ရာၚ်မြဟ် – ဟိုတ်နူဗြဲကညၚ် ဆက်က်ဂူကၠုၚ်တုဲ ခံက်ၜဵုဂမၠိုၚ် လီုလာ်အာဂှ်ရ ကမၠောန်ၜဵုဂမျိုၚ် ကျဟောံအာ ဗွဲမဂၠိုၚ်ရောၚ်ဂှ် တၠဖဴၜဵုကေုာံ သၟာဗၞိက်ကူသာန်သွံရာန်ၜဵု နူတွဵုရးဍုၚ်မန်တံ ဟီုဂးကၠုၚ်ရ။
ခံက်ၜဵု ပ္ဍဲကၟိန်ဍုၚ်မန် ( ဗီု-ဌာန်ပရိုၚ်ဗၠးၜးမန်)
စနူသၞာံလောန်ကၠုၚ် ၂၀၁၀ ၜိုတ်လဒေါဝ်ဂိတုဒဳဇြေမ်ပါဂှ် ပွိုၚ်ပိတ္ၚဲဆက်က်မွဲဝါ၊ ဂိတုဂျာန်နဝါရဳ ၁၁ ဏံဂှ် မွဲဝါပၠန်၊ လဒေါဝ်ဂိတုမာတ်ချ်ဏံပၠန် မွဲဝါၜါတ္ၚဲဆက်က် ဟိုတ်နူဗြဲဂူရိုပ်လောန်ကာဲတုဲ ခံက်ၜဵု မၞုံအလုံတွဵုရးဍုၚ်မန်မွဲ လီုလာ်အာရ။
သၞာံတုဲကၠုၚ်တေံ ၜဵုဂမျိုၚ် မွဲပသာ ၄၀ ဒကေဝ်ပြၚ် နွံကၠုၚ်ကီုလေဝ် ပ္ဍဲလဒေါဝ်ဂိတုမာတ်ချ်ဂှ် ဒဵုကဵု ၁၀၀ ဒကေဝ် ၚုဟ်ထပက်တိုန်ကၠုၚ်ရ။ ဆဂးဂှ် ဟိုဟ်နူၚုဟ်မးသွံရာန်ၜဵု ဟွံညိၚ်ကီု သီုကဵုၜဵုတိတ်အောန်စှေ်ကၠုၚ်ကီုတုဲ ဒှ်ကၠုၚ်ပရေၚ်ကျဟောံဏံရ။
“အဲဂှ်ချိုတ်ပၠိုတ် ၜိုတ်ကၠံကိုဋ် ဒးဒုၚ်ဆောံအာ၊ ဟိုတ်နူဖဴၜဵုအဲ ကြပ်မံၚ်ကရပ်ကွာန်ဏောၚ်ဏး ဒးဒုၚ်ဆောံဆၜိုတ်ဏံ၊ ရဲတၠဖဴၜဵု သ္ၚောဲကဵုကွာန်ဂှ် ဂၠိုၚ်နူဏံ ဒးဒုၚ်လေၚ်ဆောံလဝ်”သာ်ဝွံ တၠဖဴၜဵု ရဲကွာန်ပ္ၚ နာဲတေန်အံၚ် ဟီုဂးရ။
နကဵုညးဂှ် သွက်ခံက်ၜဵု ၃၀ ဨက ဒးပတိတ်လဝ် သြန်တမ်ရိုဟ် ၜိုတ် ၂၀၀ ကိုဋ်ဒကေဝ် နွံတုဲ ပြဟ်ဟ်ဏံ ၜိုတ် ၄၀ ကိုဋ်ဟေၚ် ကလေၚ်ဂွံကၠုၚ်ရောၚ် ဟီုရ။
ကာလသၞာံဥတုရာသဳ ဒးရးတံမ္ဂး ၜဵုတိတ်ၜိုတ် ၅ ကုိုဋ်ပသာပြၚ်ကီုလေဝ် သၞာံဏံ ၂ ကိုဋ်ပသာ ဂွံပေၚ်ဂှ် ဟွံလောဲသွာရောၚ် ညးတေံခါတ်အကာဲ ဆိၚ်ဆလဝ်ရ။
