နာဲမာန် – ဂိတုဂျောန် (၃၀) ဏံ စွံတ္ၚဲလက္ကရဴအိုတ်တုဲ ဂကောံကေတ်လဝ်ဓဝ်ၜိုဟ်လလမ် ကု အလဵုအသဳပၞာန် ပ္ဍဲကာလတုဲကၠုၚ်တေံ ညံၚ်ဂွံပအပ်လွဟ် ပ္ဍဲကဵုဗဒိုပ်ဗၠာဲသၟိၚ် မဆေၚ်စပ်တအ်ဂှ် ညးတာလျိုၚ်အလဵုအသဳ ဗက်လလောၚ်မံၚ် အကြာဍုၚ်ဇြပ်ဗု၊ မုဟ်ဍုၚ် ကဵု ဍုၚ်ဇြပ်ဗု နွံရ။
ဒပ်ပၞာန်ဗၠးၜးကောန်ဂကူမန် ပၠဒပ်ပ္ဍဲသ္ဘၚ်ကၞာတ္ၚဲကောန်ဂကူမန် ကွာန်ပလိုၚ်ဂျပါန် ( ဗီု - ဌာန်ပရိုၚ်ဗၠးၜးမန် )
ညးတာလျိုၚ် အလဵုအသဳတအ်ဂှ် နကဵုလိက်လလောၚ်တရးကီု နကဵုစက်သၠဲရမျှာၚ်ကီု လလောၚ်တရးမံၚ် အကြာဍုၚ်ဂှ် ဂကောံအလဵုဒးပအပ်လွဟ်ဂှ် ဟွံဟီုဓမံက်လဝ်ကၠးကၠးရ။ အဓိကညးတအ်ဟီုကဵု ရဲဒပ်ပၞာန်ဗော်ဍုၚ်မန်တၟိလေဝ်ဒှ်မာန် ဂကောံသောဲသောဲဗြောဲဗြောဲဂမၠိုၚ် ဒုၚ်ယၟုဂကောံၜိုဟ်လလံတအ်လေဝ်ဒှ်မာန် သၟာခါတ်အကာဲပရေၚ်ဍုၚ်ကွာန် အပ္ဍဲဍုၚ်မန်မွဲတၠ ဟီုရ။
“ပရေၚ်ပအပ်လွဟ်ဏံဂှ် နူသတ္တဟကၠာဂှ်ရ ပ္ဍဲဍုၚ်မတ်မလီုဂှ် မိၚ်မံၚ် ကောဠဟောဠံၚ် ရဲစဴဗော်ဟွံမာန် ၝရဲသှေ်ကလုဲမံၚ် နူကဵုသၞာံတုဲ ဒှ်မာန်။ သောၚ်ဂှ် ဟွံသောၚ်တှေ် ရဲရပ်လွဟ် ကေတ်လဝ်ဓဝ်ၜိုဟ်လလမ် ရဲရပ်လွဟ် အဒေါဝ်ဍုၚ်တေံလေဝ် ဒှ်မာန်” သာ်ဝွံ ဟီုးဂးရ။
အတိုၚ်ရဲကၠောန်ဒၟံၚ် ပရေၚ်ဖောအ်ဗြေဝ်ပ္ဍဲဍုၚ်မန်မွဲတၠ ဟီုမ္ဂး အလဵုအသဳတၟိဏအ် တိုန်တုဲ အတိုၚ်သၞောတ်ဝ်ဍေံတအ် သွက်ဂွံသီထောံ လွဟ်ပြးဇးဒၟံၚ်တုဲ သွက်ဂွံ ဒဏ်အာပရေၚ်ၜိုဟ်လလံအကြာဍုၚ် အကြာကွာန်တုဲ လလောၚ်လေဝ်ဒှ်မာန်ရောၚ် ဂးရ။
ဗော်ဍုၚ်မန်တၟိကဵု ဒပ်ပၞာန်ဗၠးၜးကောန်ဂကူမန်ဝွံ စနူကဵုဂိတုအေပရေဝ် သၞာံ ၂၀၁၀ ကၠုၚ်တေံ ဒၟာနူကဵု ဒုၚ်တဲ အတိုၚ်အလဵုအသဳပၞာန်တအ် ကဵုနၚ်အမိၚ် သွက်ဂွံပြံၚ်သၠာဲဒပ်မၚ်ပယျဵုကီု သွက်ဂွံသ္ပမၚ်ကွာန်ကီု ကယျာန်ဒဴလဝ်တုဲ ရုပ်ကၠေံလဝ် ရုၚ်ညးတအ် နူကဵုလတူဍုၚ်အိုတ်ရ။ ညးတာလျိုၚ်ကီု သကိုပ်ဒပ်တအ်ကီု ကလေၚ်ဆုတ်စဴကၠုၚ် တိဍာ်ဗၠးၜး ဗော်ဍုၚ်မန်တၟိ ထိၚ်ဒဝ်လဝ်အိုတ်ရ။
