ဒပ်ပၞာန်စဵုဒၞာ ၜိုဟ်လလမ် ကောန်ဂကူမန် ဖျေံလွဟ်

by | Oct 28, 2010 | ပရိုၚ် | 0 comments

 

တဆိပ် ဒပ်ပၞာန်စဵုဒၞာၜိုဟ်လလမ် ကောန်ဂကူမန်

အာကာ – ဒပ်ပၞာန်စဵုဒၞာ ၜိုဟ်လလမ် ကောန်ဂကူမန် ကေတ်မံၚ်အခိၚ် ဗွဲမလအ်လကာဖာ သွက်ဂွံပြံၚ်လှာဲ ဒပ်ပၞာန်စဵုဒၞာကွာန်ဂှ် နူတနိတေံ ဖျေံထောံလွဟ်ကဵု အလဵုအသဳပၞာန်ရ။

မွဲဟာန်ကေုာံ ဇြဟတ်မၞိဟ် (၁၂၅) တၠ၊ ဇြဟတ်လွဟ် (၅၇) ဇကိုအ် နူတနိ (ဂိတုအံက်တဝ်ပါ ၂၆) အခိၚ်သဝ်တ္ၚဲ (၃) နာဍဳဂှ် ဖျေံထောံလွဟ် ပ္ဍဲဌာန်ဂအုပ်ပၞာန် ရးဒိုဟ်အဂၞဲတုဲ သကိုပ်ရးတြေံ သကိုပ်ပၞာန် တိတ်နာၚ်ဝေန် ကေုာံ သၞာဲဒါပၞာန်ဇၞော်ဇၞော်တံလေဝ် တိုန်စိုပ်အခန်ကၞာ ဖျေံလွဟ်ဂှ်ကီုရောၚ် ညးတိုန်စိုပ်သဘၚ်ကၞာမွဲတၠ ဟီုလဴထ္ၜးရ။

ပ္ဍဲအခန်ကၞာ ဖျေံလွဟ်ဝွံ နူဒပ်ပၞာန်စဵုဒၞာ ၜိုဟ်လလမ် ကောန်ဂကူမန် ဇြဟတ် ၜိုတ် (၂၅) တၠဟေၚ် ပါလုပ်တုဲ ဇြဟတ်သၟေဟ်တံဂှ် နူဒပ်ပၞာန်ဗၟာတံ ထပ်ဗပေၚ်ကဵုလဝ်ရောၚ်၊ လွဟ်လေဝ် နူဒပ်ပၞာန် ဗပေၚ်ကဵုလဝ်ကီုရောၚ်၊ သွက်သ္ဂောံ လှေ်လဟိၚ်ကဵု ယေန်သၞာၚ်ကောန်ဍုၚ်အရၚ်ဂှ် ညးတံ ကော်ကေတ်နၚ် ကောန်ကွးဘာ နူဘာတန်လှုၚ် စၟတ် (၄)၊ စၟတ် (၈) ကေုာံ ကောန်သမ္ဘာ နူဒပ်ပၞာန်တံရောၚ် ညးဆက်လဴထ္ၜးရ။

“ကယျိုၚ်ဂှ် ကယျိုၚ်ဒပ်မၚ်ပယျဵုရ၊ ဆဂး ဂွံပြံၚ်လှာဲ ဒပ်ပၞာန်မၚ်ပယျဵုဂှ် ဒှ်ဟွံမာန်ပုဟ်၊ မုဟိုတ်ရော ဟီုတှေ် ပ္ဍဲညးတံ ဇြဟတ် ဟွံပေၚ်ပုဟ်၊ လၟုဟ်ဂှ် ဆၜိုတ်အပ်လွဟ်ဓဝ်ရ၊ ပြံၚ်ဒပ်မၚ်ပယျဵုဟာ၊ ပြံၚ်ဒပ်မၚ်ကွာန်ဟာဂှ် ကေတ်ဟွံဒးဏီပုဟ်” သာ်ဝွံ ညးဟီုရ။

ပ္ဍဲဒပ်ပၞာန်မၚ်ပယျဵု မွဲဒပ်မ္ဂး ဇြဟတ် (၂၃၆) တၠ ပါလုပ်တုဲ အပ္ဍဲဂှ် ဒၞာဲကိစ္စဇၞော် မပ္တံကဵု ပရေၚ်အုပ်ဓုပ်၊ တာလျိုၚ်ရုၚ်တံဂှ်လေဝ် သၞာဲဒါအလဵုအသဳ ဒပ်ပၞာန်ဗၟာတံ ပါလုပ် ၜိုတ် (၃၀) တၠကီုရ။

