ဗော်ခိုၚ်ကၠိုက်တံကဵုစၞန် သွက်ဂွံပကောံကောန်ဂကောံ

by | Jul 7, 2010 | ပရိုၚ် | 0 comments

မိစၠန်ထဝ်။   ။ပ္ဍဲတွဵုရးဍုၚ်မန် ပွိုၚ်ဍုၚ်မုဟ်ဍုၚ်ဂှ် ဗော်ခိုၚ်ကၠိုက် (ကြံ႕ဖွံ႕) တံ ကဵုစၞန်ကဵုဥက္ကဌကွာန် သွက်သ္ဂောံပကောံပကေဝ် ကောန်ကွာန် နူကဵု ၄၀ တၠ ဆဵုကဵု ၅၀ တၠ သွက်ဂွံသ္ပကောန်ဂကောံဍေံတံရ။

လောန်ကၠုၚ် သတ္တဟတုဲကၠုၚ်တေံ နူကဵုဗော်ခိုၚ်ကၠိုဟ်တံ ကၠုၚ်ကဵုစၞန်ကဵုဥက္ကဌကွာန် သွက်ဂွံပကောံပကေဝ် လၟိဟ်မၞိဟ်သွက်ဂွံသ္ပကောန်ဂကောံဍေံတံတုဲအာယျရောၚ် ရဲစုက်ကဵု ဥက္ကဌကွာန်မွဲတၠ ဟီုရ။

“မၞိဟ်ဟလိုၚ်ဂှ်ဂှ် ဗီုလဝ်ဂွံပကောံရော၊ ကောန်ကွာန်တံလေဝ် ဟွံမိက်ပါလုပ်ပုဟ်၊ ညးလဵုမွဲလေဝ် စိုတ်ဟွံလုပ်စပုဟ်” သာ်ဝွံ အတိုၚ်ဥက္ကဌကွာန်ဟီုဂှ် ညးဆက်ဟီုရ။

လောန်ကၠုၚ်ဂိတုမေတေံဂှ် ဗော်ခိုၚ်ကၠိုက်တံ ကဵုစၞန်ကဵု ဥက္ကဌကွာန် မွဲကွာန် ၂ တၠ သွက်သ္ဂောံပါလုပ် ပ္ဍဲကမ္မတဳဗော်ခိုၚ်ကၠိုက်ရ။ တုဲပၠန် ပ္ဍဲဂိတုဂျောန်ဂှ်လေဝ် ကလေၚ်ကော်ကောန်ကွာန် မွဲကွာန် ၂ တၠ သွက်ဇြဟတ်ကောန်ဂကောံညးတံပၠန်ရ။ ဆဂှ်သၟးဟွံက လၟုဟ်မ္ဂး ဒှ်ကၠုၚ်အလန်တတိယ ကလေၚ်ပကောံ သွက်သ္ဂောံသ္ပကောန်ဂကောံညးတံရောၚ် ညးကြပ်ကဵု ဥက္ကဌကွာန်ဂှ် ဟီုရ။

“ဇၟာပ်ကွာန်ဂှ် ကောန်ဂကောံခိုၚ်ကၠိုက်တံ နွံမံၚ်ရ၊ ဆဂး သ္ဂောံပါလုပ် ပ္ဍဲဗော်ခိုၚ်ကၠိုက်ဂှ် ညးလဵုမွဲလေဝ် စိုတ်ဟွံလုပ်စပုဟ်၊ ဗွဲမဂၠိုၚ်တှေ် မၞိဟ်မံၚ်ကြပ်ကဵုဥက္ကဌကွာန်၊ မၞိဟ်သြဇာနွံပ္ဍဲကွာန်တံရ ဥက္ကဌကွာန် ရုဲစှ်ကဵုဏာစာရၚ်” သာ်ဝွံ ညးဟီုရ။

ပ္ဍဲပွိုၚ်ဍုၚ်မုဟ်ဍုၚ် ကွာန်ကၟာဝက်ဂှ်ဝွံ ဒးပကောံပကေဝ်ကဵု လၟိဟ်မၞိဟ် ၅၀ တၠရောၚ် ရဲကွာန်ဂှ် မွဲတၠ ဟီုရ။

ပွိုၚ်ဍုၚ်မုဟ်ဍုၚ်သၟး လၟိဟ်ၜိုတ် ၂၅ က္ဍိုပ်ကၠံရ စိုတ်လုပ်စမံၚ်ကဵု ဗော်ခိုၚ်ကၠိုက်တံ၊ မၞိဟ်စိုတ်လုပ်စတံဂှ်လေဝ် မၞိဟ်ကေၚ်ဂွံလဝ် အထံက်အပၚ်နူဗော်ဍေံတံကီု၊ သီုကေၚ်ဂွံလဝ် ဖုၚ် GSM နူကဵုဂကောံခိုၚ်ကၠိုက် ကၠာကၠာတေံရရောၚ်ဂှ် မၞိဟ်လ္ၚတ်ပရေၚ်ဍုၚ်ကွာန် နူဍုၚ်မုဟ်ဍုၚ်မွဲတၠ ဟီုရ။

