မာံအဲ – သၞာံဏအ် ၚုဟ်ထၜိုတ် ကလေၚ်ခိုဟ်တိုန်နူသၞာံတုဲကၠုၚ်တေံ ပိဆရောၚ် ရဲသၟာပိုန်ဒြပ် ကူသာန်သွံရာန်ထၜိုတ်ကဵု တၠကၠအ်ထၜိုတ်တအ်ဟီုမံၚ်အိုတ်ရ။ပ္ဍဲသၞာံ ၂၀၁၀ ဂိတုဒဳဇြေန်ပါ ကြပ်ကၠောံကၠုၚ်ကဵုသၞာံ ၂၀၁၁ ဏအ်ဝွံ ၚုဟ်ထၜိုတ် အပ္ဍဲဍုၚ်မန် ကလေၚ်သၠုၚ်တိုန် စဵုကဵုဒှ်အာ မွဲပံၚ် ၁၇၀၀ ဒကေဝ်ကဵု ထၜိုတ်တုီုတီုမ္ဂး မွဲပံၚ် ၁၄၀၀ ဒကေဝ်ရ။
“သၞာံတုဲကၠုၚ်တေံဂှ်တှေ် အခိၚ်တဏအ် ထၜိုတ်ကြဳကြဳမွဲပံၚ် ၄၀၀ ဒကေဝ် ထၜိုတ်တီုတီုဂှ်တှေ် မွဲပံၚ် ၃၀၀ ဒကေဝ်ရဂွံ၊ ပ္ဍဲသၞာံဏအ်ဂှ်တှေ် ၚုဟ်ဍေံသၠုၚ်တိုန်တၟာဟလိုၚ် ထၜိုတ်ကြဳကြဳမွဲပံၚ်ဂှ် ဒှ်အာ ၁၇၀၀ ဒကေဝ်၊ တီုတီုဂှ်တှေ် ၁၄၀၀ ဒကေဝ်” သာ်ဏအ် တၠကၠအ်ထၜိုတ် ပ္ဍဲဍုၚ်ရေဝ်မွဲတၠ ဟီုရ။
ဟိုတ်ဖဵုၚုဟ်ထၜိုတ်တိုန်ဂှ် ၜိုန်ရဟွံတီ ချိုတ်တ်ပၠိုတ်တ်ကၠာလေဝ် ရဲကူထၜိုတ်လ္တူဍုၚ်ဇၞော်တံ ဟိုတ်နူနွံပၟိက်ကၠုၚ်ထၜိုတ်ဂၠိုၚ်ၚ်တုဲ သၟာကူသာန်ထၜိုတ် အကြာကွာန်တံလေဝ် ၜိုတ်ဂွံ ၜိုတ်ကေတ် သၠုၚ်ပတိုန်ၚုဟ်တုဲ ပြိုၚ်ရာန်မံၚ်ညးသကအ်အိုတ်ရောၚ်ဂှ် သၟာကူသာန်သွံရာန်ထၜိုတ်မွဲတၠ ဟီုရ။
ဟိုတ်နူအသိၚ်ၚုဟ်ထၜိုတ်ခိုဟ်တိုန်တုဲ ပ္ဍဲဂိတုဏအ် ရဲဗက်ရာန်တိကၠအ်ဂၠိုၚ်တုဲ တိကၠအ်ထၜိုတ်လေဝ် ၚုဟ်က္ဍၚ်တိုန်ရ။ ကၠအ်ထၜိုတ်တဵုလဝ်တုဲ တၞံနွံၜိုတ် ပိကၠံ တဵုဂွံလဝ်မွဲကသီုတံဂှ် ၚုဟ်ဍေံ ၜိုတ်ကၠံကိုတ်ဒှ်တိုန်ရောၚ်ဂှ် ရဲတၠကၠအ်ထၜိုတ် ပ္ဍဲကွာန်ဘာတအ် ဟီုရ။
“အသိၚ်ၚုဟ်ထၜိုတ်ခိုဟ်မံၚ်တှေ် မၞိဟ်ဗက်သၟာန်၊ မၞိဟ်ဗက်ရာန်တိကၠအ်လေဝ်ဂၠိုၚ်၊ မၞိဟ်ဗက်ရာန်ဂၠိုၚ်ခ္ဍၚ်တှေ် ၚုဟ်တိကၠအ်လေဝ်တိုန် လၟုဟ်ၜိုတ်အဲတီဂှ်တှေ် တၞံထၜိုတ်တဵုလဝ်ၜိုတ်မွဲကသီုတှေ် သွက်မွဲကွာတ်တှေ် ၚုဟ်ဍေံ ကၠံကိုဋ်ဂွံရောၚ်” သာ်ဏအ် တၠကၠအ်ထၜိုတ် ပ္ဍဲကွာန်ဘာမွဲတၠဂှ် ဟီုရ။
