ကောန်ဟဒေံ
ကောန်ကွာန် ကွာန်အံၚ်ဇၞး ဒးဒုၚ်ရပ်ဏာလဝ်ကဵု က္ဍိုပ်နာဲဆာန်ဍုၚ်တံ ရ တၠဂှ် ၜိုန်ရညးတံကလေၚ်ဗၠးကၠုၚ်ကီုလေဝ် ဒးဒုၚ်ဆက်ရပ်ထိၚ်လဝ်ကဵု ပၞာန်ဗၟာတံ ဒဵုကဵုလၟုဟ်ဖိုဟ်ရ။
ကောန်ကွာန်တံ ဗၠးကၠုၚ်ဂှ် သကိုပ်ဗျူဟာ မဖျေံဒၟံၚ်သဇိုၚ် ဗဒါဲကွာန်လအ်သိုၚ်ဂှ် ကော်စၟဳစၟတ်တုဲ ရပ်ထိၚ်လဝ် ပ္ဍဲကဵုတမ်ဒပ်ဍေံတံ ၃ တၠတုဲ လ္ၚဵုဂှ် နူဒပ်ပၞာန်ညးတံ ကော်ဏာလဝ် သွက်ဂွံသ္ပမၞိဟ် ထ္ၜးဂၠံၚ် ဒပ်နာဲဆာန်ဍုၚ်တံ အာကၠုၚ်မံၚ်ဂှ်ရ။
“ကောန်ကွာန်ဗၠးကၠုၚ် ရ ဂှ်၊ ဒပ်ပၞာန်ဗၟာ ခမရ ၂၈၂ တံ ကော်ဏာ လ္ပာ်ဍာ်ဗုတေံရ။ လၟုဟ်ဂှ် သှေ်မံၚ်ပ္ဍဲကွာန် ၜါတၠ၊ ဍေံတံ ကော်ဏာကဵုထ္ၜးဂၠံၚ်ဂှ် ၜါတၠ၊ ဍေံတံရပ်ထိၚ်လဝ်ပ္ဍဲဒပ်ဍေံတံဂှ် ၃ တၠ၊ မၞိဟ်သှေ်ပ္ဍဲကွာန်ဂှ်လေဝ် အလဵုလေဝ်ဍေံတံဟွံကဵုအာကၠုၚ်ပုဟ်” သာ်ဏံ ကောန်ကွာန်အံၚ်ဇၞးမွဲတၠ လဴကဵုရ။
ကြဴနူကဵု က္ဍိုပ်နာဲဆာန်တံ ရပ်ကော်ဏာ ကောန်ကွာန် ရ တုဲ ပ္ဍဲကဵု ကွာန်အံၚ်ဇၞးဂှ် မွဲဗ္တံမ္ဂး မၞိဟ် ၅ တၠ၊ အရာပ်ညးကဵုညး ဒးမၚ်မံၚ်ကၚ်ဖအိုတ်ဂှ် ဒပ်ပၞာန်ဗၟာတံ ဖျေံလဝ်အမိၚ်ရ။ စနူဂှ်တုဲ ဒဵုကဵုလၟုဟ် မွဲဗ္တံမ္ဂး မၞိဟ် ၅ တၠ၊ ဒးမၚ်ဒၟံၚ်ဖိုဟ်ရောၚ် ကောန်ကွာန်ဂှ် ဆက်ဟီုရ။
“အရာပ်ဇကုကဵုဇကု ဒးမၚ်ကၚ်ဖအိုတ်ရ၊ အခိၚ်ဗ္တံရဒးမၚ်၊ အဃောမၚ်ကၚ်ဂှ် မုလွဟ်လေဝ်ဍေံတံဟွံကဵုလဝ်ပုဟ်၊ ဆဵုမၞိဟ်တၟေၚ်ၚ်တှေ် ဂွံကဵုသမ္တီကဵုဍေံတံဂှ် ဍေံကဵုလဝ်ခ္ဍုက်မွဲမရ၊ ဒေါံဟွံဂွံဏောၚ် ဒးကၠောန်မံၚ်၊ က္ဍိုပ်မ္ၚးတေံ သ္ပသၞဂှ်လေဝ်ဒးဂွိၚ်မံၚ်” သၟတ်ဗြဲ ကောန်ကွာန်အံၚ်ဇၞးမွဲတၠ လဴရ။
ကြဴနူကဵု ကောန်ကွာန် ရ တၠ ဒးဒုၚ်ရပ်ဏာတုဲ ကွာန်အံၚ်ဇၞး၊ ကွာန်ရတ်တၟး၊ ကွာန်ဍာ်တဴ ကေုာံ ကွာန်လအ်သိုၚ်တံဂှ် နူကဵုဒပ် ပၞာန်ဗၟာဒေသတံ ကၟာတ်ထောံအခေါၚ် တိက်ပ္ဍဲဂြိပ်ရောၚ် ညးဒေသတံ ဟီုရ။ လောန်ကၠုၚ် ဂိတုမေ ၅ တေံဂှ် ကောန်ကွာန် အံၚ်ဇၞး ရ တၠတံ ဒးဒုၚ်ရပ်ဏာကဵု က္ဍိုပ်နာဲဆာန်ဍုၚ်တံ သွက်ဂွံအာတ်မိက်လှုဲရ။