ပ္ဍဲအခန်ကၞာ ဖျေံလွဟ်ဂှ် သကိုပ်ပၞာန် တိတ်နာၚ်ဝေန် ထံက်ပၚ်ကဵု သြန် (၁၅၀) ကိုဋ်တုဲ၊ နူတနေံ (ဂိတုအံက်တဝ်ပါ ၂၇) အခိၚ်ဒေါဝ်တ္ၚဲဂှ်လေဝ် ဒု-သကိုပ်ရး ဌာန်ဂအုပ်ပၞာန် ရးဒိုဟ်အဂၞဲ၊ ဥက္ကဌ ပယက တွဵုရးကရေၚ် ဒု-သကိုပ်ပၞာန် ဇြဝ်မေန် ထံက်ပၚ် သြန် (၃၀) ကိုဋ်၊ သ္ၚု (၂၀၀) ရိုက် ကေုာံ စၞစသုၚ် အပ္ဍဲကွာန်ကအ်ဗိန်ကီုရောၚ် ဂှ် ညးစုက်လုက်ကဵု ဒပ်ပၞာန်စဵုဒၞာၜိုဟ်လလမ် ကောန်ဂကူမန် မွဲတၠ ဟီုရ။

“လၟုဟ် အခေါၚ်ရပ်လွဟ် ဟွံမွဲရပုဟ်၊ ပေဲါရုဲမာဲဏံ ၜက်မှ ဍေံကဵုအခေါၚ် ရပ်ဏောဝ် အလဵုအသဳပၞာန်တံ ဟီု” သာ်ဝွံ နိဿဲကဵု ဂလာန်ညးဖျေံလွဟ်မွဲတၠတုဲ ညးကလေၚ်လဴထ္ၜးရ။

နူသၞာံ (၂၀၀၉) တေံ အိုတ်ဂှ်ဟေၚ် အလဵုအသဳပၞာန်တံ ကဵုမံၚ်ဇြဟတ်ဓရိုဟ် ကုဒပ်ပၞာန်စဵုဒၞာ ၜိုဟ်လလမ် ကောန်ဂကူမန် သွက်ဂွံပြံၚ်လှာဲ ဒပ်ပၞာန်စဵုဒၞာကွာန်ကီုလေဝ် ဟိုတ်နူဇြဟတ် ဟွံဍိုက်ပေၚ်တုဲ အခိၚ်ဒးလဇုဲလဇမံၚ်ရောၚ်ဂှ် ညးထပ်လဴထ္ၜးရ။

ဒပ်ပၞာန်စဵုဒၞာၜိုဟ်လလမ် ကောန်ဂကူမန်ဝွံ ညးမဒေံါဇူ နူဗော်ဍုၚ်မန်တၟိ သကိုပ်ပၞာန်အံၚ်နာၚ် က္ဍိုက်ပ် စဒက်ပတန်ကၠုၚ်လဝ် ပ္ဍဲသၞာံ (၂၀၀၈) အိုတ်ဂှ်တုဲ ကြဴနူညးစုတိအာ (ဂိတုအဝ်ဂါတ် ၂၀၁၀) ဏံတုဲဂှ် ညးမဒေံါဇူ နူဗော်ဍုၚ်မန်တၟိ သကိုပ်ဗိုလ်ဇၞော်တြေံ နာဲယှံၚ် ဆက်ကေတ်ကၠုၚ်တာလျိုၚ် ဥက္ကဌ ရ။

Written by

Related Posts

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ပရေင်တြးပၟတ်ဓာတ်လလဳ ပ္ဍဲဒေသရေဝ်သၟဝ်ကျာ ဖအောန်ဖျေံလဝ်အခိင်

ဟိုတ်နူပရေင်ခက်ခုဲကၠေင်စက်တုဲ ဓာတ်လလဳဒေသရေဝ်သၟဝ်ကျာ ဖအောန်ဖျေံအခိင် ဗလးပၟတ်ရောင် နူကဵုတၠကမၠောန် ဗလးဓာတ်လလဳ ပတိတ်လလောင်လဝ်ရ။

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

သွက်ဂွံလိင်မၞိဟ်ယိုက်ဝန်ပၞာန်ဗၟာ စၞးကွာန်ဂှ် အုပ်ဓုပ်ကွာန်တံ ကၠတ်ဗက်မံင်ဩန် နဲညးကဵုညးနွံ

လဂွံကဵုသၞောဝ်ဥပဒေ ညးဍုင်ကွာန်တံ ဇၟာပ်အာယုက်စိုပ် ဒးလုပ်ယိုက်ဂၠေင်သ္ပကောန်ပၞာန်ဗၟာဂှ် အုပ်ဓုပ်ကွာန်တံ နဲကဲညးကဵုညး ကၠတ်ဗက်မံင်ဩန်တုဲ ဂၠာဲလိင်ဗပေၚ်စုတ်လဝ်မၞိဟ် စၞးကွာန်နွံ ရောင် ညးလုပ်ဂကောံအုပ်ဓုပ်ကွာန် ပွိုင်ဍုင်ရေဝ်သၟဝ်ကျာ မွဲတၠ ဟီုလဴထ္ၜးရ။

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ရဲကောန်ဂကူမန်ဂှ် ဟွံကၟာတ်ဘာလေဝ် ကွးဘာတိုန် ဟွံမွဲ

ပ္ဍဲတ္ၚဲကောန်ဂကူမန် မာ် (၁) စွေက်ဂှ် ၜိုန်ရဘာဟွံကၟာတ်ကၠာလေဝ် နကဵုဓဝ်သမ္တီဇကုကဵုဇကု ကွးဘာတံ ဟွံတိုန်ဘာအိုတ်ရောင် မိမတံကဵု ကွးဘာတံ ဟီုရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.