ဥတုဗြဲဟွံအိုတ်ခိုဟ်ဟ်ဏီဂှ် ဒၟာနူဓာတ်ဂမ္တဴတိုန်ဂၠိုင်ဒၟံင်ဂှ်တုဲ ဍာ်ကမၠိုင်ကီု၊ ဍာ်ကြုင်ကီု သၞာံဏံ သွက်ဂွံဇတ်ကှ်ပြဟ်ကၠုင်နွံရောင် သၟာသ္ၚဳဂၠိပ်ဥတုဗြဲကျာဍုင်မန်လ္ၚဵုတအ် တော်ဆလဝ်ရ။
ပ္ဍဲကဵုဂိတုဘတ်စွေက်၊ အံက်တိုဝ်ဗာမံက်ဏံဂှ် ဗြဲမွဲလစုတ် တ္ၚဲမွဲလစုတ်ဂှ် ဓာတ်ဂမ္တဴတိုန်ဂၠိုင်ဒၟံင်ဂှ်တုဲ ဍာ်ကမၠိုင်တအ်ကီု၊ ဍာ်ကြုင်တအ်ကီု စဇတ်ဒၟံင်ယျရောင်ဂှ် သၟာသ္ၚဳဂၠိပ်ဥတုဗြဲကျာဂှ် ဟီုသာ်ဝွံရ။
“လၟေင်လၟေင်သၞာံ အခိင်ဏံတှ်ေဍာ်ကမၠိုင်ကီု၊ ဍာ်ကြုင် ဍာ်စောဝ်တအ်ကီုဂှ် ဟွံစဇတ်ဏီပုဟ်၊ မုဟိုတ်ရောတှ်ေ ဗြဲလေဝ်ဟွံအိုတ်ခိုဟ်ဟ်ဏီပုဟ်တှ်ေ၊ ဆဂး သၞာံဏံဂှ် ဗီုဂှ်ဟွံသေင်ပုဟ်၊ ဗြဲဟွံအိုတ်ကျေဝ်ကျေဝ်ဏီဂှ် ဓာတ်ဂမ္တဴဂၠိုင်ဒၟံင်ဂှ်တုဲ ဍာ်ကမၠိုင်ကီု၊ ဍာ်ကြုင် ဍာ်စောဝ်ကီု စဇတ်ဒၟံင်ယျ” သာ်ဝွံ သၟာသ္ၚဳဂၠိပ်ဥတုဗြဲကျာဂှ် ဟီုရ။
ပ္ဍဲကၟိန်ဍုင်ဗၟာဂှ် စတမ်နူဂိတုနဝ်ဝေမ်ဗာ၊ ဒဳဇြေမ်ဗာတေံမ္ဂး ဓာတ်ဂမ္တဴ (အယ်လ်နီညို) ပဵုဂၠိုင်တိုန်ၜက်သၞောတ်ဂှ်တုဲ မၞိဟ်တအ် ဒးဒုင်စ သိင်ဓာတ်ဂမ္တဴ ဂၠိုင်ၜက်သၞောတ်က္တဵုဒှ်ရောင် တၠပညာဥတုဗြဲကျာတအ် တော်နန်တးလဝ်ရ။
“စနူလၟုဟ်ဂှ် ကတူမံင်ဣရ၊ ကတူနူဏံပၠန်တှ်ေ ဘိုအ်ဂွံဒှ်ဒဒိုက်ဖအိုတ်ရ၊ ကတူမံင်ဗီုဏံတှ်ေ တၞံသတ်ဆုမွဲရဲ ဘိုအ်ဂွံဒှ်ဒဒိုက်ပၠန်ရ၊ ကဵုကၠေင်လေဝ် ကေတ်ဝါတ်မံင်ဏံဂှ်တှ်ေ ကတူဂၠိုင်တုဲ ဍာ်ဇတ်ကှ် ဒှ်ဏောင်၊ ကၠေင်လေဝ်ကေတ်ဝါတ် ဏောင်တှ်ေ ဗီုလဵုဂွံတတ်ကၠောံၜက်အာ ကတူဏံဟွံတီရ” သာ်ဝွံ တၠကမၠောန်တဵုပလောမ်မတၞံထ္ၜိုတ် နူပွိုင်ဍုင်ဇြပ်ဗုမွဲတၠ ဟီုရ။
သ္ပဟိုတ်နူဓာတ်ကတူပဵုၜက်နူသၞောတ်ကတဵုဒှ်နွံဂှ်တုဲ တၠကၠအ်ထၜိုတ်တအ် ဒှ်ဂဝိင်ကဵု ထ္ၜိုတ်ယအ်ဂၠိုင်နွံ၊ သၟာကမၠောန်တဵုလွဳတအ်ဂှ် ဒှ်ဂဝိင်ကဵု ဍာ်ဇတ်ကှ်နွံ၊ ညးဍုင်ကွာန်တအ်ဂှ် ဒှ်ဂဝိင်ကဵု ဍာ်ကမၠိုင်ဇတ်ကှ်ဂှ်နွံ သာ်ဝွံ ဂဝိင်ကဏ္ဍညးကဵုညး လုပ်ဒၟံင်အိုတ်ရ။
စိုပ်အခိင်ဓာတ်ကတူ (အယ်လ်နီညို) ဏံမ္ဂး ကောန်ၚာ်သၟတ်တအ်ကီု၊ မၞိဟ်အာယုက်ဇၞော်ဇၞော်တအ်ကဵု မၞိဟ်တၠယဲဝေဒနာတအ်ကီု သွက်ဒးဆဵုဂဗကဵု ဘဲအန္တရာဲလမျီုနွံမာန်တုဲ စတမ်နူအခိင်နူဂယး (၁၀) နာဍဳ အကြာ သဝ်တ္ၚဲ (၃) နာဍဳဂှ် လ္ပိတတ် မ္ၚး၊ လ္ပဒုင်တ္ၚဲ၊ လ္ပဟုံဍာ်တုဲ ယဝ်ဒးတိတ်မ္ၚးမ္ဂး ညံင်ဂွံစဵုဒၞာလဝ် ယာတ်ပလောံကြဳကြဳကီု၊ ဓလဝ်လဝ်က္ဍိုင်ကီုဂှ် ဒံက်တာ/သဝ်ဝန်တအ် ကဵုလဝ်သတိနွံရ။
သွက်ဂွံစဵုဒၞာအာ အန္တရာဲဘဲဒဏ်ဓာတ်ကတူဂှ်မ္ဂး နူလၟုဟ်ဂှ် ဍာ်ကမၠိုင်၊ ဍာ်ကၟာ၊ ဍာ်ကြုင်၊ ဍာ်လ္ဂောဝ်တအ် ညံင်ဂွံထိင်ဒဝ်အာ ပရေင်ခြိုင်စွံဍာ်မာန်ဂှ်လေဝ် တၠပညာဥတုရာသဳတအ် ကဵုလဝ်သတိရ။