စၠန်ထဝ် – ပ္ဍဲပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ရေဝ်တံဂှ် သွက်ဂွံပလေဝ်ပလေတ်စ ပ္ဍဲကဵုရုၚ်မာဲရောၚ် ဂးတုဲ နူကဵု ဥက္ကဌကွာန်တံ ဗက်ကံက်မံၚ်သြန် အကြာကွာန် မွဲသ္ၚိ မွဲလ္ၚီဒကေဝ်ရ။
ဟိုတ်နူဒးရာန် ကပေါတ်ဒးရပ်စပ်စကာ ပ္ဍဲရုၚ်မာဲ မပ္တံကဵု ခုၚ်ဂဇအ်၊ ခုၚ်ချူလိက် ကေုာံ ဒၞိက်ဂွံစဵုဒၞာ ဗဒမ်စုတ်မာဲဒလုက်တံဂှ်ရ ဒးဗက်မံၚ်သြန် ပ္ဍဲညးဍုၚ်ကွာန်တံရောၚ် ညးမကြပ်ကဵု ဥက္ကဌကွာန် မၞံုအပ္ဍဲပွိုၚ်ဍုၚ်မုဟ်ဍုၚ်မွဲတၠ ဟီုရ။
ပ္ဍဲသတ္တဟတုဲကၠုၚ်တေံဂှ် နူကဵု မယက ဥက္ကဌပွိုၚ်ဍုၚ်တံ ကဵုနၚ်စၞောန်ကဵု ဥက္ကဌကွာန်တံ သွက်ဂွံဗက်လှုဲရောၚ် ညးဆက်ဟီုရ။
“ရုၚ်မာဲဇကုဂွံတုဲဒှ်ဂှ် ကွာန်ညးကဵုညး ဒးဖန်ဖက်ဇန်ကေတ်ဏောဝ် ဥက္ကဌမယက ကဵုနၚ်စၞောန်” သာ်ဝွံ ညးဟီုရ။
ကွာန်မၞံုပ္ဍဲပွိုၚ်ဍုၚ်မုဟ်ဍုၚ် မပ္တံကဵု ကွာန်ထုၚ်မၚ်၊ ကွာန်ခဗုဲ၊ ကွာန်နာၚ်ပြာၚ်၊ ကွာန်တာကေုာံ ကွာန်ပွဳပွူတံဂှ် ဗက်ကံက်သြန် တုဲဒှ်အာရရောၚ် ဂွံတီကေတ် နူကောန်ကွာန်တံရ။
တုပ်တဴသာ်ဂှ်ကီု ပ္ဍဲကွာန်ပလိုၚ်ဂြဳ ပွိုၚ်ဍုၚ်ရေဝ်ဂှ်လေဝ် သွက်ဂွံပလေဝ်ရုၚ်မာဲဂှ် ဥက္ကဌကွာန်တံ ဗက်ကံက်မံၚ်သြန် အကြာကွာန် မွဲသ္ၚိ မွဲလ္ၚီကီုရောၚ် ကောန်ကွာန်မွဲတၠ ဟီုရ။
ပ္ဍဲပွိုၚ်ဍုၚ်လ္ၚဵုဗက်ကံက်မံၚ်သြန် သွက်ဂွံပလေဝ်ပလေတ် ရုၚ်မာဲကီုလေဝ် ပ္ဍဲပွိုၚ်ဍုၚ်ဇြပ်ဗုဂှ် ဟွံကံက်သြန်ရောၚ် ညးတာလျိုၚ်ရုၚ်မာဲ နူပွိုၚ်ဍုၚ်ဇြပ်ဗုမွဲတၠ ဟီုရ။
“သွက်ဂွံပလေဝ်ပလေတ်စရုၚ်မာဲဂှ် ကဝ်မယှေန်ရုၚ်မာဲတံ ကဵုလဝ် လှုဲ ၜါဠက်တုဲရ။ ပိုဲဟွံဒးဗက်လှုဲ ပ္ဍဲညးဍုၚ်ကွာန်တံပုဟ်၊ တုဲတှေ် သွက်ညးလျိုၚ်ရုၚ်မာဲတံဂှ်လေဝ် ကဵုလဝ် ညးမွဲတၠ ပိလ္ၚီဒကေဝ်” သာ်ဏံ ညးတာလျိုၚ်ရုၚ်မာဲဂှ် ဟီုရ။
ဂွံပလေဝ်ပလေတ်ရုၚ်မာဲဂှ် နူကဝ်မယှေန်ပေဲါရုဲမာဲတွဵုရး ဖျေံကဵုလဝ် မွဲပွိုၚ်ဍုၚ် (၂၀) ကိုဋ်ရ။ ၜိုန်ဂှ်လေဝ် အပ္ဍဲမွဲမွဲပွိုၚ်ဍုၚ်ဂှ် ရုၚ်မာဲနွံဗွဲမဂၠိုၚ်တုဲ ဒးပါ်ပရအ်ကဵုမံၚ်ဂှ်ရ ဟွံရုမ်ဂပ်တုဲ ဒးဗက်ကေတ်မံၚ်သြန် အကြာကောန်ကွာန်တံရောၚ် ညးတာလျိုၚ်ရုၚ်မာဲ နူပွိုၚ်ဍုၚ်မုဟ်ဍုၚ်မွဲတၠ ဟီုရ။