ဟိုတ်နူၚုဟ်ထၜိုတ်သၠုၚ်တိုန်တုဲ တၠကၠအ်ထၜိုတ်ကီု သၟာကမၠောန် ကွာတ်ထၜိုတ်တအ်ကီု ပ္ဍဲသၞာံဏအ် ပရေၚ်စသုၚ်မံၚ်စံၚ်ညးတအ် တော်ဏာကဵု အခိၚ်သၞာံအာတေံမ္ဂး နာနာသာ်ဂှ် ပြေပြံၚ်ကၠုၚ် တၟာဟလိုၚ်ဏောၚ် တၠကၠအ်ထၜိုတ် ကွာန်ဘာဂှ် ဆက်ဟီုရ။
ထၜိုတ်ဝွံဒှ်ပရေၚ်ဒြပ်ခိုဟ်ခိုဟ်မွဲ ပ္ဍဲကၟိန်ဍုၚ်မန်၊ ဗၟာတုဲ အလုံမွဲဂၠးကဝ်ဏအ် သွက်ဂွံပတိတ်ကပေါတ်ပါလာတ်သတေတ်ပါတအ်ကီု ပပေါတ်တၞဟ်တအ်လေဝ် ဒးသုၚ်စောဲမံၚ်ထၜိုတ်ရောၚ်။
ပ္ဍဲဍုၚ်ဗၟာဝွံ ရးတနၚ်သဳကဵု တွဵုရးဍုၚ်မန်တံဂှ် ဒှ်ဒေသကၠောန်ကၠအ်ထၜိုတ်ဂၠိုၚ်အိုတ်တုဲ အကြာ သၞာံ ၂၀၀၇ ကဵု ၂၀၀၉ ဂှ် ပ္ဍဲဍုၚ်မန် ရန်လဝ် ကၠအ်ထၜိုတ်ဒးပေၚ် ၄ ကိုဋ်ဧကရောၚ်ဂှ် အလဵုသဳတံလလောၚ်လဝ်နွံရ။
ပ္ဍဲဍုၚ်မန်ဝွံ ပွမကၠောန်ကၠအ်ထၜိုတ်တံဂှ် စွံအဓိကတုဲ ကၠောန်ဝါဗ္ၚတံဂှ် ဒှ်ဒုတိယရ။ သၞာံ ၂၀၀၇ ဂှ် ပ္ဍဲဍုၚ်ဗၟာ တိတဵုလဝ်ကၠအ်ထၜိုတ်နွံ ၅၅၈၀၀၀ ဧကဂှ် ဍုၚ်မန်တဵုလဝ် ၜိုတ်ကဝက်ဒှ်ဒၟံၚ်ရောၚ် အလဵုသဳတံလလောၚ်လဝ်ရ။ ဟိုတ်နူ အလဵုသဳတံ ရန်လဝ် ဂွံထမံက်ပတိတ်တိသၠးသၠးနွံရောၚ်တုဲ ညးကၠောန်ကၠအ်တံ ဂၠိုၚ်ကၠုၚ်ဒၟံၚ်ရ။
လ္တူဂၠးတိဏံ အသိၚ်ရာန်ထၜိုတ်ဂၠိုၚ်အိုတ်ဂှ် ဒှ်ဍုၚ်ကြုက်တုဲ ထၜိုတ်တိတ်နူဍုၚ်ဗၟာတံဂှ် ပလံၚ်ဗစိုပ်ဒၟံၚ်ဂၠိုၚ်အိုတ်ဂှ်လေဝ် ဒှ်ဍုၚ်ကြုက်ကဵု ဍုၚ်သေၚ်ကာပူတုဲ ဗီုဂှ်ကီု ဍုၚ်ဂျပါန်တံလေဝ် ရာန်မံၚ်ရောၚ်ဂှ် ပ္ဍဲဂျနေဝ် (Weekly eleven) ထမံက်လဝ်ရ။
0 Comments