မိလျးထဝ် – ဗော်ဍုၚ်မန်တၟိကဵု အလဵုအသဳပၞာန် ဒေံါပန်ပှော်လီုကၠုၚ်ဂှ်ရ ဘာကောန်ဂကူမန် မၞုံသၟဝ် ဌာနပရေၚ်ပညာ ဗော်ဍုၚ်မန်တၟိဂှ် သ္ဂောံအာဍာ်ဇမၠိၚ်မာန် သွက်သ္ဂောံအပ်ပြာပ်ကဵု ညးဍုၚ်ကွာန်မန်တံ နွံရောၚ် ဂွံတီကေတ် နူကမ္မတဳ ဌာနပရေၚ်ပညာရ။
ကွးဘာတန်ဒေါဝ် ဘာကောန်ဂကူမန် ကွာန်တၟိတဴတက် ရေဝ်သၠုၚ်ကျာ ( ဗီု-ဌာန်ပရိုၚ်ဗၠးၜးမန် )
ပ္ဍဲဂိတုအေဗရာ ၂-၃ ဏံ ပ္ဍဲဗဒိုပ်ညဳသာ တိဍာ်ဗော်ဍုၚ်မန်တၟိဂှ် ကော်ကောံဓရီု သဳကၠဳအာ ကိစ္စဘာကောန်ဂကူမန်တုဲ အစဳအဇန် သွက်သ္ဂောံအပ်ပြာပ် နွံရောၚ် ကမ္မတဳ ဌာနပရေၚ်ပညာ နာဲအာဲကောံ ဟီုရ။
”ဘာကောန်ဂကူပိုဲလၟုဟ်ဂှ် ပိုဲသွက်ဂွံသ္ပအာ ဘာညးဍုၚ်ကွာန်တအ်ဂှ် ချပ်လဝ်နွံမံၚ်ရ၊ ပ္ဋဲကောံဓရီုဏံ ပိုဲသဳကၠဳတုဲ ဖျေံသ္ဂုတ်သွာတ်ဏောၚ်” သာ်ဝွံ နာဲအာဲကောံ ဟီုရ။
ဌာနပရေၚ်ပညာ ကောန်ဂကူမန်ဂှ် နူသၞာံ ၁၉၇၂ တေံ စဗ္တောန်ကၠုၚ် လိက်ပတ်မန်တုဲ ပ္ဍဲသၞာံ ၁၉၈၄-၈၅ ဂှ် ဒက်ပ္တန်ကၠုၚ် ဂကောံသၟတ် ပရေၚ်ပညာ ဗဟဵုရ။
အတိုၚ်ဌာနပရေၚ်ပညာ ကောန်ဂကူမန် ပတိတ်လဝ်စရၚ် ပ္ဍဲသၞာံ ၂၀၁၀ ဂှ်မ္ဂး ဘာဗ္တောန်လိက်မန် မၞုံ ၂၇၂ ဘာတုဲ သၟဝ်ဌာနပရေၚ်ပညာ ကောန်ဂကူမန် ဘာကောန်ဂကူ မၞုံ ၁၅၄ ဘာ၊ ဘာပံၚ်တောဲကဵု ဌာနပရေၚ်ပညာ အလဵုအသဳဗၟာ မၞုံ ၁၁၈ ဘာရ။
ကွးဘာ ဗ္တောန်လိက်မန် ပ္ဍဲဘာကောန်ဂကူ မၞုံ မွဲလက်ဘာ်ပြၚ်တုဲ ပ္ဍဲဘာပံၚ်တောဲ မၞုံ ၜါလက်ပြၚ်ရ။
အဓာန်ဂတ ဘာကောန်ဂကူမန် ဂွံတန်တဴအာ ဍာ်ဇမၠိၚ်မာန် တၠပညာမန်လ္ၚဵုတံ မိက်ဂွံကဵုပံၚ်တောဲကဵု ဘာပရေၚ်ပညာ အလဵုအသဳတံရ။ ၜိုန်ဂှ်လေဝ် ဌာနပညာ ကောန်ဂကူမန်ဂှ် ဟွံမွဲပၟိက် ပံၚ်တောဲကဵု ဘာအလဵုအသဳရ။
“ဘာကောန်ဂကူမန် ဂွံပြံၚ်ဟပၠုပ်ဏာ ဘာအလဵုအသဳဂှ် ပိုဲ ဒုၚ်တဲ ဟွံမာန်ပုဟ်။ ဘာကောန်ဂကူမန် သီုဖအိုတ် ညံၚ်ဂွံဒှ် ဘာညးဍုၚ်ကွာန်ဂှ် အစဳအဇန်ပိုဲ နွံမံၚ်တုဲတုဲရ။ သၟဝ်တဲအလဵုအသဳဂှ် ပိုဲဟွံမံၚ်ပုဟ်” သာ်ဝွံ နာဲအာဲကောံ ဆက်ဟီုရ။
ပ္ဍဲသၞာံ ၁၉၉၅ ဂှ် ဗော်ဍုၚ်မန်တၟိ ဒေံါကၠုၚ်ပန်ပှော်ကဵု အလဵုအသဳပၞာန်ဗၟာတုဲ ပ္ဍဲရးဒေသမန် ဘာကောန်ဂကူ ဟွံမွဲဏီဂှ် သွက်သ္ဂောံပံက် ဘာကောန်ဂကူ ကေတ်ကၠုၚ် တၚ်တုပ်စိုတ်နွံရ။
