မာံတဵုလွဳ – တန်ဗ္တောန် လှေ် ဒယှေ် တိၚ်တိုက် အခိုက်ကၞာမန် မညောန်ကဵုကၠေံကၠက်ဂှ် ပ္ဍဲဂိတုဖဝ်ရဂိုဏ် ၂ စွေက် (ဂိတုမာတ်ချ် ၂၁) ဏံ ပံက်ဏာ ပ္ဍဲဇြပ်သဘၚ်ဓရ်မန် ဍုၚ်မတ်မလီုရ။

တန်ဗ္တောန် လှေ် ဒယှေ် တိၚ်တိုက် ယေန်သၞာၚ်အခိုက်ကၞာမန် ပ္ဍဲကွာန်ဝၚ်္က ဍုၚ်သေံ (ဗီု-ဌာန်ပရိုၚ်ဗၠးၜးမန်)

“အာဲကၟာဲ ယေန်သၞာၚ်မန် အနုသုခုမမန်တံဂှ် ညောန်ကဵုကၠေံကၠက်ရ။ ညံၚ်ဟွံဂွံကၠေံကၠက်ကီု၊ ညံၚ်သ္ဂောံကလေၚ်ဓမံက်ပတိုန်ကီု၊ ညံၚ်သ္ဂောံထိၚ်ဒဝ်မၚ်မွဲအာကီု၊ ညံၚ်ဂွံဂျိုၚ်တဴအာ ဍာ်ဇမၠိၚ်မာန်ကီုတုဲ ပိုဲဒးပံက်တန်ဗ္တောန်ဏံ” သာ်ဝွံ မိသုသု နူကမ္မတဳ ကၠောန်ဗဒှ် တန်ဗ္တောန်ဂှ် ဟီုရ။

နူပွိုၚ်ဍုၚ် မၞုံအပ္ဍဲတွဵုရးမန် ၁၀ ပွိုၚ်ဍုၚ် မွဲပွိုၚ်ဍုၚ် ၂ တၠ သီုဖအိုတ် ရုဲစှ် ကွးဘာတန်ဗ္တောန် ၂၀ တၠတုဲ ဗ္တောန်ကဵု ပွိုၚ် ၂ ဂိတုရ။ ပ္ဍဲကွးဘာတန်ဗ္တောန် ၂၀ တၠဂှ် ညးတြုံ ပါ ၁၄ တၠတုဲ ညးဗြဴ ပါ ၆ တၠရ။

ကွးဘာတန်ဗ္တောန်တံဂှ် သဒးလေပ်လိက်မန်တုဲ သဒးမၞုံကဵု သဇိုၚ်ဂဳတရ။ တန်ဗ္တောန်တုဲအာမ္ဂး ဒးကလေၚ်ဗ္တောန်ကဵု ပ္ဍဲပွိုၚ်ဍုၚ်ဇကု မဆေၚ်စပ်တံဂှ်ရောၚ် ဂွံတီကေတ်ရ။

“ပ္ဍဲတန်ဗ္တောန်ဏံ အဓိက ဗ္တောန်ကဵုဗာတ်ကဠာ။ ဒုၚ်သဇိုၚ်ကဵု ဗာတ်ကဠာတုဲ ကွိုၚ်ကွိုက်တၞဟ်တၞဟ်တံဂှ်လေဝ် ညံၚ်သ္ဂောံတိၚ်တိုက်မာန်ဂှ် ဗ္တောန်ကဵု Note (သၚ်္ကေတဂဳတ ဍုၚ်ဂလိုၚ်)  ရ” သာ်ဝွံ အာစာတန်ဗ္တောန် နူပွိုၚ်ဍုၚ်ပံၚ်မွဲတၠ လဴထ္ၜးရ။

တန်ဗ္တောန် လှေ် ဒယှေ် တိၚ်တိုက် ယေန်သၞာၚ်အခိုက်ကၞာမန် ပ္ဍဲကွာန်ဝၚ်္က ဍုၚ်သေံ (ဗီု-ဌာန်ပရိုၚ်ဗၠးၜးမန်)

ကွိၚ်ကွိုက်မန်တံဂှ် အခိၚ်ကၠာတေံ ဟွံကေၚ်ဗ္တောန်ကၠုၚ်ကဵု Note တုဲ ဗ္တောန်ကၠုၚ် အတိုၚ်နဲကဲတြေံ ဗဵုကလၚ် နကဵုမတ်ကတောဝ်တံဟေၚ်ရ။

“ပ္ဍဲတန်ဗ္တောန်ဏံ ဂွံအခေါၚ်ဗ္တောန်ကဵု Note တုဲ လေပ်အာတှေ် ကွိၚ်ကွိုက်တၞဟ်တံဂှ်လေဝ် တက်ကဵု Note မာန်ဏောၚ်” သာ်ဝွံ ကွးဘာတန်ဗ္တောန် နူပွိုၚ်ဍုၚ်မုဟ်ဍုၚ်မွဲတၠ ဟီုရ။

ပ္ဍဲပေဲါပံက်သဘၚ်ကၞာတန်ဗ္တောန်ဂှ်မ္ဂး နူဂကောံလိက်ပတ်ယေန်သၞာၚ်ပံၚ်ကောံ ဒံက်တာမာံနဲသဵု၊ နူကမ္မတဳ လိက်ပတ်ယေန်သၞာၚ်မန် ဒံက်တာမာံကျဳဝေန် (အာစာသဝ် နာဲဟံၚ်ဍုၚ်) ၊ သၟာဒယှေ် နာဲဇြဟာန်မန်တံကီု ညးမဘိက်ပၟိၚ်လဝ်တံကီု သီုကဵုကွးဘာတန်ဗ္တောန် ၜိုတ် ၅၀ တၠပြၚ် တိုန်စိုပ်အိုတ်ရ။

တုပ်တဴသာ်ဂှ်ကီု ပ္ဍဲသၞာံ ၂၀၁၀ ဂှ် ပံက်ကၠုၚ်တန်ဗ္တောန် လှေ် ဒယှေ် တိၚ်တိုက် အခိုက်ကၞာမန် ပ္ဍဲဍုၚ်ဝှတ်ဝိန် ကၟိန်ဍုၚ်အမရိကာန် ကေုာံ ပ္ဍဲကွာန်ဝၚ်္က ဍုၚ်သေံကီုရ။

သအာၚ်နူဂှ်ပၠန် တန်ဗ္တောန် ကွိၚ်ကွိုက်ကျာံမန်ဂှ် ပ္ဍဲသၞာံ ၁၉၇၈ တေံ အလန်ကၠာအိုတ် ဗ္တောန်ကၠုၚ် ပ္ဍဲပြၚ်ၜဳစက်စာဲ ပွိုၚ်ဍုၚ်ဇြပ်ဗုတုဲ ပ္ဍဲသၞာံ ၂၀၀၈ ဂှ် ဗ္တောန်ကၠုၚ် အလန်ဒုတိယ ပ္ဍဲဇြပ်သဘၚ်ဓရ်မန် ဍုၚ်မတ်မလီုရ။