အာကာ -ဗော်ဍုၚ်မန်တၟိဂှ် ဒှ်ဗော် ဟွံလုပ်သၞောဝ်မွဲတုဲ စရၚ်မၞိဟ်လုပ် မၞိဟ်တိတ် ပ္ဍဲရုၚ်လတူဍုၚ်တံဂှ် ဒးတေၚ်ကဵု ညးတံရောၚ် အလဵုအသဳပၞာန် ကရေပ်ဓရတ်ကၠုၚ် အကြာတ္ၚဲဏံရ။
“ဗော်ဍုၚ်မန်တၟိဂှ် ဒှ်မံၚ်ဗော် ဟွံလုပ်သၞောဝ်မွဲဏောဝ်၊ ရုၚ်ဂှ်လေဝ် ရုၚ်ဟွံလုပ်သၞောဝ်ဏောဝ်၊ ဟိုတ်ဂှ်ရ ဒးတေၚ်ကၟုဲ မၞိဟ်လုပ်မၞိဟ်တိတ် ပ္ဍဲရုၚ်ဏံဏောဝ် ဍေံတံ (အလဵုအသဳပၞာန်တံ) ဟီုကၠုၚ်” သာ်ဝွံ ညးဒုၚ်ကာ ပ္ဍဲရုၚ်လတူဍုၚ် ဗော်ဍုၚ်မန်တၟိ မွဲတၠ ဟီုရ။
ကြဴနူဗော်ဍုၚ်မန်တၟိ ဟွံဒုၚ်တဲ အစဳအဇန် အလဵုအသဳပၞာန် ကဵုကၠုၚ်ဇြဟတ်ဓရိုဟ် ပရေၚ်အပ်လွဟ်ဂှ်တုဲ ဒးထပ်ကဵုကၠုၚ်ဇြဟတ်ဓရိုဟ် သာ်ဏံပၠန်ရ။
ကြဴနူ ဒေံါကၠုၚ်ပန်ပှော်ကဵု အလဵုအသဳပၞာန် နူသၞာံ (၁၉၉၅) တေံဂှ် အတိုၚ်တၚ်တုပ်စိုတ် ၜါလပါ် ဗော်ဍုၚ်မန်တၟိ ပံက်ကၠုၚ်ရုၚ် လတူဍုၚ်မတ်မလီု၊ ဍုၚ်ဇြပ်ဗု၊ ဍုၚ်ရေဝ် ကေုာံ ဍုၚ်ကျာ်ပိ ကီုလေဝ် ကိစ္စဒးတေၚ်ကၟုဲဂှ် မွဲလှေ်လေဝ် ဟွံမွဲကၠုၚ်တုဲ လၟုဟ်ဂှ် ဒှ်အလန်ကိုပ်ကၠာအိုတ်ရောၚ်။
ပွအလဵုအသဳပၞာန်တံ ကၠောန်သ္ပသာ်ဏံဂှ် တုပ်တဴအဓိပ္ပါယ် အလဵုအသဳပၞာန်တံ စၟတ်သမ္တီ လတူဗော်ဍုၚ်မန်တၟိ ဒဒှ်ဗော် ဟွံလုပ်သၞောဝ်မွဲရောၚ် ကမ္မတဳဗဟဵု ဗော်ဍုၚ်မန်တၟိ မွဲတၠ ဟီုရ။
“ကောန်ဗော်ပိုဲ နွံမံၚ်လတူဍုၚ်တံဂှ် ဒးမံၚ်ဒၟံၚ် ညံၚ်ရဴကောန်ကွာန်မွဲဏောဝ်” သာ်ဝွံ ကမ္မတဳ ဗဟဵုဂှ် ဟီုရ။
ဂကောံပံၚ်ကောံ ပရေၚ်ဂကူမန် နဒဒှ် သွာၚ်ဇၞော်မွဲသွာၚ် ဗော်ဍုၚ်မန်တၟိ မပါလုပ်ဂှ် လလောၚ်တြးပတိတ်ကၠုၚ် စပ်ကဵုဗကပ်ဗဗေၚ် ပေဲါရုဲမာဲ အလဵုအသဳပၞာန် မကၠောန်ဗဒှ်ဂှ်တုဲ အဆက်ဖဵုဂှ် ဗော်ဍုၚ်မန်တၟိ ဒးဒုၚ်ဇီုကပိုက် ဒးဒုၚ်ကရေပ်ဓရတ် သာ်ဏံရောၚ် ညးမလ္ၚတ်တံ ဟီုရ။