“ဗြဲဂူမံၚ်ဖိုအ်၊ အဲမွဲဓရ် ဟွံသေၚ်၊ တၠဖဴၜဵုပူဂိုလ်ကီု၊ တၠဖဴၜဵု အလဵုအသဳတံကီု ကျဟောံမံၚ်ဖအိုတ်ဏောၚ်။ ဂွံဆက်ကၠောန်ဂှ် အခိၚ်ကၠောန်ၜဵုလေဝ် ကြပ်အိုတ်ရ” သာ်ဝွံ နာဲတေန်အံၚ် ဆက်ဟီုရ။
သွက်ဂွံကၠောန်ပတိတ် ၜဵုဂမျိုၚ်မာန်ဂှ် လၟေၚ်သၞာံစနူဂိတု သေပ်တေမ်ပါမ္ဂး ပလေဝ်ပလေတ်ခံက်၊ ကၟာတ်ဇုက်ဗၞၚ်၊ တက်ကၟိုန်၊ ဂစိုတ်ခံက်၊ ပၠောပညဳခံက်၊ ပၠုပ်ဍာ်ဖၞုၚ်တံဂှ် လၟေၚ်ကဆံၚ်ၚ် မဒးကၠောန်တုဲ စိုပ်ဂိတုဂျာန်နဝါရဳမံက်မှ ၜဵုစတိတ်ရ။
စိုပ်အခိၚ်ဗြဲ ဂိတုမေဂှ် ဇူဒေံါ ကမၠောန်ပတိတ် ၜဵုဂမျိုၚ်ရ။ ၜိုန်ဂှ်လေဝ် ဟိုတ်နူအကာဲအရာ ဗြဲဂွံဆက်ဂူ နွံဒၟံၚ်တုဲ ပ္ဍဲသၞာံဏံ စနူကဵုဂိတုအေဗရာမံက်ဏံ ညးတံ ဒေံါဇူထောံကမၠောန်ၜဵုညးတံရောၚ် သာ်ဝွံသၟာဗၞိက်ၜဵု နာဲဝေန် ဟီုဂးရ။
“ရဲတၠဖဴၜဵုဍောတ်တ်တံဂှ် ဇူထောံအိုတ်ရ၊ ရဲတၠဖဴၜဵုဇၞော်ဇၞော်တံဂှ် ဆက်အုဲသီမံၚ် ၜဵုသှေ်မံၚ် ပ္ဍဲခံက်ဂှ်ဏီ” သာ်ဝွံ ညးတေံ ဟီုရ။
“ညးကၠောန်ၜဵုသၞာံဏံ ဒးဒုၚ်ကျဖအိုတ်ရ၊ လ္ၚဵု ကျဆၜိုတ်ကဝက်၊ လ္ၚဵု ပိဂအုံ ၜါဂအုံ ဒးဒုၚ်ကျရောၚ်” သာ်ဝွံ နာဲဝေန် ဆိၚ်ဆ ဟီုဂးဏာရ။
ပတိတ်ၜဵုဂၠိုၚ်အိုတ် ပ္ဍဲတွဵုရမဍုၚ်မန်ဂှ် ဒှ်ပွိုၚ်ဍုၚ်ဇြပ်ဗုတုဲ သၟာၚ်နူဂှ် ပွိုၚ်ဍုၚ်ရေဝ်၊ ပွိုၚ်ဍုၚ်ပံၚ် ကေုာံ ပွိုၚ်ဍုၚ်သဓီုတေံလေဝ် ပတိတ်မံၚ်ရ။ ၜဵုနူတွဵုရးဍုၚ်မန်ဂှ် တြးဗစိုပ်အလုံဍုၚ်ဗၟာမွဲကီုရ။
အပ္ဍဲဍုၚ်ဗၟာဝွံ ပ္ဍဲရးဨရာဝတဳ၊ ရးဗဂေါ၊ ရးလ္ဂုၚ်၊ တွဵုးရးရခေၚ် ကေုာံ ပ္ဍဲတွဵုရးဍုၚ်မန်တံဂှ် ကၠောန်ပတိတ်မံၚ် ၜဵုဂမျိုၚ်တုဲ ရးဨရာဝတဳဂှ် တိတ်ဂၠိုၚ်အိုတ်ရ။
0 Comments