ဌာန်ပရိုၚ်ဗၠးၜးမန် – ဟိုတ်နူဒပ်ပၞာန် အလဵုအသဳတံ ထပက်မံၚ်ပၞာန် လ္ပာ်ဒပ်ပၞာန်သေံဇၞော် ဒိုဟ်သၟဝ်ကျာတေံဂှ်ရ လ္ပာ်ဒပ်ပၞာန်ကရေၚ်ဂှ် ထပက်ပၞာန်အောန်စှေ်ကၠုၚ်ရောၚ်ဂှ် ဂွံတီကေတ် နူမၞိဟ်ပွဳပွူ ဒပ်ပၞာန်ဗၠးၜးကရေၚ် (ကေအေန်ယူ) တံရ။

စှေ်ဘာသဇိုၚ်ကွတ်ပၞာန် မကၠောန်သ္ပ ပ္ဍဲတိဍာ် ကေအေန်ယူ (ဗီု - KIC)

“လၟုဟ်ဂှ် ဒပ်ပၞာန်အလဵုအသဳတံ အာပကောံလဝ် ဇြဟတ်ပၞာန်ဍေံ လ္ပာ်ဒပ်ပၞာန်သေံဇၞော် (သၟဝ်ကျာ) တုဲတှေ် လ္ပာ်ပိုဲဂှ် ဍေံတံ ထပက်ပၞာန် အောန်စှေ်ကၠုၚ်” သာ်ဝွံ ညးမၞံုတာလျိုၚ် နူဒပ်ပၞာန်ဗၠးၜးကရေၚ် ဒပ်မဟာ (၆) တံဒပ် (၁၆) ဒပ်ပါ် (၂) မွဲတၠ ဟီုရ။

စပ္တံနူ သၞာံ ၂၀၁၀ ဂိတုနဝ်ဝေမ်ပါ ဒုတိယသတ္တဟဂှ် ဒပ်ပၞာန်အလဵုအသဳတံ စထပက်မံၚ်ပၞာန်ကဵု ဒပ်ပၞာန်ကရေၚ်တုဲ မွဲတ္ၚဲ ၜိုတ်ပိဝါ ကတဵုဒှ်ကၠုၚ် ပေဲါဗတိုက်နွံရ။ နူသၞာံ ၂၀၁၁ ဂိတုအေဗရာ ၁၅ တုဲ ထပက်ပၞာန် အောန်စှေ်ကၠုၚ်ရောၚ် ညးမၞုံတာလျိုၚ်ဂှ် ဟီုရ။

ဟိုတ်နူဒပ်ပၞာန်အလဵုအသဳတံ ထပက်ပၞာန် အောန်စှေ်ကၠုၚ်ဂှ်ရ ကေအေန်ယူတံလေဝ် ဂၠံၚ်ကွဳစက် ဇြပ်ဗု – ကျာ်ပိ၊ လှာဒကှ် – ကျာ်ပိ ကၟာတ်လဝ်ကၠာတေံဂှ် လၟုဟ်ကလေၚ်ပံက်ကဵုပၠန်ရ။

ၜိုန်ဂှ်လေဝ် အခိၚ်ဟွံရုဲ ပေဲါဗတိုက် ဆက်ကတဵုဒှ်မာန်တုဲ ဒးမံၚ်ဒၟံၚ် ကဵုသတိရောၚ် ညးမၞုံတာလျိုၚ်ဂှ် ဆက်ဟီုရ။

စပ္တံနူ ပ္ဍဲဂိတုမာတ်ချ်အိုတ်ဂှ် ဒပ်ပၞာန်အလဵုအသဳတံ စထပက်ပၞာန် ဒပ်ပၞာန်သေံဇၞော် (သၟဝ်ကျာ) ရ။