“ဗော်ခိုၚ်ကၠိုက်၊ ဗော်တစည၊ ဗော်ပတောံတံဂှ် ပိုဲစိုတ်ဟွံလုပ်စပုဟ်၊ လၟုဟ်ဂှ် ဗော်မန်ပိုဲ ဗော်ဒဳမဝ်ကရေဇြဳအလုံးရးမန် သွက်သ္ဂောံဂွံမာဲပေၚ်ၚ်ကီု၊ သီုဂွံဇၞးအာမာဲမာန်ဂှ်ရ ပိုဲဒးစုတ်ကဵုမာဲသွက်ဗော်မန်ဏောဝ်” သာ်ဝွံ ညးဆက်ဟီုရ။

ပဲါနူပွိုၚ်ဍုၚ်မုဟ်ဍုၚ်ဂှ် တွဵုရးဍုၚ်မန် ပ္ဍဲပွိုၚ်ဍုၚ်ၜါသွာၚ်လေဝ် မွဲကွာန်မ္ဂး လၟိဟ်မၞိဟ် ၂၀ တၠ ဒဵုကဵု ၅၀ တၠ ဇၟာပ်ကွာန် ဒးပကောံပကေဝ်ကဵုရောၚ်ဂှ် နူကဵုဗော်ခိုၚ်ကၠိုက်တံ ကဵုလဝ်စၞောန်ကု ဥက္ကဌကွာန်တံရောၚ် မၞိဟ်စုက်ကဵု ကောန်ဂကောံခိုၚ်ကၠိုက်မွဲတၠ ဟီုရ။

“ဗော်ခိုၚ်ကၠိုက်တံ ကဵုဥက္ကဌကွာန် ပကောံမံၚ်ကောန်ဂကောံ သွက်ဍေံတံရ၊ ကောန်ကွာန်တံ ဟွံမိက်လုပ်ပုဟ်” သာ်ဝွံ ညးဆက်ဟီုရ။

ဗော်ခိုၚ်ကၠိုက်ဂှ်ဝွံ သုၚ်စောဲအဝဵုအုပ်ဓုပ်တုဲ ဗက်ပကောံပကေဝ်မံၚ် ကောန်ဂကောံ အကြာကွာန် အကြာကောန်ဂကူတံရောၚ် နူကဵုဗော်ဒဳမဝ်ကရေဇြဳကၟိန်ဍုၚ် (UDP) ဥက္ကဌ ဖျဵုမေန်သိၚ် (ဖြိုးမၚ်းသိန်း) ဟီုရ။

“ဗော်ပရေၚ်ဍုၚ်ကွာန် မလုပ်ပေဲါရုဲမာဲသီုဖအိုတ်ဂှ် ဒးစန္ဒက် အတိုၚ်ကော်မယှေန်ပေဲါရုဲမာဲ ဗတိတ်လဝ်သၞောဝ်ဂှ်ရဏောဝ်၊ ဗီုကဵုလၟုဟ်ဏံ ဗော်ခိုၚ်ကၠိုက်တံ သ္ပဗီုဏံဂှ် ဒှ်ဟွံထေက်ပုဟ်၊ တုဲပၠန် သီုကဵု ဟွံကိက်ညဳကဵု သၞောဝ်ကော်မယှေန်ပေဲါရုဲမာဲ မဖျေံလဝ်ဂှ်ပုဟ်” သာ်ဝွံ ညးဟီုရ။

ဗော်ဒဳမဝ်ကရေဇြဳကၟိန်ဍုၚ်တံဂှ် စှေ်မံၚ်ပရေၚ်စန္ဒက် ပ္ဍဲရးအံၚ်ဝ၊ ရးသေတ်ကာၚ်၊ ရး (မကွေး) ရးတၞၚ်သဳကေုာံ ရးဨရာဝတဳတံရောၚ် ဂွံတီကေတ်ရ။

ဗော်ခိုၚ်ကၠိုက်ဂှ်ဝွံ ဝန်ဇၞော် တိၚ်စိၚ် က္ဍိုက်ပ်တုဲ စှေ်မံၚ်ပရေၚ်စန္ဒက်ကီုလေဝ် တရဴပရေၚ်စန္ဒက်ညးတံဂှ်ဝွံ မံက်က်ဟတောဝ်ဟတောဝ် ဟွံမွဲဏီရ။ ၜိုန်ဟွံဂွံစှေ်ပရေၚ်စန္ဒက်ဏီကီုလေဝ် ဗက်ပကောံမကေဝ်မံၚ် ကောန်ဂကောံ အကြာကွာန် သီုကဵုစၞောန် ကုဥက္ကဌကွာန်တံ ဗီုကဵုလၟုဟ်ရ။