ဆဂး ပ္ဍဲအခိၚ် ဗော်ဍုၚ်မန်တၟိ ရုပ်ကၠေံ ဒေံါပန်ပှော်ကုအလဵုအသဳပၞာန်ဂှ် ကောန်ဗော်လ္ၚဵု ကောန်သဂံၚ်လ္ၚဵု ဒေံါဇူထောံ နွံရောၚ်။
အတိုၚ်ညးတာလျိုၚ် ဗော်ဍုၚ်မန်တၟိမွဲတၠ ခရိုၚ်သဓီု မွဲတၠ ဟီုမဂး အလဵုအသဳတၟိဏအ်ဂှ် ရန်တၟအ်ဏာကဵု ဗော်ဍုၚ်မန်တၟိသၟးဟွံသေၚ် ဂကောံရပ်လွဟ်ဖအိုတ် ဒှ်မာန်ရောၚ်၊ ရဲဒေံါအာတအ်ဂှ် လွဟ်နွံကီုဒှ် ဟွံမွဲကီုဒှ် မူဟွံဆေၚ်စပ်ကဵု ဗော်ဍုၚ်မန်တၟိရောၚ် ဟီုရ။ ပ္ဍဲဒေသခရိုၚ်သဓီု ပွိုၚ်ဍုၚ်ကအ်ကရိက်ဂှ်လေဝ် ညးတာလျိုၚ်အလဵုအသဳတအ် ကဵုလိက်ကု ဇၟာပ်ဥက္ကဌကွာန်တုဲ သွက်ဂွံဟီုဂးကု ရဲရပ်လွဟ်တအ်ဂှ် ဗကန်လဝ်ရ။
အတိုၚ် အဆက်နူကဵု ဒပ်ထံၚ်ပရိုၚ်ဗၟာမ္ဂး ညးတာလျိုၚ် ကောန်ဗော် ကဵု ကောန်သ္ဂံၚ် ဗော်ဍုၚ်မန်တၟိ သှေ်ဇးဒၟံၚ် အပ္ဍဲဍုၚ်တအ်ဖအိုတ်ဂှ် ဒးကဵုစရၚ်ရုၚ်ဗၠာဲသၟိၚ် မဆေၚ်စပ်တအ်တုဲ ယဝ်ရ လွဟ်နွံမဂး ဒးပအပ်လွဟ်ကီုရောၚ် ထံၚ်ပရိုၚ်ဂှ် ဟီုရ။
မ္ၚးနူကဵု ရဲဒေံါဇူ နူကဵုဗော်ဍုၚ်မန်တၟိတုဲ ဂကောံမန်ရပ်လွဟ် ကေတ်လဝ်ဓဝ်ၜိုဟ်လလံ ကုအလဵုအသဳလေဝ် နွံတၟာဂလိုၚ်ရ။ ဂကောံနာဲယှုံၚ် (အဆက်နူကဵု သ္ကိုပ်ပၞာန်နာဲအံၚ်နာၚ်)၊ ဂကောံနာဲသြဆာန် တအ်လေဝ် ရပ်လွဟ်တုဲ ချဳဒရာၚ်ဒၟံၚ် နွံရောၚ်။ လ္ၚဵုတအ် နကဵုဗီုပြၚ်ဂကောံဟွံသေၚ် ချဳဒရာၚ်ဗီုပူဂဵုလေဝ် နွံရောၚ်။
“ညးတအ် ဟီုကဵုအပ်လွဟ် အလန်ဏံဂှ် ရဲဂကောံကီု လ္ၚဵု ရဲလုပ်လဝ်ဂကောံဟွံသေၚ်ကီု လ္ၚဵုပၠန် ယဝ်ရဂၠေံတုဲ ရပ်လဝ်လွဟ်ကီု ဗီုလဵုရပ်လဝ်ဒှ်ဒှ် ညံၚ်ဂွံပအပ်ထောံလွဟ်တံဏံ ဒှ်မာန်ရောၚ်” ရဴဝွံ ညးတာလျိုၚ် ဒပ်မၚ်ကၚ်ကွာန် ပွိုၚ်ဍုၚ်မုဟ်ဍုၚ်မွဲတၠ ဟီုရ။
ပရေၚ်လလောၚ်တရး သာ်ဏအ် ဟီုဂှ် သွက်ဂွံပလီုထောံ ပရေၚ်ဒေံါပန်ပှော် အကြာအလဵုအသဳကဵု ဂကောံဒေံါပန်ပှော်တအ်လေဝ် ဒှ်မာန်ရောၚ် ညးမခါတ်အကာဲ ပရေၚ်ဍုၚ်ကွာန်တအ် လ္တူဍုၚ်မတ်မလီုမွဲတၠ ဟီုရ။ ဗော်ဍုၚ်မန်တၟိဂှ် ပအပ်လွဟ် ဟွံသေၚ်တုဲ အလဵုအသဳတအ် လလောၚ်တရး လတူဗော် ဟွံကေတ်သၞောတ်ဂးတုဲ သွက်ဂွံဗတိုက် ဗော်ဍုၚ်မန်တၟိဂှ် ဒှ်အာ ဗဗွဲဓရ်ရောၚ် ရဴဝွံ ညးသ္ၚဳဂၠိပ်ပါ်ပဲါရ။