ပေဲါရုဲမာဲ (၂၀၁၀) ဂှ် ဟွံမွဲကဵု ဗဗွဲဓရ်တုဲ ညးဍုၚ်ကွာန်တံ လ္ပအာရုၚ်မာဲ၊ နနဲစုၚ် ဒစဵုဒစးအာ ပေဲါရုဲမာဲ ညံၚ်သ္ဂောံလီုလာ်ဂှ် ဂကောံပံၚ်ကောံ ပရေၚ်ဂကူမန် လလောၚ်တြး ဗတိုက်ဖအောဝ်လဝ် ပ္ဍဲစၟတ်တ္ၚဲ (၃၀) ဂိတုသေပ်တေမ်ပါဂှ် နွံရ။
ပ္ဍဲဂိတုအဝ်ဂါတ် (၂၃) ဂှ် သကိုပ်ပၞာန် တိတ်နာၚ်ဝေန် ဆဵုဂဗကဵု ညးတာလျိုၚ် ဗော်ဍုၚ်မန်တၟိ ပ္ဍဲဌာန်ဂအုပ်ပၞာန် ရးဒိုဟ်အဂၞဲတုဲ ဂိတုသေပ်တေမ်ပါ (၁) လက္ကရဴအိုတ် ဒးအပ်လွဟ်ရောၚ်၊ ယဝ်ဟွံအပ်လွဟ်မ္ဂး စွံစိုတ်ဂကောံပလီုပလာ်ရပ်လွဟ် အတိုၚ်ကိုပ်ကၠာတေံပၠန်တုဲ ဟွံဆက်ဆောံ ဗဗွဲသၞောဝ်ရရောၚ်ဂှ် ဟီုစၞောန်လဝ်ကဵု ဗော်ဍုၚ်မန်တၟိရ။
ဗော်ဍုၚ်မန်တၟိလေဝ် သွက်သ္ဂောံဒက်ပတန် ကၟိန်ဍုၚ်ပံၚ်ကောံဇေတ်ဇေတ် ဆဵုဂဗတက်ကျာ ပရေၚ်ဍုၚ်ကွာန် ဟွံတုဲဒှ်ဏီမ္ဂး ပရေၚ်ပြံၚ်လှာဲ အယောၚ်အလာဒပ်၊ ပရေၚ်အပ်လွဟ်တံဂှ် ဟွံဒုၚ်တဲရောၚ် ပ္ဍဲစၟတ်တ္ၚဲ (၁) ဂိတုသေပ်တေမ်ပါဂှ် ကလေၚ်လဝ်အရေဝ်ကဵု ဌာန်ဂအုပ်ပၞာန် ရးဒိုဟ်အဂၞဲရ။
ဟိုတ်နူပရေၚ်ဆက်ဆောံ အကြာဗော်ဍုၚ်မန်တၟိ ကေုာံ အလဵုအသဳပၞာန်တံ ဆိုအ်ဗမံၚ်ဂှ်တုဲ ဒးမၚ်ရံၚ်မံၚ် စေအ်စေအ် လတူပရေၚ်ချဳဒရာၚ် အလဵုအသဳပၞာန်တံရောၚ် ညးမၞုံလျိုၚ် သွာၚ်ပၞာန် ဗော်ဍုၚ်မန်တၟိ မွဲတၠ ဟီုရ။
oh, i thought it is not to worry, SPDC is not illegal too. but NMSP i want you to prepare your position. and want to say never give up and look back. it is the hero in politics.