ကဵုဂိတုနဝ်ဝေန်ပါ စၟတ်တ္ၚဲ (၇) ဏအ် နူကဵုအလဵုအသဳပၞာန်တအ် ကၠောန်သ္ပကဵု ပေဲါရုဲမာဲမွဲတုဲ သွက်ဂွံရုဲစှ်ပ္တိုန် အလဵုအသဳ အုပ်ဓုပ်ဍုၚ်တၟိမွဲ၊ နူအလဵုအသဳအုပ်ဓုပ်ဍုၚ်ဂှ် သွက်ဂွံဖျေံကဵုသၞောတ်ဝ်စေဝ်ပၞောန် ပ္ဍဲကဵုသၞောတ်ဒဳမဝ်ကရေဇြဳတုဲ ဍေံတအ် ကော်ခဴစ ”ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်” (စည်းကမ်းပြည့်ဝသည့် ဒီမိုကရေစီစနစ်) သာ်ဝွံရ။

လၟုဟ်မ္ဂး ၜိုန်ရ ဟွံဂွံကၠောန်သ္ပ ပေဲါရုဲမာဲဏီဟီုကၠာရလေဝ် ပ္ဍဲကဵုပေဲါရုဲမာဲဏအ် ညးဂှ်ဇၞးမာဲရောၚ်ဂှ် တီကၠးဒၟံၚ်ရ။ အတိုၚ်ဌာန်အလဵုအသဳပၞာန်တအ် ပလေဝ်ပလေတ်စ နူကဵုပွိုၚ်မွဲသၞာံတေံရ ပေဲါရုဲမာဲဏအ်ဂှ် ဖန်ဗဒှ်ကဵု ”ဗော်ကျဖောအ်” (ပြည်ထောၚ်စုကြံ့ခိုၚ်ရေးနှၚ့် ဖွံ႔ဖြိုးရေးပါတီ) သွက်ဂွံဇၞးအာမာဲတုဲ သွက်ဂွံဒက်ပ္တန် အလဵုအသဳတၟိရောၚ်။ နူကဵုအလဵုအသဳတၟိ သၟဝ်ပရေၚ်အာက္ဍိုပ် ”ဗော်ကျဖောအ်” ဂှ် သွက်ဂွံဖျေံကဵု သၞောတ်ပရေၚ်ဍုၚ်ကွာန် ”ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်” ရောၚ် အလဵုအသဳပၞာန်တံ ဇန်လဝ်နွံရ။

ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်ဟီုဂှ် ဗီုလဵုရော။ ပ္ဍဲကဵုသၞောတ် ပရေၚ်ဍုၚ်ကွာန်တၟိဏအ်ဂှ် ညးဍုၚ်ကွာန်တအ် သာ်လဵုဂွံမံၚ်စံၚ်အာရော ဒဳမဝ်ကရေဇြဳ ဍိုက်ပေၚ်ဒၟံၚ်ကီုရဟာ။ ပရေၚ်သၠးပွး ညးဍုၚ်ကွာန်တအ် နွံဗၞတ်ၜိုတ်သာ်လဵုရော ရဴဝွံ တၚ်သၟာန်နာနာတအ် သွက်ဂွံသၟာန်သၟုက်အာ နွံရ။

”စေဝ်ပၞောန်” ဟီုဂှ် အလဵုအသဳပၞာန်ဗၟာတအ် ဒးစကာဒၟံၚ် ပ္ဍဲကဵုဒပ်ပၞာန်ဍေံတအ်ရ။ ကောန်ပၞာန်တအ် ပ္ဍဲအရာမံၚ်စံၚ်၊ စသုၚ်၊ အာကၠုၚ်စေဝ် ပၞောန်ဂွံနွံ၊ သွက်ဂွံကဠၚ်အမိၚ်လေပ်၊ အတိုၚ်သ္ကိုပ်ပၞာန်လ္တူ ကဵုနၚ်အမိၚ် သွက်ဂွံကၠောန်ဗက်ရ။ ပ္ဍဲကဵုဒပ်ပၞာန်ဗၟာဂှ် ဟိုတ်နူကဵုဖျေံလဝ်သၞောတ်ဝ် သာ်ဏံနွံတုဲ ကောန်ပၞာန်တအ် မုအခေါၚ်ကလေၚ်ဟီုဂးဟွံမွဲ၊ ပရေၚ်သၠးပွးလေဝ် ဟွံမွဲရ။