ဗော်ပရေၚ်ဍုၚ်ကွာန် မလုပ်ပေဲါရုဲမာဲတံ သီုဖအိုတ်ဂှ်ဝွံ ယဝ်ရ စှေ်ပရေၚ်စန္ဒက်မ္ဂး အတိုၚ်အလဵုအသဳပၞာန်ဗၟာ ကော်မယှေန်ပေဲါရုဲမာဲတံ မဖျေံလဝ် ကၠာဟွံဂွံစှေ်ပရေၚ်စန္ဒက် ပွိုၚ်မွဲသတ္တဟဂှ် ဒးပတိုန်လိက်ကဵုကု ကော်မယှေန်ပေဲါရုဲမာဲတေံရောၚ် လလောၚ်တြးလဝ် ပ္ဍဲလိက်ပရိုၚ်အလဵုအသဳပၞာန် ပ္ဍဲစၟတ်တ္ၚဲ ၂၃  ဂိတုဂျောန် အတိုၚ်လိက်စၞန် (၂/၂၀၁၀) ဂှ် ပတိတ်လဝ်ရ။

Written by

Related Posts

ဗီုညး ညးပတေင် ပရေင်ဍုင်ကွာန် ဆလအ်ဟွံၜိုဟ်သြိုဟ်

ဗီုညး ညးပတေင် ပရေင်ဍုင်ကွာန် ဆလအ်ဟွံၜိုဟ်သြိုဟ်

ပိုဲမၞိဟ်တံမ္ဂးဂှ် ဇၟာပ်ပ်တ္ၚဲ မ္ဒးဆဵုဂဗမံင်ကဵုပြသၞာဂမၠိုင်တုဲ ဇၟာပ်ပ်တ္ၚဲ ပိုဲမၞိဟ်တံ မ္ဒးပသောင်ဒၟံင် ပြသၞာရ။ စပ်ကဵုပသောင်ပြသၞာဂှ် ယဝ်ရစိစောန်မံင်အရာဇဳသာ်မ္ဂး က္လိဂွံဂုဏ်ဖဵု ဗွဲမဂၠိုင်မာန်ရ။ ပြသၞာလ္ၚဵု မဆဵုဂဗလၟုဟ်ဂှ် ကြံင်မ္ၚိုဟ်နူကဵု ပြသၞာကေင်ဆဵုဂဗလဝ် လောန်ကၠုင်တုဲတုဲတေံ ဂၠိုင်ကဵုဆလေဝ်ဒှ်မာန်ရ။ ပြသၞာဂှ် ဗွဲမဂတာပ်တဲ သီုဟွံမွဲကဵုပရေင်ခက်ခုဲ သောင်က္လးမာန်မ္ဂး ဒှ်ညးမၞုံကဵုအစောန်စရာဲခိုဟ်ရ။ ဇၟာပ်ပ်ပြသၞာ နဲသောင်က္လးဍေံ နွံမွဲဗီုဓဝ်ဟွံသေင်ရ။ သွက်သ္ဂောံသောင်က္လးပြသၞာဂှ် ဗီုလဵုပိုဲပလေဝ်ပလေတ်လဝ်နွံနွံ အရာပိုဲဟွံတီလဝ်တံ နွံမံင်လၟိုန်ရ။ ဟိုတ်ဂှ်ရ ပြသၞာညံင်ဟွံဂွံဒှ်ဂှ် မ္ဒးစွံလဝ်သတိလၟိုန်တုဲ ဒှ်ပြသၞာရမ္ဂး မ္ဒးပသောင်ကၠေံ ဍေံပြဟ်ဟ်ရောင်။

ပေဲါရုဲမာဲဂှ် သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ဟွံသေၚ်

ပေဲါရုဲမာဲဂှ် သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ဟွံသေၚ်

ပေဲါရုဲမာဲ ကံၚ်သဳပၞာန်တအ် ရန်လဝ် သွက်ဂွံကၠောန်ဗဒှ်အာ ကၠာသၞာံ (၂၀၂၅) ဟွံအိုတ်ဏံဂှ် သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ကၟိန်ဍုၚ်ဗၟာ ဟွံသေၚ်ရောၚ် သၟာပရေၚ်ဍုၚ်ကွာန်မန် ဗွိုၚ်မ္ၚးဗော်မွဲတၠ ဟီုရ။

တိကၠအ်ဂအာၚ်သ္ၚိ ၚုဟ်က္ဍၚ်တိုန်ဗက်ၚုဟ်ထဝ်

တိကၠအ်ဂအာၚ်သ္ၚိ ၚုဟ်က္ဍၚ်တိုန်ဗက်ၚုဟ်ထဝ်

ပေဲါရုဲမာဲ ကံၚ်သဳပၞာန်တအ် ရန်လဝ် သွက်ဂွံကၠောန်ဗဒှ်အာ ကၠာသၞာံ (၂၀၂၅) ဟွံအိုတ်ဏံဂှ် သွဟ်ဍာံ သွက်ပဋိပက္ခ ပရေၚ်ဍုၚ်ကွာန်ကၟိန်ဍုၚ်ဗၟာ ဟွံသေၚ်ရောၚ် သၟာပရေၚ်ဍုၚ်ကွာန်မန် ဗွိုၚ်မ္ၚးဗော်မွဲတၠ ဟီုရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.