ဟံၚ်ဍုၚ်၊ ရာၚ်မြဟ် – သွက်သ္ဂောံပတိုန်ဂလာန် ပ္ဍဲစၠတ်ထဝ် မကၠောန်သ္ပ ပ္ဍဲဂိတုဂျာန္နဝါရဳ ၃၁ ဏံဂှ် ဗော်မန်ဒဳမဝ်ကရေဇြဳ အလုံရးမန် စှေ်ဒေသတုဲ ဗက်အာတ်မံၚ် ပၟိက်ဆန္ဒ ညးဍုၚ်ကွာန်တံရ။
“အတိုၚ်ပၟိက်ဆန္ဒ ညးဍုၚ်ကွာန်တံ မိက်ဂွံကဵုပတိုန် ပ္ဍဲစၠတ်ထဝ်ဂှ် ဂွံတီကေတ်မာန် အလဵုအမာတ်ဇၞးလဝ်မာဲတံ စှေ်ကွာန်တုဲ ဗက်သၟာန်သၟုက်မံၚ် ပၟိက်ဆန္ဒညးဍုၚ်ကွာန်၊ အတိုၚ်ညးဍုၚ်ကွာန်တံ မိက်ဂွံကဵုပတိုန် ဟီု ပ္ဍဲစၠတ်ထဝ်ဂှ် ပိုဲပတိုန်ထ္ၜး ပ္ဍဲစၠတ်ထဝ်ရောၚ်” သာ်ဝွံ ကောန်ဂကောံ ဗော်ဒဳမဝ်ကရေဇြဳ အလုံရးမန်မွဲတၠ ဟီုရ။
အကြာသတ္တဟဏံ အမာတ်မန်ဇၞးလဝ်မာဲတံ ဆဵုဂဗကဵု ညးဍုၚ်ကွာန်တုဲ ဗက်အာတ်မံၚ် ပၟိက်ဆန္ဒညးဍုၚ်ကွာန် ပ္ဍဲဒေသဇကုဇကုတံ ဇၞးလဝ်မာဲအိုတ်ရ။
“လိက်ပတ်ယေန်သၞာၚ်ဂှ် သွက်ဂကူမန်တံ ကိစ္စဇၞော်ကွေံကွေံဏောၚ်၊ လိက်ပတ်ပိုဲ ပိုဲသ္ဂောံဂွံအခေါၚ်ဗတောန်ဂှ် ပၟိက်ဇၞော်ကွေံကွေံဏောၚ်၊ စပ်ကဵုကိစ္စဏံတုဲ အလဵုအသဳတိုန်တၟိဏံလေဝ် ထေက်ကဵုဒးသ္ပသမ္တီဏောၚ်” သာ်ဝွံ ဥက္ကဌ ဗော်ဒဳမဝ်ကရေဇြဳ အလုံရးမန် နာဲဇၞူမန် ကော် နာဲၚိုဲတိၚ် ဟီုရ။
ပ္ဍဲဘာတန်မူလ မၞုံသၟဝ်ဌာနဝန်ဇၞော် ပရေၚ်ပညာဂှ် သ္ဂောံဂွံအခေါၚ်ဗတောန်လိက်မန် ဗော်ဒဳမဝ်ကရေဇြဳ အလုံရးမန် စွံအဓိက အာတ်မိက်အာ ပ္ဍဲအလဵုအသဳတၟိရောၚ် နာဲဇၞူမန် ဟီုရ။
ပ္ဍဲအရာ အာတ်မိက် ပၟိက်ဆန္ဒ ညးဍုၚ်ကွာန်ဂှ် မပ္တံကဵု အခေါၚ်ကၠောန်ပရေၚ်ပိုန်ဒြပ် ဗွဲမသၠးပွး၊ အခေါၚ်ဗတောန်ပညာ ဗွဲမသၠးပွးတံ ညးဍုၚ်ကွာန်တံ နွံပၟိက်အိုတ်ရောၚ် ဗော်မန် ဟီုရ။
“ပိုဲဂှ် အဓိက ဂယိုၚ်မံၚ်လမျီုကဵု ကၠအ်ဝါဏောၚ်၊ ရဲဒေသမုဟ်ဍုၚ်ပိုဲဂှ် အဓိက ကၠောန်ဗ္ၚရ။ လက္ကရဴဏံ အလဵုအသဳတံ ကၠောန်တိုန်ကၟိုန်တုဲ ဝါဗ္ၚပိုဲ ဂၠိုၚ်ကဵု ကၠံဨက လီုလာ်ကၠုၚ်၊ ဟိုတ်ဂှ်ရ ဗီုဝါဗ္ၚပိုဲ လီုလာ်ကၠုၚ်ဂှ် ဂတဏံ ညံၚ်ဟွံဂွံလီုလာ် ပိုဲမိက်ဂွံအာတ်မိက်” သာ်ဝွံ သၟာဗ္ၚ နူပွိုၚ်ဍုၚ်မုဟ်ဍုၚ်မွဲတၠ ပတိုန်ထ္ၜးလဝ်ကဵု ဗော်မန် သွက်သ္ဂောံပတိုန် ပ္ဍဲစၠတ်ထဝ်ရ။
အခေါၚ်အရာ ကောန်ဂကူ မထေက်ကဵု ကလိဂွံတံဂှ်ကီု ပၟိက်ဆန္ဒညးဍုၚ်ကွာန်တံ မိက်ဂွံကဵုပတိုန်ထ္ၜးဂှ်ကီု ပတိုန်ထ္ၜး ပ္ဍဲစၠတ်ထဝ် ကရောံအမာတ် ကောန်ဍုၚ်အရၚ်တံရောၚ် က္ဍိုပ်သကိုပ်ဗော်ဒဳမဝ်ကရေဇြဳ အလုံရးမန်တံ ဟီုရ။
