" သဘၚ်ကၞာ တ္ၚဲပၠန်ဂတး ကောန်ဂကူမန် (၆၂) ဝါ ကွာန်ပလိုၚ်ဂျပါန်"
အာကာ – ဟိုတ်နူအကာဲအရာ ပရေၚ်ဂီုကၠီုတုဲ တ္ၚဲပၠန်ဂတးမန် မရနုက်ကဵု (၆၃) ဝါ မကၠောန်ဗဒှ် ပ္ဍဲဒေသပယျဵုဂှ် သၞာံဏံ ပြံၚ်ဆုဲကၠောန်ဗဒှ်အာ လပါ်အပ္ဍဲတိဍာ်ဗော်ဍုၚ်မန်တၟိ ကွာန်ဗလးဒုန်ဖာ်ရောၚ်။
“ဟိုတ်ဂွံပြံၚ်ဆုဲကၠောန် ပ္ဍဲကွာန်ဗလးဒုန်ဖာ်တေံ အဓိကဍေံဂှ် ပရေၚ်ဂီုကၠီု၊ တုဲတှေ် အခက်အခုဲ ဘဏ္ဍာလေဝ် ပါကီု၊ မွဲသာ်ပၠန်ဂှ် ရန်ကဵုညးဍုၚ်ကွာန် သကုတ်ဒေသ ဗလးဒုန်ဖာ်တံဏောဝ်” သာ်ဝွံ ကမ္မတဳဗဟဵု နာဲဟံသာဗိုန်ခိုၚ် ဟီုရ။
ပရေၚ်ဆက်ဆောံ အကြာအလဵုအသဳပၞာန်ကဵု ဗော်ဍုၚ်မန်တၟိ ဟွံပြေပြံၚ်ကီု၊ ဇရေၚ်ဍုၚ်ကျာ်ပိ ဗမ် ဗတိုဟ်မံၚ် မွဲနှေံမွဲနှေံကီုတုဲ ဟိုတ်နူပရေၚ်ဂီုကၠီု ဟွံခိုဟ်ဂှ်ရ ဒးပြံၚ်ပဆုဲဒၞာဲ သဘၚ်ကၞာတ္ၚဲပၠန်ဂတး ဒှ်မာန်ရောၚ်ဂှ် ညးမစုက်လုက်ကဵု ကမ္မတဳကၠောန်ဗဒှ် သဘၚ်ကၞာတံ ဟီုအိုတ်ရ။
ဗော်ဍုၚ်မန်တၟိ မဒေံါကၠုၚ်ပန်ပှော်ကဵု အလဵုအသဳပၞာန် ပ္ဍဲသၞာံ (၁၉၉၅) ဝွံ ယဝ်ရအလဵုအသဳပၞာန်တံ ဟွံသ္ၚဳဂၠိပ်ပလေဝ်ပလေတ်ကဵု သၞောဝ် (၂၀၀၈) မ္ဂး ဟွံလုပ်ပေဲါရုဲမာဲရောၚ်၊ အတိုၚ်အလဵုအသဳပၞာန်တံ အာတ်မိက်လဝ် ပြံၚ်လှာဲအယောၚ်အလာ ဒပ်ပၞာန်မၚ်ပယျဵု ဒပ်ပၞာန်စဵုဒၞာကွာန်ဂှ် ဟွံဒုၚ်တဲရောၚ် ဟီုကၠုၚ်လဝ်နွံတုဲ ပရေၚ်ဆက်ဆောံ ၜါလပါ် တေၚ်မ္ၚိုဟ်ကၠုၚ်ရ။
သဘၚ်ကၞာဒေသပယျဵု သၞာံတုဲကၠုၚ်တေံဂမၠိုၚ်ဂှ် သီုဇက်ကရောၚ်ပၞာန် သီုပၠဒပ် ကၠောန်ကၠုၚ်လဝ် လှဲလှဲလးလးကီုလေဝ် သၞာံဏံဂှ် ဟွံဇက်ကရောၚ်ပၞာန်တုဲ ကၠောန်အာဍန်ဍန်ရ။
ပ္ဍဲသဘၚ်ကၞာ ကွာန်ပလိုၚ်ဂျပါန် သၞာံတုဲကၠုၚ်ဂမၠိုၚ်ဂှ် ကောန်ဂကူမန် နူဒေသပွဳပွူဗဟဵု ကေုာံ နူဍုၚ်သေံတံ ဗွဲမဂၠိုၚ်ဂၠၚ် တိုန်စိုပ်အိုတ်ကီုလေဝ် သၞာံဏံဂှ် ဟိုတ်နူခက်ခုဲကဵု ပရေၚ်အာကၠုၚ်တုဲ ညးတံ တိုန်စိုပ် ဟွံမာန်ရောၚ်ဂှ် ကမ္မတဳကၠောန်ဗဒှ် သဘၚ်ကၞာတံ ဆိၚ်ဆလဝ်ရ။
ပ္ဍဲတ္ၚဲပၠန်ဂတး သၞာံတုဲကၠုၚ်တေံဂမၠိုၚ်ဂှ် သၟတ် ကေုာံ သၚ်သၟတ်မန် အပ္ဍဲဍုၚ်တံ ကၠောန်ဗဒှ်သဘၚ် ရှေ်သှေ်သ္ပဂါရဝ ပ္ဍဲဂိုဟ်က္ဍိုပ်သကိုပ်ပၠန်ဂတးမန် မကလိလောန်အာတံဂှ်ကီုလေဝ် သၞာံဏံဂှ် ကၠောန်ဗဒှ်ဟွံမာန်ရောၚ်ဂှ် သၟတ်မန် အပ္ဍဲဍုၚ်တံ ဟီုရ။
ၜိုန်ဂှ်ကီုလေဝ် ပ္ဍဲဗဟဵု ဗော်ဍုၚ်မန်တၟိ ကေုာံ ခရိုၚ်နာနာတံဂှ် ကၠောန်ဗဒှ် သဘၚ်ကၞာ အတိုၚ်သၞာံကၠာတေံရောၚ် သ္ဂောံတီကေတ်ရ။
သ္ပဟိုတ်ကဵု သၟတ်မန်တံ ပၠံၚ်ဗတိုက်ကေတ်လွဟ် ပ္ဍဲဗဒိုပ်ဗၠာဲသၟိၚ် ကွာန်ထဝ်ပၠၚ်၊ ပွိုၚ်ဍုၚ်ဘာအၚ် ပ္ဍဲသက္ကရာဇ်ဍုၚ် (၁၃၁၀) ဂိတုခ္ဍဲသဳပေၚ်ဂှ်တုဲ တ္ၚဲဂိတုခ္ဍဲသဳပေၚ်ဂှ် စၟတ်သမ္တီကၠုၚ် တ္ၚဲပၠန်ဂတး ကောန်ဂကူမန်ရ။