ဒဳမဝ်ကရေဇြဳဂှ် ဒုၚ်သဇိုၚ်ကဵု ဆန္ဒညးဍုၚ်ကွာန် ဒုၚ်သဇိုၚ်ကဵု ပရေၚ်သၠးပွးရောၚ် ပ္ဍဲကဵုသၞောတ်ဒဳမဝ်ကရေဇြဳဂှ် ပွမဟီုဂးသၠးပွး၊ ကောံဓရီုဒက်ပတန်ဂကောံ ထ္ၜးဆန္ဒ ဗွဲမသၠးပွး၊ ပရေၚ်အာကၠုၚ် ဗွဲမသၠးပွးတအ် ဒးနွံရောၚ်။ ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန် ဟီုဗက်ဟွံဂတာပ် လ္တူပရေၚ်သၠးပွးအိုဿီုတအ် နူကဵုအလဵုအသဳတအ် ဖျေံထောံသၞောဝ်ရောၚ် ဟီုစဂွံရ။

ဟိုတ်နူကဵု သၞောတ်အုပ်ဓုပ်ဓလီုကၠုၚ် လ္တူပရေၚ်သၠးပွး ညးဍုၚ်ကွာန် သဇိုၚ်ကဵု ပရေၚ်သၠးပွး ညးဍုၚ်ကွာန်တအ်တုဲ ၜိုန်ရပေဲါရုဲမာဲ တုဲဒှ်ကီုလေဝ် အတိုၚ်ဆန္ဒညး ဍုၚ်ကွာန်ခမဳသၚ်တအ် ဗွဲမသၠးပွးထ္ၜးဆန္ဒ လတူဍာန်ဟွံဂွံဏီ။ အ္စာပရိုၚ် ကေုာံ လိက်ပရိုၚ်တအ်လေဝ်ပရိုၚ်အလဵုအသဳဗၠေတ်ၚ် ယောၚ်ယာတအ်ဂှ် ဗွဲမသၠးပွးချူဆန်ဟီုဂး ပါ်ပဲါဂွံဟွံသေၚ်၊ ကမၠောန်အလဵုအသဳခိုဟ်ဟ်တအ်ဂှ်ဟေၚ် ထ္ၜးတုဲ ချူဂွံမာန်ရ။ သၟာပရေၚ်ဍုၚ်ကွာန် နူကဵုဗော်ဒစဵုဒစးတအ်လေဝ် ဗွဲမသၠးပွးဟီုဂး ဂွံဟွံသေၚ်ရ။

အခေါၚ်အရာကောန်ဂကူ ကောန်ဍုၚ်အရၚ်တအ်လေဝ် ဂွံသၞောတ်ဗ္ၜတ် ၜိုတ်လဵုမာန်ဂှ် ဒးမၚ်ရံၚ်ဒၟံၚ်ဏီရ။ ချိုတ်ပၠိုတ်မွဲသာ်ဂှ် ဒပ်ပၞာန်ဗၟာတအ် ဆက်တုဲ ဗတိုက်ဒၟံၚ်ဒပ်ပသပုန် ကောန်ဍုၚ်အရၚ်တအ်တုဲ ကောန်ဍုၚ်အရၚ် တအ် ဆက်တုဲ ဒးဒုၚ်ဖံက်ပကဝ်ဒၟံၚ် အခေါၚ်အရာမၞိဟ်နာနာရောၚ်။ ကောန်ဍုၚ်အရၚ်တအ် ဗွဲမသၠးပွး အာကၠုၚ်ပ္ဍဲကဵုတိဍာ်ညးတအ် ဂွံဟွံသေၚ်ရ။

လက္ကရဴအိုတ်သရောပ်မ္ဂး ဒဳမဝ်ကရေဇြဳ မဍိုက်ပေၚ်ကဵုစေဝ်ပၞောန်ဟီုဂှ် သၞောတ်ဒဳမဝ်ကရေဇြဳဇေတ်တ် အတိုၚ်ညးဍုၚ်ကွာန်တအ် အာတ်မိက်ဒၟံၚ် ဟွံသေၚ်ရ။ အကာဲအရာညးဍုၚ်ကွာန်တအ်လေဝ် မုတၟေၚ်တိုန်ဟွံသေၚ် ဒးမံၚ်စံၚ်အာ အတိုၚ်အခိၚ်ကၠာဟွံဂွံကၠောန် ပေါဲရုဲမာဲဏအ်ဟေၚ်ရောၚ် ပတိုန်ထ္ၜးဏာရ။