ဌာန်ပရိုၚ်ဗၠးၜးမန် – ပ္ဍဲဂိတုမေဏံ ဗော်ဒဳမဝ်ကရေဇြဳ အလုံုရးမန် သွက်သ္ဂောံပံက်ဘာတန်ဗ္တောန် ပရေၚ်ဍုၚ်ကွာန် မသၠုၚ်ပ္တိုန်လညာတ်စရာဲ သွက်ကောန်ဗော်ညးတံ နွံရောၚ်ဂှ် ညးက္ဍိုပ်သ္ကိုပ်ဗော် ဟီုရ။
“ဗော်ပိုဲ ကော်ဘိက်လဝ် နူကဵု (မြန်မာတိုၚ်းမ်) သွက်ကဵုဘာတန်ဗ္တောန် ပရေၚ်ဍုၚ်ကွာန် နွံရ၊ တန်ဗ္တောန်ဂှ် သွက်ဂွံပံက်အာ ပွိုၚ်မွဲသတ္တဟ နွံရ” သာ်ဝွံ နာဲဇၞူမန် ကော် နာဲၚိုဲတိၚ် ညးမဒှ်က္ဍိုပ်သ္ကိုပ် ဗော်ဒဳမဝ်ကရေဇြဳ အလုံရးမန် ဟီုရ။
ပ္ဍဲဘာတန်ဗ္တောန်ဂှ်မ္ဂး သအာၚ်နူပရၚ်ဍုၚ်ကွာန်တုဲ ပရေၚ်တၞဟ်တၞဟ် မပ္တံကဵု ဒဳမဝ်ကရေဇြဳ၊ ကၠတ်ထဝ်၊ ကေုာံ ပါ်ပရအ်အဝဵုတံလေဝ် ပါလုပ်ရောၚ် ညးဟီုရ။
ဌာနပရိုၚ် (မြန်မာတိုၚ်းမ်) ဂှ်ဝွံ တန်တဴဒၟံၚ် လ္တူဍုၚ်လ္ဂုၚ်ရ၊ ဌာနညးတံဂှ်ဝွံ ကၠောန်ပတိတ်ဒၟံၚ် လိက်ပရိုၚ် နကဵုဘာသာဗၟာကေုာံ ဘာသာအေၚ်ဂလိက် ၜါဘာသာရ။ ဂိတုမာတ်ချ် တုဲကၠုၚ်ဂှ် နူကဵုဂကောံ (မြန်မာ အီးဂရက်) မဒှ်ဂကောံ (NGO) လ္တူဍုၚ်လ္ဂုၚ်တေံလေဝ် ကေၚ်ကဵုလဝ် ဘာတန်ဗ္တောန် ပရေၚ်ဍုၚ်ကွာန်ကဵု ဗော်ဒဳမဝ်ကရေဇြဳ အလုံရးမန် လ္တူမတ်မလီု မွဲအလန်တုဲရ။
ပ္ဍဲကဵုကောန်ဂကောံ ဗွဲမဂၠိုၚ်ဂှ် မၞိဟ်ဂၠိုၚ်ကဵုကဆံၚ် ပါလုပ်တုဲ မၞိဟ်လ္ၚဵုတံဂှ် ဟွံကၠိုဟ်ကေတ် ပရေၚ်ဍုၚ်ကွာန် ဇြိုဟ်ဟ်နက်က်အိုတ်ရ။
ဘာတန်ဗ္တောန်ဝွံ ပံက်အာ ပ္ဍဲကဵုဇြပ်သ္ဘၚ်ဓဝ်မန် လ္တူဍုၚ်မတ်မလီုရောၚ်။ “စရိတ်စသုၚ် မံၚ်စံၚ်ဂှ် ဍေံသုၚ်စောဲ သြန်ဍေံဖအိုတ်ရ။ ဗော်ပိုဲ ဟွံဒးပတိတ်ကဵုဍေံပုဟ်” သာ်ဝွံ နာဲဇၞူမန် ဟီုရ။
ကြဴနူအလဵုအသဳတၟိ မံက်ကၠုၚ် ပ္ဍဲဍုၚ်ဗၟာဏံတုဲဂှ် ဗော်ဒဳမဝ်ကရေဇြဳ အလုံရးမန်ကီု ဗော်ပရေၚ်ဍုၚ်ကွာန် ကောန်ဂကူ ကောန်ဍုၚ်အရၚ်တၞဟ်ဟ်တံကီု ဒေသညးကဵုညး ကလိဂွံအခေါၚ် ပံက်ဘာတန်ဗ္တောန် ပရေၚ်ဍုၚ်ကွာန်ရောၚ် က္ဍိုပ်သ္ကိုပ်ဗော် ဒဳမဝ်ကရေဇြဳ အလုံရးမန် ဟီုရ။
ပ္ဍဲဍုၚ်ဗၟာ ကလိဂွံ အခေါၚ်ကၠောန်ပရေၚ်ဍုၚ်ကွာန်ယျရောၚ် သွက်ဂွံထ္ၜးစကဵု ဍုၚ်သအာၚ်တံတုဲ အလဵုအသဳတၟိဏံ ကဵုအခေါၚ် ပံက်ဘာတန်ဗ္တောန် ပရေၚ်ဍုၚ်ကွာန်ရောၚ် က္ဍိုပ်သကိုပ် နာဲဇၞူမန် ညာတ်ကေတ်ရ။
စပ်ကဵုကဵုဒၟံၚ် ဘာတန်ဗ္တောန်ဏံဂှ် ပဝ်လဇြဳ အလဵုအသဳတံ ပါလုပ်ဒၟံၚ်ရောၚ်ဂှ် ညးအာက္ဍိုပ် ဗော်ဒဳမဝ်ကရေဇြဳလ္ၚဵုတံ ဟီုအိုတ်ရ။
ဗော်ဒဳမဝ်ကရေဇြဳ အလုံရးမန်ဝွံ စပ္တံနူဒက်ပတန်ဂကောံတုဲ ဂွံလဝ် ဘာဗ္တောန် ပိအလန်တုဲရောၚ်ဂှ် နာဲဇၞူမန် ဟီုရ။
ပ္ဍဲကဵုပေဲါရုဲစှ်မာဲ သၞာံ ၂၀၁၀ ဂှ် ဗော်ဒဳမဝ်ကရေဇြဳ အလုံရးမန် လုပ်ပြိုၚ်ပ္ကာန် ၃၄ ဒၞာဲတုဲ ဇၞးအာ ၁၆ ဒၞာဲရ။
