တေံကီုလေဝ် ဒဵုကဵုအခိၚ်လၟုဟ် မုဟွံတၟေၚ်ကၠုၚ်ဏီရ။ ဟိုတ်ဂှ်ရ ညးဒဒိုက် ဂြိပ်ဒဴစိုပ်ပယျဵုတံလေဝ် ကလေၚ်စဴအာ ဌာန်ဒေသ ညးတံညိညရ။
