ပ္ဍဲပွိုင်ဍုင်သဓီု၊ တွဵုရးဍုင်မန်ဝွံ အပ္ဍဲပွိုင်မွဲသတ္တဟပြင်ဏံဂှ် ကောန်ၚာ် (၆) တၠ ပါလုပ်ကီု သီုဖအိုတ် ညးဒးဒုင်ကိတ်ကဵုကၠဵု (၈) တၠနွံတုဲ ဒုင်လွဳလွတ်မံင်ရောင် ဂွံတီကေတ် နူညးဒေသတံရ။
ပ္ဍဲကွာန် (နောင်ဘို) ၊ ပွိုင်ဍုင်သဓီုဂှ်ဝွံ ဂိတုအံက်တဝ်ဗာ (၁၁) ၊ နူတနေံဏံ အခိင်သဝ်တ္ၚဲ ၜိုတ် (၄) နာဍဳဂှ် ကောန်ၚာ်အာယုက် (၄) သၞာံမွဲတၠကဵု ညးဗြဴအာယုက် (၅၃) သၞာံမွဲတၠ ဒးဒုင်ကိတ်ကဵုကၠဵုရ။
ဗွဲကြဴဂှ်မ္ဂး ကၠဵုအဃောဂြိပ်အာဂှ် ထပ်ကိတ်ဏာလဝ် ကောန်ၚာ်အာယုက် (၃) သၞာံဘာ်မွဲတၠကဵု ညးဗြဴအာယုက် (၅၀) သၞာံ မွဲတၠပၠန်တုဲ ကောန်ၚာ်အာယုက် (၃) သၞာံဘာ်ဂှ် ဒးဘဲဒဏ်သ္ကာတ်မြဟ်မံင်ရောင် ညးဒေသမွဲတၠ ဟီုရ။
ညးဒးဒုင်ကၠဵုကိတ်တံဂှ် ပလံင်ဏာလဝ် ရုင်ဂဥုဲညးဍုင်ကွာန်ခရိုင်သဓီုတုဲ လွဳလွတ်မံင်ဏောင်” သာ်ဝွံ ညးဒေသဂှ် ဟီုရ။
ဂိတုအံက်တဝ်ဗာ စၟတ်တ္ၚဲ (၃) တုဲကၠုင်ဏံ အခိင်သဝ်တ္ၚဲဂှ်လေဝ် ပ္ဍဲကဵုကွာန်ကၟာသာင်၊ ဂကောံကွာန်ဒုင်ဝေါန်၊ ပွိုင်ဍုင်သဓီုဂှ် မသနေမ အာယုက် (၃) သၞာံဘာ်၊ မာံကျဝ်ထူ အာယုက် (၅) သၞာံ၊ မာံဝေဖျဵုအံင် အာယုက် (၆) သၞာံကဵု နဝ်ဖဝ်ဂေ အာယုက် (၅) သၞာံတံ ဒးဒုင်ကိတ်လဝ်ကဵုကၠဵုဏီရ။
ကောန်ၚာ်ဒးဒုင်ကိတ်လဝ်ကဵုကၠဵုတံဂှ် ဒုင်လွဳလွတ်မံင် ပ္ဍဲရုင်ဂဥုဲတုဲ အပ္ဍဲကဵုဂှ်မ္ဂး ကောန်ၚာ်မွဲတၠဂှ် ဒးဘဲသ္ကာတ်မြဟ်မံင်ရောင် ဂွံတီကေတ်ရ။
အပ္ဍဲပွိုင်ဍုင်သဓီုဝွံ ကၠဵုပရးဇးဂၠိုင်ကၠုင်ဂှ်ရ ဒးဒုင်ကိတ်ဒၟံင်ကဵုကၠဵု မွဲနှေံနှေံနွံတုဲ ကောန်ၚာ်ဒးဒုင်ကိတ်ကဵုကၠဵု နွံဗွဲမဂၠိုင်ရောင် ညးဒေသတံ ဟီုရ။
ပ္ဍဲတွဵုရးဍုင်မန်ဝွံ အပ္ဍဲသၞာံ (၂၀၂၆) ဏံ ဒးဒုင်ကိတ်ကဵုကၠဵုတုဲ ဟိုတ်နူကတဵုဒှ် ယဲကၠဵုပရအ်ဂှ်ရ လၟိဟ်ညးချိုတ်သၠုင်တိုန်ကၠုင်ရောင် ဂွံတီကေတ် နူစရင်ဌာနထတ်ယုက်ညးဍုင်ကွာန်တွဵုရးရ။
ပ္ဍဲတွဵုရးဍုင်မန်ဝွံ စနူဂိတုဂျာန္နဝါရဳ၊ သၞာံ (၂၀၂၆) စဵုကဵုဂိတုဂျောန်အိုတ် အပ္ဍဲပွိုင် (၆) ဂိတုဂှ်မ္ဂး ဒၟာနူယဲကၠဵုပရအ်ဂှ် ညးချိုတ်အာ (၉) တၠနွံတုဲ အပ္ဍဲဂှ်ဝွံ အပ္ဍဲပွိုင်ဍုင်သဓီု ပါလုပ် (၂) တၠရဂှ် ဂွံတီကေတ် နူတင်နင်ဌာနက္ဍိုက်က္ဍိုပ် ပရေင်ထတ်ယုက်ညးဍုင်ကွာန်တွဵုရးရ။